Numero 13 - Ti Baro a Naimbag a Damag Biblia

Dagiti Napan Nangsiim iti Canaan

¹ Kinuna ni Yahweh ken ni Moises,

² “Mangpilika iti pangulo iti tunggal maysa kadagiti 12 a tribu, ket ibaonmo ida a mangkita iti daga ti Canaan nga itedko kadagiti Israelita.”

^3-15 Nagtungpal ni Moises ket manipud iti let-ang ti Paran, imbaonna dagiti sumaganad: Tribu Pangulo Ruben Sammua nga anak ni Zakkur Simeon Safat nga anak ni Hori Juda Caleb nga anak ni Jefone Issacar Igal nga anak ni Jose Efraim Oseas nga anak ni Nun Benjamin Palti nga anak ni Rafu Zabulon Gaddiel nga anak ni Sodi Manases Gaddi nga anak ni Susi Dan Ammiel nga anak ni Gemalli Aser Setur nga anak ni Micael Neftali Nabi nga anak ni Vopsi Gad Geuel nga anak ni Maki

Tribu Pangulo

¹⁶ Dagitoy dagiti imbaon ni Moises a mangsiim iti daga. Binaliwan ni Moises ti nagan ni Oseas nga anak ni Nun; Josue ti impanaganna kenkuana.

¹⁷ Kinuna ni Moises kadakuada idi ibaonna ida, “Agpa-amianankayo manipud ditoy ket magnakayo iti akin-abagatan a paset ti daga ti Canaan ket kalpasanna, agpatuloykayo iti katurturodan a pagilian.

¹⁸ Kitaenyo no ania a kita ti daga dayta, no mano dagiti tattao nga agnaed sadiay ken no kasano ti kapigsada.

¹⁹ Kitaenyo no nasayaat wenno saan ti daga ken no nabakudan wenno saan dagiti siudad a pagnaedanda.

²⁰ Kitaenyo no nadam-eg ti daga wenno saan, no kabakiran wenno saan. Inton agsublikayo, mangisangpetkayo kadagiti bunga ti mula sadiay.” (Panawen idi ti panagluom dagiti ubas.)

²¹ Iti kasta, nagpa-amianan dagiti lallaki ket dinakiwasda ti daga manipud let-ang ti Zin iti abagatan agingga idiay Rehob iti asideg ti Bessang Hamat iti amianan.

²² Immuna a napanda iti akin-abagatan a paset ti daga ket dimtengda idiay Hebron a pagnaedan dagiti familia da Ahiman, Sesai ken Talmai, dagiti kaputotan dagiti higante a managan Anakim. (Pito a tawen a nabangon ti Hebron sakbay ti pannakabangon ti Zoan idiay Egipto.)

²³ Dimtengda iti Tanap ti Escol, a nangalaanda iti inyawidda a sanga ti ubas a sangaraay ti bungana. Kasta unay ti dagsenna, ket kasapulan ti dua a tao a mangassiw. Nangyawidda pay kadagiti bunga ti granada ken igos. (

²⁴ Napanaganan dayta a lugar iti Tanap ti Escol gapu iti sanga ti sangaraay nga ubas a sinep-ak dagiti Israelita sadiay.)

²⁵ Kalpasan ti 40 nga aldaw a panagsukimat dagiti naibaon, nagawidda

²⁶ idiay Kades iti let-ang ti Paran. Dimmatagda kada Moises, Aaron ken ti sangkagimongan ti Israel. Impakaammoda ti natakuatanda ket impakitada dagiti bungbunga nga insangpetda.

²⁷ Kinunada ken ni Moises, “Sinukimatmi ti daga, ket nasarakanmi a nabaknang ken nadam-eg. Adtoy ti sumagmamano kadagiti bunga.

²⁸ Ngem napipigsa dagiti tattao nga agnanaed sadiay. Dadakkel dagiti siudadda ket nalagda ti sarikedkedda. Nakitami pay sadiay dagiti kaputotan dagiti higante.

²⁹ Agnaed dagiti Amalekita iti akin-abagatan a paset ti daga, dagiti Heteo, Jebuseo ken dagiti Amorreo iti katurturodan a pagilian, ket dagiti Cananeo iti igid ti Baybay Mediterranean ken iti igid ti Karayan Jordan.”

³⁰ Pinagulimek ni Caleb dagiti tattao nga agrekreklamo ken ni Moises. Kinunana, “Masapul a dumaruptayon, ket tagikuaentayo ti daga. Kabaelantayo a sakupen ta napigsatayo.”

³¹ Ngem kinuna dagiti lallaki a kinadua ni Caleb, “Saan! Ditay kabaelan ti dumarup. Nabilbileg ngem datayo dagiti tattao sadiay.”

³² Iti kasta, saan a pudno ti impadamagda kadagiti Israelita maipapan iti daga a napanda sinukimat. Kinunada, “Saan nga umdas ti maapit iti dayta a daga a taraon dagiti tattao nga agnanaed sadiay. Natatayag amin a tattao a nakitami sadiay.

³³ Nakitami pay dagiti higante a kaputotan ni Anak. Babassit a dudon ti kayariganmi kadakuada, ket nalabit a kasta met ti panangkitada kadakami.”