Malakias 4 - Ti Baro a Naimbag a Damag Biblia

Ti Umay nga Aldaw ni Yahweh

¹ Kuna ni Yahweh a Mannakabalin-amin, “Umayen ti aldaw a mauram dagiti amin a natangsit ken managdakdakes a tattao. Iti dayta nga aldaw, mauramdanto a kasla arutang ket pulos nga awanto ti mabati kadakuada.

² Ngem kadakayo nga agtungpal kaniak, kaslanto init a lumgak ti pannakabalinko a mangisalakan ken mangyeg iti pannakapaimbag. Rumuarkayto a siraragsak a kas kadagiti urbon ti baka a naipupok.

³ Inton aldaw a panagtignayko, parmekenyonto dagiti managdakdakes ket arigdanto iti tapok a baddebaddekenyo.

⁴ “Laglagipenyo dagiti pannursuro ni Moises nga adipenko. Diyo liplipatan dagiti linteg ken bilin nga intedko kenkuana idiay Bantay Horeb a tungpalen dagiti amin nga Israelita.

⁵ “Ngem sakbay a dumteng ti naindaklan ken nakaal-alliaw nga aldaw ni Yahweh, ibaonkonto ni profeta Elias kadakayo.

⁶ Pagkakappiaennanto dagiti amma ken dagiti annak, ta no saan, siak ti umay ket dadaelek ti pagilianyo.”