San Lucas 23 - Ti Baro a Naimbag a Damag Biblia

Mayawat ni Jesus ken ni Pilato

¹ Timmakder dagiti amin a kamkameng ti Sanhedrin ket impanda ni Jesus ken ni Pilato.

² Rinugianda ti nagiparang kadagiti pammabasolda kenkuana. “Natiliwanmi daytoy a tao a mangal-allilaw kadagiti kailianmi,” kinunada. “Iparparitna ti panagbayad iti buis iti Emperador. Kunkunana pay nga isu ti Cristo a maysa nga ari.”

³ “Sika kadi ti Ari dagiti Judio?” sinaludsod ni Pilato. “Nasaomon,” insungbat ni Jesus.

⁴ Ket kinuna ni Pilato kadagiti panguloen a papadi ken kadagiti tattao, “Awan masarakak a pakaigapuan iti pannakadusa daytoy a tao.”

⁵ Ngem inyad-addada ti nagkuna: “Babaen iti pannursurona, sugsoganna dagiti tattao a mangriribuk iti entero a Judea. Inrugina idiay Galilea, ket adda ditoyen.”

Ni Jesus iti Saklang ni Herodes

⁶ “Taga-Galilea kadi daytoy a tao?” sinaludsod ni Pilato idi mangngegna daytoy.

⁷ Ket naammoanna a naggapu ni Jesus iti lugar nga iturayan ni Herodes. Imbaonna ngarud ken ni Herodes nga adda idi idiay Jerusalem.

⁸ Nabayagen a kayat ni Herodes a makitana ni Jesus. Maragsakan unay idi maidatag kenkuana ta nadamdamagnan ti maipapan kenkuana ket ninamnamana ti makakita iti milagro nga iparang ni Jesus.

⁹ Adu ti sinaludsod ni Herodes, ngem pulos a saan a simmungbat ni Jesus.

¹⁰ Adda a nakatakder sadiay dagiti panguloen a papadi ken mamaestro iti Linteg ket indatagda dagiti agkakadagsen a pammabasolda ken ni Jesus.

¹¹ Pinagang-angawan ken linalais ni Herodes ken dagiti soldado. Kinawesanda ni Jesus iti narangrang a lupot sada pinaisubli ken ni Pilato.

¹² Manipud iti dayta nga aldaw, aggayyemen da Herodes ken ni Pilato, numan pay aggin-ginnurada idi.

Maikeddeng a Matay ni Jesus

¹³ Pinaayaban ni Pilato dagiti panguloen a papadi, dagiti agtuturay ken dagiti tattao.

¹⁴ Kinunana kadakuada, “Insaklangyo kaniak daytoy a tao ket imbagayo nga al-allilawenna dagiti tattao. Inusigko iti imatangyo ket awan nasarakak nga inaramidna kadagiti ipabpabasolyo kenkuana.

¹⁵ Uray ni Herodes, awan nasarakanna, isut' gapuna a pinaisublina kadatayo. Awan naaramid daytoy a tao a pakaigapuan ti pannakapapatayna.

¹⁶ Ngarud, pasaplitko laeng sakonto palubosan.”

¹⁸ Ngem sangsangkamaysa dagiti tattao a nangipukkaw, “Papapataymo! Ni Barrabas ti kayatmi a wayawayaam!” (

¹⁹ Naibalud ni Barrabas gapu iti riribuk a naaramid iti siudad, ken gapu ta pimmatay.)

²⁰ Kayat ni Pilato a wayawayaan ni Jesus, isut' gapuna a kinasaona manen dagiti tattao.

²¹ Ngem impukkawda, “Pailansam iti krus! Pailansam iti krus!”

²² Pinitlo ni Pilato ti nagkuna kadakuada, “Ania kadi ti basolna? Awan nasarakak nga inaramidna a pakaigapuan ti pannakapapatayna. Pasaplitko laeng sakonto palubosan.”

²³ Ngem inyad-adda dagiti tattao ti nangyikkis a mailansa ni Jesus iti krus ket iti kamaudianna, naipangag ti dawatda.

