Numero 35 - Ti Baro a Naimbag a Damag Biblia

Dagiti Siudad a Maited kadagiti Levita

¹ Idi addada iti tanap ti Moab iti ballasiw ti Jordan iti asideg ti Jerico, kinuna ni Yahweh ken ni Moises,

² “Ibagam kadagiti Israelita nga ibingayanda dagiti Levita iti daga nga inawatda. Ikkanda ida kadagiti bukodda a siudad ken iti pagpastoranda iti asideg dagiti siudad.

³ Agnaedto dagiti Levita kadagitoy a siudad ket agpaayto kadagiti baka ken dadduma nga animalda dagiti pagpastoran.

⁴ Mangrugi dagitoy a pagpaaraban iti bakud dagiti siudad ket agpatingga iti 450 a metro iti ruar iti aglawlaw ti tunggal siudad.

⁵ Masapul a marukod tapno adda 900 a metro kuadrado a lugar iti aglawlaw ket adda ti siudad iti tengnga.

⁶ Ikkanyo dagiti Levita iti innem a siudad a pagkamangan ti tao a pumatay a dina inggagara. Malaksid kadagitoy, ikkanyo pay ida iti 42 a siudad.

⁷ Agdagup amin dagitoy a siudad iti 48 agraman dagiti pagpastoranda.

⁸ Ti kalawa ti daga iti tunggal tribu ti pakaibatayan no mano a siudad ti maited kadagiti Levita.”

Dagiti Siudad a Pagkamangan

⁹ Imbilin ni Yahweh ken ni Moises

¹⁰ nga ibagana daytoy kadagiti Israelita: “Inton makaballasiwkayon iti Karayan Jordan ket sumrekkayo iti daga ti Canaan,

¹¹ mangpilikayo kadagiti siudad a mabalin a pagkamangan ti maysa a tao a makapatay a dina inggagara.

¹² Sadiay, saanto a suroten ti kabagian ti napapatay nga agpanggep a mangbales kenkuana. Saan a mapapatay ti naidarum iti pammapatay no saan a mausig iti imatang dagiti tattao.

¹³ Mangpilikayo iti innem a siudad,

¹⁴ tallo iti daya ti Jordan ket tallo met iti daga ti Canaan.

¹⁵ Agserbinto dagitoy a siudad a pagkamangan dagiti Israelita wenno dagiti ganggannaet a temporario wenno permanente nga agnaed iti maysa nga ili. Mabalin nga agpakni ti maysa a makapapatay a dina inggagara iti maysa kadagitoy a siudad.

^16-18 “Ngem no landok wenno bato wenno kayo ti usaren ti maysa a tao a pangpatay iti sabali, maibilang a mammapatay ket masapul a mapapatay.

¹⁹ Ti kaasitgan a kabagian ti natay ti akin-akem a mangpatay iti mammapatay iti sadinoman a pakasarakanna kenkuana.

²⁰ “No adda gura ti maysa a tao iti padana a tao ket mapatayna babaen iti panangiduron wenno panangbarsak

²¹ wenno panangdanogna kenkuana maibilang a mammapatay ket masapul a mapapatay. Adda kalintegan ti kaasitgan a kabagian ti natay a mangpapatay kenkuana iti sadinoman a pakasarakanna.”

²² “Ngem ti siasinoman a makapatay a dina inggagara, babaen man iti panangiduronna iti tao a dina kagurgura wenno panangbarsakna kenkuana;

²³ wenno adda ibatona ket mapuntaanna a dina nakita ti maysa a tao a dina panggep a dangran ket dina kabusor dayta a tao,

²⁴ ipaulog ti sangkagimongan ti sentensia a mangpabor iti nakapatay.

²⁵ Saanna a baybay-an iti ima ti kabagian ti napapatay nga agpanggep a mangpatay kenkuana. Isublida ti tao iti siudad a pagkamangan a nagpaknianna ket agtalinaed sadiay agingga iti ipapatay ti Kangatoan a Padi.

²⁶ No aglibas iti siudad a nagkamanganna,

²⁷ ket patayen ti kabagian ti natay, saan a maibilang a pammapatay daytoy a panagibales.

²⁸ Masapul nga agtalinaed iti siudad a pagkamangan ti tao a nakapapatay ket sananto la mabalin ti agawid kalpasan ti ipapatay ti Kangatoan a Padi.

²⁹ Agpaay daytoy nga alagaden kadakayo ken kadagiti kaputotanyo iti sadinoman a pagnaedanyo.

³⁰ “Masapul ti dua wenno nasursurok a saksi tapno masentensiaan ken mapapatay ti naidarum iti pammapatay; saan nga umanay ti maysa a saksi tapno masentensiaan ti maysa a tao iti pammapatay.

³¹ Mapapatay ti siasinoman a makabasol iti pammapatay ket dina mabalin a subboten ti biagna babaen iti kuarta; rumbeng a mapapatay met.

³² Diyo ipalubos nga agbayad ti napan iti siudad a pagkamangan tapno mabalinna ti agawid iti balayna sakbay ti ipapatay ti Kangatoan a Padi.

³³ No aramidenyo daytoy, tulawanyo ti daga a pagnanaedanyo. Gapu iti pammapatay, matulawan ti daga ket saan a madalusan no saan a maiparukpok ti dara ti tao a pimmatay.

³⁴ Diyo tulawan ti daga a pagnanaedanyo agsipud ta siak nga Apo makipagnaedak kadagiti Israelita.”