Obadias 1 - Ti Baro a Naimbag a Damag Biblia

¹ Daytoy ti padto ni Obadias ti sao ni Apo Dios maipapan iti nasion ti Edom. Imbaon ni Yahweh dagiti adipenna a mapan kadagiti nasion, ket nangngegmi ti imbagana, “Agsaganakayo! Intayo gubaten ti Edom!”

Dusaento ti Dios ti Edom

² Kuna ni Yahweh iti Edom, “Pagbalinenkanto a nakapuy, ket lalaisendakanto dagiti amin.

³ Inallilawnaka ti kinapalangguadmo. Nasarikedkedan iti pasig a bato ti kabeseram; adda kadagiti nangato a bantay ti balaymo. Gapu iti daytoy kunam iti bagim, ‘Adda aya makabael a mangipababa kaniak?’

⁴ Uray no agbalayka iti kas kangato ti umok ti agila, ket kasla adda iti ayan dagiti bituen, ipababakanto latta.

⁵ “No umay dagiti mannanakaw iti rabii, dagiti la kayatda ti alaenda. No agburas dagiti tattao iti ubas, adda latta ibatida. Ngem inkisapdakayo a namimpinsan dagiti kabusoryo.

⁶ Dakayo a kaputotan ni Esau, nasamsamen dagiti gamengyo.

⁷ Liniputandakayo dagiti amin a kakaduayo; pinaksiatdakayo iti mismo a pagilianyo. Pinarmekdakayon dagiti tattao a nakikappia idi kadakayo. Dagiti gagayyemyo a kinasangoyo iti panganan nangikabilda iti pangipalab-oganda kadakayo, ket kunada, ‘Sadino ti ayan ti kinasiribna?’

⁸ “Iti aldaw a panangdusak iti Edom, dadaelekto dagiti mamasirib a tattaona, ket pukawekto ti amin a kinasiribda.

⁹ Agbutengto dagiti mannakigubat a taga-Teman, ket matayto dagiti amin a soldado iti Edom.

No Apay a Madusa ti Edom

¹⁰ “Gapu ta tinakawam ken pinapataymo dagiti kakabsatmo a kaputotan ni Jacob, madadael ken maibabainkanto iti agnanayon.

¹¹ Iti aldaw a panangrebba dagiti kabusor, kadagiti ruangan dagiti kakabsatmo, nagbuybuya latta ti inaramidmo. Mayarig ti kinadakesmo iti kinadakes dagita a nangitalaw kadagiti kinabaknang ti Jerusalem, ket nagbibingayanda.

¹² Saanka koma a nagragsak gapu iti daksanggasat a napagteng dagiti kakabsatmo idiay Juda. Saanka koma a nagrag-o iti aldaw a pannakadadaelda. Saanmo koma a kinatawaan ida iti aldaw a panagrigatda.

¹³ Saanka koma a simrek iti siudad dagiti tattaok tapno agragsakka iti panagsagabada. Dimo koma sinamsam ti kinabaknangda iti aldaw ti pannakadidigrada.

¹⁴ Saanka koma a nagyan kadagiti nagsasangalan ti dalan tapno tiliwem dagiti agpanggep nga aglibas. Saanmo koma nga inyawat ida kadagiti kabusor iti aldaw a panagsagabada.

Ukomento ti Dios dagiti Nasion

¹⁵ “Asidegen ti aldaw inton siak, ni Yahweh, ukomek dagiti amin a pagilian. Edom, maaramidto met kenka ti kas iti inaramidmo. Lak-amemto met ti impalak-ammo.

¹⁶ Ininum dagiti tattaok ti napait a kopa ti pannakadusa iti nasantoan a turodko. Uminumto met dagiti amin a kabangibang a nasion iti napapait pay a kopa ti pannakadusa; arub-obendanto amin ket agpukawdanto.

Ti Panagballigi ti Israel

¹⁷ “Ngem addanto dagiti makalasat idiay Sion, ket agbalinto ti bantay a nasantoan a disso. Tagikuaento manen dagiti tattao ni Jacob ti daga a kukuada.

¹⁸ Kaslanto apuy dagiti tattao da Jacob ken Jose; dadaelendanto dagiti tattao ni Esau, ket ikisapdanto ida a kas iti panangikisap ti apuy iti garami. Awanto ti makalasat a kaputotan ni Esau. Siak, ni Yahweh, ti nagsao.

¹⁹ “Umayto dagiti agnaed iti akin-abagatan ti Juda ket sakupenda ti Edom. Dagiti adda kadagiti akinlaud nga arisadsad dagiti turod parmekendanto ti Filistia. Tagikuaento dagiti Israelita ti daga ti Efraim ken Samaria; matnagto ti Galaad iti ima dagiti tattao ti Benjamin.

²⁰ Agsublinto ti napagtalaw nga armada ti akin-amianan nga Israel, ket parmekennanto ti Fenisia agingga iti Sarepta iti akin-amianan a paset. Dagiti napagtalaw a taga-Jerusalem nga adda idiay Sardis parmekendanto dagiti ili iti akin-abagatan a paset ti Juda.

²¹ Dagiti maingel a lallaki ti Jerusalem rautendanto ti Edom ket iturayanda. Agarinto a mismo ni Yahweh.”