Numero 31 - Ti Baro a Naimbag a Damag Biblia

Gubaten ti Israel ti Midian

¹ Kinuna ni Yahweh ken ni Moises,

² “Sakbay a matayka, balsem pay nga umuna dagiti Midianita gapu iti inaramidda kadagiti Israelita.”

³ Ngarud, imbaga ni Moises kadagiti tattao, “Agsaganakayo a makigubat; rautenyo dagiti Midianita ket balsenyo ida gapu iti inaramidda iti Apo.

⁴ Tunggal tribu ti Israel, mangibaon iti 1,000 a makigubat.”

⁵ Napili ngarud ti 1,000 a lallaki iti tunggal tribu. Agdagup iti 12,000 dagiti napili a makigubat.

⁶ Imbaon ni Moises ida a makigubat iti babaen ni Finees nga anak ni Eleazar a padi; inkuyogna dagiti nasagradoan nga alikamen ken dagiti trumpeta a pagpakdaar.

⁷ Rinautda ti Midian kas imbilin ni Yahweh ken ni Moises. Pinatayda amin a lallaki

⁸ agraman dagiti lima nga ari ti Midian: Evi, Rekem, Zur, Hur ken Reba. Pinapatayda met ni Balaam nga anak ni Beor.

⁹ Impanaw dagiti Israelita dagiti babbai ti Midian agraman dagiti annakda. Sinamsamda dagiti baka ken animal dagiti Midianita ken amin a sanikuada

¹⁰ sada pinuoran amin a siudad ken kampoda.

¹¹ Inyawidda dagiti amin a sinamsamda, dagiti balud ken dagiti animal ket

¹² impanda dagitoy kada Moises, Eleazar ken iti sangkagimongan ti Israel a nagkampo kadagiti tanap ti Moab iti ballasiw ti Jordan a sumango iti Jerico.

Agsubli ti Armada

¹³ Idi sumangpet ti armada, sinabat ida da Moises, Eleazar ken amin a papangulo iti sangkagimongan iti ruar ti kampo.

¹⁴ Kasta unay ti pungtot ni Moises kadagiti pangulo dagiti bunggoy dagiti rinibu ken dagiti bunggoy dagiti ginasut a soldado a nagsubli manipud iti paggugubatan.

¹⁵ Sinaludsodna kadakuada, “Apay a diyo pinapatay dagiti amin a babbai?

¹⁶ Diyo kadi ammo ti inaramid dagiti babbai a namati kadagiti bilin ni Balaam? Insungsongda dagiti tattao a mangtallikud iti Apo idi addada idiay Peor. Isuda ti nakaigapuan ti panagdissuor ti didigra kadagiti tattao ti Apo.

¹⁷ Ngarud, patayenyo dagiti amin nga agtutubo a lallaki ken amin a babbai a nakikaidda iti lalaki.

¹⁸ Ngem yawidyo dagiti amin a babbai a di pay nakikaidda iti lalaki.

¹⁹ Ita, dakayo nga adda pinatayna wenno nakasagid iti bangkay, agyankayo iti ruar ti kampo iti las-ud ti pito nga aldaw. Iti maikatlo ken iti maika-7 nga aldaw, annongenyo ti seremonia ti pannakadalusyo ken dagiti babbai nga innalayo.

²⁰ Annongenyo met ti seremonia ti pannakadalus dagiti amin a kawes ken amin a naaramid iti lalat, dutdot ti kalding wenno kayo.”

²¹ Kinuna ni Eleazar a padi kadagiti naggapu iti paggugubatan, “Dagitoy dagiti alagaden nga inted ti Apo ken ni Moises.

^22-23 Masapul a magugoran dagiti amin nga alikamen a saan a mauram a kas iti balitok, pirak, bronse, landok, lata wenno buli babaen iti panaglasatda iti apuy. Maugasan dagiti amin a dadduma nga alikamen iti danum a nairanta a maaramat iti pannakadalus.

²⁴ Iti maika-7 nga aldaw, labaanyo dagiti pagan-anayyo; kalpasanna, maibilangkayonton a nadalus ket mabalinyonton ti sumrek iti kampo.”

Ti Pannakabingay dagiti Nasamsam iti Gubat

²⁵ Kinuna ni Yahweh ken ni Moises,

²⁶ “Bilangenyo ken ni Eleazar a padi ti amin a nasamsam, agraman dagiti balud ken dagiti animal. Tumulong kadakayo dagiti pangulo ti sangkagimongan.

²⁷ Guduaenyo dagiti amin a nasamsam. Kukua dagiti napan nakigubat ti maysa a kagudua ket kukua dagiti amin a tattao ti maysa a kagudua.

²⁸ Iti pannakabagi dagiti soldado, mangilasinkayo iti agpaay iti Apo: maysa iti tunggal 500 a balud, kasta met kadagiti baka, asno, karnero ken kalding.

²⁹ Itedyo dagitoy ken ni Eleazar a padi a naisangsangayan a sagut iti Apo.

³⁰ Iti bingay dagiti tattao, mangalakayo iti maysa iti tunggal 50 a balud, kasta met kadagiti baka, asno, karnero ken kalding. Itedyo dagitoy kadagiti Levita nga agay-aywan iti Tolda ti Dios.”

³¹ Tinungpal da Moises ken Eleazar ti bilin ni Yahweh.

^32-35 Daytoy ti listaan ti sinamsam dagiti soldado, malaksid laeng dagiti innalada nga agpaay kadakuada: 675,000 a karnero ken kalding, 72,000 a baka, 61,000 nga asno ken 32,000 a babbalasang.

^36-40 Agdagup iti 337,500 a karnero ken kalding ti bingay dagiti soldado ket 675 ti daton ken ni Yahweh; 36,000 a baka ti bingay dagiti soldado ket 72 ti daton ken ni Yahweh; 30,500 nga asno ti bingay dagiti soldado ket 61 ti daton ken ni Yahweh; 16,000 a babbalasang ti bingay dagiti soldado ket 32 ti daton ken ni Yahweh.

⁴¹ Ngarud, inted ni Moises ken ni Eleazar dagiti buis a naisangsangayan a pannakabagi ni Yahweh kas imbilin ni Yahweh.

^42-46 Agdagup iti 337,500 a karnero ken kalding, 36,000 a baka, 30,500 nga asno ken 16,000 a babbalasang ti bingay ti sangkagimongan. Kasta met ti bingay dagiti soldado.

⁴⁷ Iti bingay dagiti tattao, nangala ni Moises iti maysa iti tunggal 50 a balud ken animal ket kas imbilin ni Yahweh, intedna ida kadagiti Levita nga agay-aywan iti Tolda ti Dios.

⁴⁸ Napan ken ni Moises dagiti ofisiales a nangipangulo iti armada

⁴⁹ ket imbagada, “Apo, binilangmi dagiti soldado nga impanguloanmi ket awan ti uray maysa kadakuada ti naksay.

⁵⁰ Intugotmi dagiti sinamsammi nga alahas a balitok, kas iti putipot ti takiag, pulseras, singsing, aritos ken kuentas nga innalami. Idatagmi dagitoy iti Apo a kas bayad ti biagmi tapno salaknibannakami.”

⁵¹ Inawat da Moises ken Eleazar amin dagitoy nga alahas a balitok.

⁵² Agdagup iti nasurok a 200 a kilo ti inted dagiti ofisiales.

⁵³ Saan nga inted dagiti soldado dagiti sinamsamda.

⁵⁴ Impan da Moises ken Eleazar dagiti balitok iti Tolda ti Dios a daton dagiti Israelita ken ni Yahweh.