Numero 33 - Ti Baro a Naimbag a Damag Biblia

Dagiti Nagkampoan ti Israel manipud Egipto agingga idiay Moab

¹ Nailanad iti daytoy a listaan dagiti nagan dagiti lugar a nagkampoan dagiti Israelita kalpasan ti ipapanawda idiay Egipto iti babaen ti panangipangulo da Moises ken Aaron.

² Insurat ni Moises ti nagan ti lugar a pagkampoanda, kas imbilin ni Yahweh.

³ Pimmanaw dagiti Israelita idiay Egipto iti maika-15 nga aldaw iti umuna a bulan ti tawen, ti aldaw kalpasan ti umuna a Fiesta ti Paskua. Babaen iti panangaywan ni Yahweh, pimmanawda iti siudad ti Rameses iti imatang dagiti Egipcio.

⁴ Madama idi nga itabtabonda dagiti annakda nga inauna a pinatay ni Yahweh. Iti panangaramid ni Yahweh iti daytoy, impakitana a nabilbileg ngem dagiti didiosen ti Egipto.

⁵ Pimmanaw dagiti Israelita iti Rameses ket nagkampoda idiay Succot.

⁶ Manipud iti Succot, napanda iti Etam iti igid ti let-ang.

⁷ Manipud iti Etam, nagsublida idiay Pihahirot iti dayaen ti Baal Sefon sada nagkampo iti asideg ti Migdol.

⁸ Manipud iti Pihahirot, bimmallasiwda iti Nalabaga a Baybay sada nagturong iti let-ang. Kalpasan ti tallo nga aldaw a pannagnada iti let-ang ti Etam, nagkampoda idiay Mara.

⁹ Manipud iti Mara, napanda idiay Elim a nagkampoanda agsipud ta adda 12 nga ubbog ken 70 a palma sadiay.

¹⁰ Pimmanawda iti Elim ket nagkampoda iti asideg ti Nalabaga a Baybay.

¹¹ Idiay let-ang ti Sin ti simmaruno a nagkampoanda.

¹² Kalpasanna, nagkampoda idiay Dofka

¹³ sa idiay Alus.

¹⁴ Pimmanawda idiay Alus ket napanda idiay Refidim, iti lugar nga awan danum nga inumenda.

^15-37 Manipud Refidim agingga idiay Bantay Hor, nagkampoda kadagitoy a lugar: iti Let-ang ti Sinai, Kibrot Hataava, Hazerot, Ritma, Rimmon Perez, Libna, Rissa, Kehelata, Bantay Sefer, Harada, Makelot, Tahat, Tera, Mitka, Hasmona, Moserot, Bene Jaakan, Hor Haggidgad, Jotbata, Abrona, Eziongeber, ti let-ang ti Zin (kayatna a sawen, Kades) ken Bantay Hor iti igid ti daga ti Edom.

^38-39 Kas imbilin ni Yahweh, simmang-at ni Aaron a padi iti Bantay Hor. Natay sadiay ni Aaron iti umuna nga aldaw iti maikalima a bulan iti maika-40 a tawen kalpasan ti ipapanaw dagiti Israelita idiay Egipto. Agtawen idi iti 123 ni Aaron.

⁴⁰ Nadamag ti ari ti Arad iti akin-abagatan a Canaan a sumungad dagiti Israelita.

^41-49 Manipud Bantay Hor agingga iti tanap ti Moab, nagkampo dagiti Israelita kadagitoy a lugar: Zalmona, Punon, Obot, dagiti rebba ti Abarim iti sakup ti Moab, Dibon Gad, Almon Diblataim, Bantay Abarim iti asideg ti Bantay Nebo, ken iti tanap ti Moab iti ballasiw ti Karayan Jordan a sumango iti Jerico, iti nagbaetan ti Bet Jesimot ken ti Tanap ti Acacia.

Ti Bilin ni Yahweh kadagiti Israelita sakbay a Bumallasiwda

⁵⁰ Idi addada iti tanap ti Moab iti ballasiw ti Jordan iti sangoanan ti Jerico, inted ni Yahweh ken ni Moises

⁵¹ dagitoy nga alagaden dagiti Israelita: “Inton makaballasiwkayon iti Jordan ket addakayon iti Canaan,

⁵² masapul a papanawenyo dagiti amin nga agnaed iti dayta a daga. Dadaelenyo dagiti bato ken metal a didiosenda ken amin a lugar a pagdaydayawanda.

⁵³ Sakupenyo ti daga ket agnaedkayo sadiay agsipud ta itedko dayta kadakayo.

⁵⁴ Bingbingayenyo ti daga babaen iti binnunot ket itedyo kadagiti nadumaduma a tribu ken kaputotan. Nalawa ti bingay ti dakkel a tribu ket bassit met ti bingay ti bassit a kapuonan.

⁵⁵ Ngem no diyo pagtalawen dagiti agnaed iti daga, mayarigto dagiti mabati a kas puling kadagiti matayo ken kas sisiit kadagiti bakrangyo ket gubatendakayto.

⁵⁶ Panggepko a dadaelen ida ngem no diyo pagtalawen ida, dakayo ti dadaelek a saan ket nga isuda.”