Mikias 4 - Ti Baro a Naimbag a Damag Biblia

Ti Sangalubongan a Kappia iti Panagturay ni Yahweh

¹ Iti masakbayan, agbalinto a kangatoan a bantay ti bantay nga ayan ti Templo ni Yahweh. Agdadarisonto dagiti adu a nasion a mapan sadiay.

² Adunto a tao ti mapan ket kunada, “Sumang-attayo iti bantay ti Apo; intay iti Templo ti Dios ti Israel. Ammoentayo ti kayatna nga aramidentayo; surotentayo ti dalan a pinilina. Manipud Sion agsao kadagiti tattaona; aggapu idiay Jerusalem ti pannursurona.”

³ Pagkakappiaennanto dagiti agsusuppiat a nasion, dagiti nabibileg a pagilian nga adda iti asideg wenno iti adayo. Pandayendanto nga arado dagiti kampilanda, ket aramidendanto a kumpay dagiti gayangda. Saanton nga aggugubat dagiti pagilian; didanton agsagana a makigubat.

⁴ Agbiagto a sitatalna ti tunggal maysa iti kaubasanna ken kadagiti kayona nga igos, ket awanto ti pagbutnganna. Inkari daytoy ti Apo a Mannakabalin-amin.

⁵ Agdaydayaw ken agtulnog ti tunggal nasion iti diosna, ngem agdaydayaw ken agtulnogtayo iti Apo a Diostayo iti agnanayon nga awan inggana.

Agsubli dagiti Israelita

⁶ Kuna ti Apo, “Umayen ti tiempo nga ummongek dagiti tattao a naipan iti sabali a daga, isuda a nagsagaba iti pannusak.

⁷ Awan ti kabaelanda ket adayoda iti dagada, ngem ipamuspusak a mangabaroanan manen dagiti natda agingga nga agbalinda a nabileg a nasion. Iturayakto ida idiay Bantay Sion manipud iti dayta a tiempo agingga iti agnanayon.”

⁸ Sika, Jerusalem, nga ayan ti Dios a mangbambantay kadagiti tattaona, sikanto manen ti kangrunaan a siudad ti pagarian a sigud a pagturayam.

⁹ Apay nga aganug-ogka? Apay a kaska la agpasikal a makarikna iti ut-ot? Gapu kadi ta awan ti arim ken natayen dagiti mamalbalakad kenka?

¹⁰ Agtiritirkayo iti ut-ot ket agasugkayo, dakayo a tattao ti Jerusalem, a kas iti babai a dandani agpasngay. Ita, masapul a panawanyo ti siudad ket inkayo agnaed iti away. Masapul nga inkayo idiay Babilonia. Sadiayto ti pakaispalanyo, ket isalakannakayto ti Apo kadagiti kabusoryo.

¹¹ Adu a nasion ti nagmaymaysa a mangdarup kenka. Kunada, “Masapul a madadael ti Jerusalem! Kitaentayo ti pannakarebba daytoy a siudad!”

¹² Ngem saan nga ammo dagitoy a nasion ti pampanunoten ti Apo. Dida ammo a panggepna nga ummongen ida tapno madusada, kas iti pannakaummong ti mairik a trigo.

¹³ Kuna ti Apo, “Tattao ti Jerusalem, inkayo dusaen dagiti kabusoryo! Pagbalinenkayo a kas iti napigsa a toro a baka a limmandok ti sarana ken bimronze ti kukona. Ibaddebaddekyo dagiti adu a nasion agingga a marumrumekda. Idatagyonto kaniak dagiti inagawda a kinabaknang; wen, siak nga Apo ti entero a lubong.”