Nahum 1 - Ti Baro a Naimbag a Damag Biblia

¹ Daytoy ti mensahe maipapan iti Nineve, ti pakasaritaan ti parmata ni Nahum a taga-Elkos.

Ti Pungtot ni Yahweh iti Nineve

² Ni Yahweh managimon a Dios ken managibales; dusaenna dagiti bumusor kenkuana. Iti pungtotna, balsenna ida.

³ Saan a nalaka nga agpungtot ni Yahweh, ngem dakkel ti pannakabalinna, ket dusaenna a dusaen dagiti nakabasol. Iti pagnaan ni Yahweh, tumaud dagiti bagio. Dagiti ulep ti pannakatapok a patauden dagiti sakana.

⁴ Bilinenna ti baybay ket agmaga; pagmagaenna ti amin a karayan. Malaylay dagiti talon ti Basan, matay amin a mula iti Bantay Carmel ken magango dagiti sabong iti Bantay Libano.

⁵ Agkintayeg dagiti bantay iti imatang ni Yahweh; marunaw dagiti turod iti sangoananna. Agginggined ti daga no agparang ni Yahweh; agtigerger ti lubong ken dagiti amin a tattao.

⁶ No agpungtot ni Yahweh, siasino ti makalasat? Siasino ti makalisi iti gumilgil-ayab nga ungetna? Idissuorna ti umap-apuy a pungtotna, matumtumek dagiti bato iti imatangna.

⁷ Naimbag ni Yahweh; salaknibanna dagiti tattaona iti tiempo ti riribuk; aywananna dagiti agkamang kenkuana.

⁸ Mamimpinsan a dadaelenna dagiti kabusorna, kas iti panangdadael ti nadawel a layus; ipanna dagiti bumusor kenkuana iti pakatayanda.

⁹ Ania ti isiksikatyo nga aramiden iti Apo? Gibusannakayto amin; awan ti makapidua a mangbusor kenkuana.

¹⁰ Mauramkayto agingga a dumapukayo, dakayo a mammartek, a kas iti siitsiitan a mula ken garami a nagango.

¹¹ Nineve, adda timmaud kenka a tao a pasig a dakes ti panggepna, ket insikatna ti Apo.

¹² Kastoy ti kuna ti Apo kadagiti tattaona nga Israelita: “Uray no napigsa ken adu dagiti taga-Asiria, madadael ken mapukawdanto. Pinagsagabakayo, dakayo a tattaok, ngem dikayton pagsagabaen.

¹³ Gibusakon ti pannakabalin ti Asiria kadakayo, ket pugsatek dagiti kawar a nangbalud kadakayo.”

¹⁴ Kastoy ti intuding ti Apo maipapan iti Asiria: “Malipatandanton a mamimpinsan. Dadaelekto dagiti imahen nga adda kadagiti templo dagiti didiosenda. Mangisagsaganaak iti tanem dagiti taga-Asiria—saanda a maikari nga agbiag.”

¹⁵ Kitaenyo, adda babaonen a magmagna kadagiti tapaw dagiti bantay a mangyeg iti naimbag a damag! Umay tapno ipakaammona ti panagballigi. Dakayo a tattao ti Juda, selebraranyo dagiti naituding a fiestayo, ket itedyo iti Dios ti sinapataanyo nga ited kenkuana. Saanton a rauten dagiti managdakdakes ti dagayo. Nadadaeldan a namimpinsan!