Numero 25 - Ti Baro a Naimbag a Damag Biblia

Dagiti Israelita idiay Peor

¹ Bayat ti panagkampo dagiti Israelita idiay Settim, nakikakaiddada kadagiti babbai a Moabita.

² Masansan nga awisen dagitoy a babai dagiti Israelita a dumar-ay kadagiti fiesta a pagidataganda kadagiti datonda iti didiosen ti Moab. Nakipangpangan dagiti Israelita kadagiti taraon, ket nagdaydayawda ken ni didiosen

³ a Baal idiay Peor. Nakapungtot ti Apo kadakuada,

⁴ bket kinunana ken ni Moises, “Ummongem dagiti amin a papangulo ti Israel ket papatayem ida iti imatang dagiti tattao tapno agbaaw ti pungtotko iti Israel.”

⁵ Kinuna ni Moises kadagiti ofisiales, “Papatayenyo dagiti amin a tattao iti tribuyo a nagdaydayaw ken ni Baal iti Peor.”

⁶ Bayat ti panagdungdung-aw ni Moises ken ti sangkagimongan iti ruangan ti Tolda ti Dios, dimteng ti maysa nga Israelita. Adda kaduana a babai a Midianita ket iti imatangda amin, simrekda a dua iti tolda ti lalaki.

⁷ Idi nakita daytoy ni Finees nga anak ni Eleazar ken apoko ni Aaron a padi, pimmanaw iti tallaong. Nangala iti pika,

⁸ ket sinurotna ti lalaki ken ti babai iti tolda a simrekanda. Dinuyokna ida a dua ket nagsalput ti pika iti bagida. Gapu iti inaramid ni Finees, nagsardeng ti didigra a mangdaddadael kadagiti Israelita.

⁹ Nupay kasta, aganayen a 24,000 a tattao ti natay.

¹⁰ Kinuna ni Yahweh ken ni Moises,

¹¹ “Gapu iti inaramid ni Finees, awanen ti pungtotko kadagiti Israelita. Dina impalubos nga agdaydayaw dagiti tattao iti sabali a didiosen—siak laeng ti pagdaydayawanda. Daytoy ti gapuna a diak dinadael ida gapu iti pungtotko.

¹² Ibagam ngarud kenkuana a makitulagak kenkuana iti tulag a mataginayon iti amin a tiempo.

¹³ Isu ken dagiti kaputotanna ti maisaad a padi iti agnanayon, agsipud ta dina impalubos nga adda sabali a didiosen a pagdaydayawan dagiti tattao, ket inyegna ti pannakapakawan ti basol dagiti tattao.”

¹⁴ Zimri ti nagan ti Israelita a napapatay a nairaman iti babai a Midianita. Isu ti anak ni Salu a pangulo ti maysa a familia ti tribu ti Simeon.

¹⁵ Cozbi ti nagan ti Midianita. Isu ti anak ni Zur a pangulo met ti maysa a kapuonan iti Midian.

¹⁶ Binilin ni Yahweh ni Moises,

¹⁷ “Rautenyo dagiti Midianita ket papatayenyo ida

¹⁸ gapu iti panangallilawda kadakayo idiay Peor ken gapu ken ni Cozbi a napapatay idi inyegko ti didigra sadiay.”