Malakias 2 - Ti Baro a Naimbag a Damag Biblia

¹ Kuna ti Apo a Mannakabalin-amin kadagiti papadi, “Agpaay daytoy a bilin kadakayo:

² Masapul a dayawendak babaen iti aramidyo. No didak ipangag ket diyo ipapuso ti ibagak, ilunodkayo. Ilunodko dagiti amin nga awatenyo a pagbiagyo. Kinapudnona, inlunodkon dagitoy gapu ta yaleng-alengyo dagiti bilinko.

³ Dusaekto dagiti kaputotanyo. Idumudomkayto kadagiti takki dagiti animal a datonyo. Ipurruakkayto nga iraman kadakuada.

⁴ Iti kasta, maammoanyonto nga impaulogko daytoy a bilin kadakayo tapno saan a mawaswas ti nagtutulaganmi kadagiti papadi a kaputotan ni Levi.

⁵ “Iti tulagmi, inkarik nga ikkan ida iti biag ken napintas a kasasaad tapno agraemda kaniak! Kadagidi nga aldaw, pudno a nagraem ken nagbutengda kaniak.

⁶ Ti naimbag ti insuroda a saan ketdi a ti dakes. Nagbiagda a mayannatup iti pagayatak. Saan la a naimbag ti inaramidda ngem tinulonganda pay ti adu tapno isardengda ti panagbasolda.

⁷ Pagrebbengan dagiti papadi nga isuro ti pudno a pannakaammo iti Dios. Gapu ta isuda ti babaonen ni Yahweh a Mannakabalin-amin, rumbeng nga isuda ti papanan dagiti tattao tapno masursuroda ti pagayatak.

⁸ “Ngem dakayo a papadi, simmiasikayo iti nalinteg a dalan. Adu ti nagbasol gapu iti pannursuroyo. Tinallikudanyo ti nagtutulagantayo.

⁹ Balsenkayo ngarud ket pagbalinenkayo a dakes iti imatang dagiti Israelita tapno laisendakayo, gapu ta diyo suroten ti pammagbagak ken saanyo a pagpapadaen ti amin a tao iti panangisuroyo iti pagayatak.”

Ti Saan a Kinapudno dagiti Tattao iti Dios

¹⁰ Saan kadi a maymaysa ti amatayo? Saan kadi nga isu met la a Dios ti namarsua kadatayo? Apay ngarud a saantayo a tungpalen ti karitayo iti tunggal maysa? Apay a laisentayo ti nagtulagan ti Dios ken dagiti kapuonantayo?

¹¹ Tinallikudan dagiti tattao ti Juda ti karida iti Dios ket nakaal-alliaw ti inaramidda idiay Jerusalem ken iti entero a pagilian. Tinulawanda ti Templo nga ipatpateg ti Apo. Nangasawa dagiti lallaki kadagiti babbai nga agdaydayaw kadagiti ganggannaet a didiosen.

¹² Dadaelen koma ti Apo ti siasinoman nga agaramid iti daytoy. Mailaksid koma ti kasta a tao iti pagiliantayo, kadagiti tattao nga agidatag iti daton iti Apo a Mannakabalin-amin.

¹³ Ar-aramidenyo pay daytoy: Agsangit ken agdung-awkayo iti altar ti Apo ket lapunosenyo iti lua gapu ta dina awatenen dagiti idatonyo kenkuana.

¹⁴ Saludsodenyo no apay a dina awatenen dagiti datonyo. Gapu ta ammona a saan a tinungpal ti tunggal maysa ti karina iti babai nga inasawana idi agtutubo pay. Kinataktakunaynayyo ida ket diyo tinungpal ti kariyo kadakuada uray no insapatayo iti Dios nga agtalinaedkayo a napudno kadakuada.

¹⁵ Saannakayo kadi a pinagmaymaysa ti Dios iti bagi ken iti espiritu? Ania ti panggep ti Dios iti panagmaymaysana kadakayo? Tapno maaddaankayo iti annak a pudno a tattao ti Dios! Agalluadkayo ngarud: Diyo liputan ti babai nga inasawayo idi agtutubokayo.

¹⁶ “Kagurak ti panagsina ti agassawa,” kuna ti Apo a Dios ti Israel. “Diak kayat nga isina ti lalaki ti asawana. Kinaranggas nga aramid daytoy iti asawa. Agannadkayo ngarud ket diyo paglikudan ti kariyo nga agtalinaed a napudno iti asawayo.”

Asidegen ti Aldaw a Panangukom

¹⁷ Nauman ti Apo kadagiti sasaoyo. Ngem saludsodenyo, “Ania ti nakaumaanna kadakami?” Babaen iti panagkunayo a naimbag iti imatang ti Apo a Mannakabalin-amin dagiti amin nga agaramid iti dakes. Kinapudnona, kunayo a maragsakan kadakuada. Wenno babaen iti panagsaludsodyo, “Sadino ti ayan ti Dios a makunkuna a nalinteg?”