Numero 29 - Ti Baro a Naimbag a Damag Biblia

Dagiti Daton iti Fiesta ti Baro a Tawen

¹ Iti umuna nga aldaw ti maika-7 a bulan, aguummongkayo nga agdaydayaw ket awan ti agtrabaho. Iti dayta nga aldaw, mapuyot dagiti trumpeta.

² Mangidatagkayo iti daton a mapuoran a nabanglo iti Apo: maysa a bumaro a baka, maysa a kalakian a karnero ken pito a kalakian nga urbon ti karnero a maysa ti tawenda ken awan depektoda.

³ Pakuyoganyo daytoy iti daton a makan a naaramid iti arina a nagamay iti lana ti olibo: tallo a kilo iti tunggal baka, dua a kilo iti tunggal karnero

⁴ ken maysa a kilo iti tunggal urbon ti karnero.

⁵ Mangidatagkayo met iti kalakian a kalding a daton a mangpunas iti basol. Kastoy ti seremonia ti pannakadalus dagiti tattao.

⁶ Idatagyo daytoy agraman ti inaldaw a daton a mapuoran iti umuna nga aldaw ti bulan agraman ti daton a makan. Idatagyo met ti inaldaw a daton a mapuoran agraman ti daton a makan ken ti daton nga arak. Mapuoran daytoy a mangted iti nabanglo nga ayamuom iti Apo.

Dagiti Daton iti Aldaw a Pannakapakawan ti Basol

⁷ Aguummongkayo nga agdaydayaw iti maika-10 nga aldaw iti maika-7 a bulan; dikay mangan ken agtrabaho.

⁸ Mangidatagkayo iti daton a mapuoran a nabanglo iti Apo. Adtoy dagiti idatonyo: maysa a bumaro a baka, maysa a kalakian a karnero ken pito nga urbon a karnero a maysa ti tawenda ken awan depektoda.

⁹ Pakuyoganyo dagitoy iti daton a makan a naaramid iti arina a nagamay iti lana ti olibo: tallo a kilo iti tunggal baka, dua a kilo iti tunggal karnero

¹⁰ ken maysa a kilo iti tunggal urbon ti karnero.

¹¹ Mangidatagkayo met iti kalakian a kalding a daton a mangpunas iti basol, malaksid laeng iti daton a kalding iti seremonia ti pannakadalus dagiti tattao ken dagiti inaldaw a daton agraman ti daton a makan ken ti daton nga arak.

Dagiti Daton iti Fiesta dagiti Abong-abong

¹² Aguummongkayo nga agdaydayaw iti maika-15 nga aldaw iti maika-7 a bulan. Pito nga aldaw a rambakanyo daytoy a fiesta a pammadayaw iti Apo ket dikay agtrabaho.

¹³ Iti daytoy umuna nga aldaw, mangidatagkayo iti daton a makan a nabanglo iti Apo: 13 a bumaro a baka, dua a kalakian a karnero ken 14 nga urbon a karnero a maysa ti tawenda ken awan ti depektoda.

¹⁴ Pakuyoganyo dagitoy iti daton a makan a nagamay iti lana ti olibo: tallo a kilo nga arina iti tunggal baka, dua a kilo iti tunggal karnero

¹⁵ ken maysa a kilo iti tunggal urbon ti karnero, agraman dagiti naituding a daton nga arak.

¹⁶ Mangidatagkayo met iti kalakian a kalding a daton a mangpunas iti basol. Idatagyo dagitoy a mainayon iti inaldaw a daton a mapuoran agraman naituding a daton a makan ken ti daton nga arak.

¹⁷ Iti maikadua nga aldaw, mangidatagkayo iti 12 a bumaro a baka, dua a kalakian a karnero ken 14 nga urbon ti karnero a maysa ti tawenda ken awan ti depektoda.

^18-19 Ipakuyogyo nga idaton dagiti amin a daton a naituding a maidatag iti umuna nga aldaw.

²⁰ Iti maikatlo nga aldaw, mangidatagkayo iti 11 a bumaro a baka, dua a kalakian a karnero ken 14 nga urbon ti karnero a maysa ti tawenda ken awan ti depektoda.

^21-22 Ipakuyogyo nga idaton dagiti amin a daton a naituding a maidatag iti umuna nga aldaw.

²³ Iti maikapat nga aldaw, mangidatagkayo iti sangapulo a bumaro a baka, dua a kalakian a karnero, ken 14 nga urbon ti karnero a maysa ti tawenda ken awan ti depektoda.

^24-25 Ipakuyogyo dagiti amin a daton a naituding ti umuna nga aldaw.

²⁶ Iti maikalima nga aldaw, mangidatagkayo iti siam a bumaro a baka, dua a kalakian a karnero ken 14 nga urbon ti karnero a maysa ti tawenda ken awan ti depektoda.

^27-28 Ipakuyogyo nga idaton dagiti amin a daton a naituding a maidatag iti umuna nga aldaw.

²⁹ Iti maika-6 nga aldaw, mangidatagkayo iti walo a bumaro a baka, dua a kalakian a karnero ken 14 nga urbon ti karnero a maysa ti tawenda ken awan ti depektoda.

^30-31 Ipakuyogyo nga idaton dagiti amin a daton a naituding a maidatag iti umuna nga aldaw.

³² Iti maika-7 nga aldaw, mangidatagkayo iti pito a bumaro a baka, dua a kalakian a karnero ken 14 nga urbon ti karnero a maysa ti tawenda ken awan ti pakapilawanda.

^33-34 Ipakuyogyo nga idaton dagiti amin a daton a naituding a maidatag iti umuna nga aldaw.

³⁵ Iti maika-8 nga aldaw, aguummongkayo nga agdaydayaw ket dikay agtrabaho.

³⁶ Mangidatagkayo iti daton a mapuoran a kas daton a makan a nabanglo iti Apo: maysa a bumaro a baka, maysa a kalakian a karnero ken pito nga urbon ti karnero a maysa ti tawenda ken awan ti depektoda.

^37-38 Ipakuyogyo dagiti amin a daton a naituding iti umuna nga aldaw.

³⁹ Dagitoy dagiti annurotenyo kadagiti daton a mapuoran, daton a makan, daton nga arak ken daton a pakikappia nga idatagyo iti Apo tunggal rambakanyo dagiti naituding a fiesta. Mairaman ditoy dagiti daton a pangtungpal iti kariyo wenno kas daton nga agubbog iti nakemyo.

⁴⁰ Imbaga ni Moises kadagiti Israelita ti amin nga imbilin kenkuana ti Apo.