²⁴ Inkeddeng ni Pilato ti sentensia, kas kiddawda.

²⁵ Winayawayaanna ti lalaki a kayatda, ti naibalud gapu iti riribuk ken pammapatay, ket inyawatna ni Jesus kadakuada tapno aramidenda ti kaykayatda.

Mailansa ni Jesus iti Krus

²⁶ Impanaw dagiti soldado ni Jesus. Iti dalan, nasabetda ti maysa a lalaki nga agnagan Simon a taga-Cirene a naggapu iti away, ket agturong iti siudad. Tiniliwda ket impabaklayda kenkuana ti krus sada impasaruno ken ni Jesus.

²⁷ Adu a tattao ti simmurot ken ni Jesus. Sumagmamano kadakuada ti babbai. Sangsangitan ken dungdung-awanda ni Jesus.

²⁸ Tinaliawna ida ket kinunana, “Babbai a taga-Jerusalem, didak sangsangitan! Dagiti bagbagiyo ken dagiti annakyo ketdi ti sangitanyo!

²⁹ Ta umasidegen dagiti aldaw a panagkunanto dagiti tat-tao, ‘Nagasat dagiti babbai a di nagan-anak, di nagsikog ken di nagpasuso!’

³⁰ Daytanto ti tiempo a panagkuna dagiti tattao kadagiti bambantay, ‘Tupakandakami!’ ken kadagiti turturod, ‘Gaburandakami!’

³¹ No kastoy ti maaramid no naata ti kayo, anianto ketdin no nagango?”

³² Adda dua a kriminal nga inkuyogda a mapapatay met a kagiddan ken ni Jesus.

³³ Idi dimtengda iti lugar a managan “Bangabanga,” inlansada ni Jesus iti krus. Inlansada met dagiti dua a kriminal, maysa iti makannawan ket ti sabali iti makannigid ni Jesus.

³⁴ “Ama,” kinuna ni Jesus, “pakawanem ida ta dida ammo ti ar-aramidenda.” Nagbibingayan dagiti soldado dagiti pagan-anay ni Jesus babaen iti panagbibinnunotda.

³⁵ Nagtatakder sadiay dagiti tattao nga agbuybuya idinto a linalais dagiti panguloen a Judio a kunkunada, “Insalakanna dagiti dadduma. Isalakanna man ngarud ti bagina no isu ti Cristo a pinili ti Dios!”

³⁶ Linalais met dagiti soldado. Immasidegda ken ni Jesus sada inyawatan iti suka.

³⁷ “Isalakanmo ta bagim, no sika ti Ari dagiti Judio!” kinunada.

³⁸ Adda kastoy a naisurat iti ngatoen ni Jesus: “Daytoy ti Ari dagiti Judio.”

³⁹ Pinabpabainan ti maysa kadagiti kriminal a nailansa. “Saan kadi a sika ti Cristo?” kinunana. “Isalakanmo ngarud ta bagim ket isalakannakami met!”

⁴⁰ Ngem binabalaw ti kaduana a kriminal. “Dika aya agbuteng iti Dios?” kinunana. “Agpapadatayo amin a madusdusa.

⁴¹ Rebbengna nga agsagabata gapu iti inaramidta. Ngem daytoy a tao, awan dakes nga inaramidna.”

⁴² Ket kinunana ken ni Jesus, “Laglagipennak, Jesus, inton mapanka iti pagariam.”

⁴³ Kinuna ni Jesus kenkuana, “Ibagak kenka daytoy: Ita nga aldaw, makipagyankanto kaniak idiay Paraiso.”

Ti Ipapatay ni Jesus

⁴⁴ Dandani tengnga ti aldaw idi agsipnget iti entero a daga ket nagpaut agingga iti alas tres iti malem.

⁴⁵ Napigis a naggudua ti kurtina a naibengbeng iti Templo.

⁴⁶ Nagpukkaw ni Jesus iti napigsa: “Ama, kadagita imam yawatko ti espirituk!” Apaman a nasaona daytoy, nauyosen ti biagna.

⁴⁷ Idi makita ti kapitan dagiti soldado ti napasamak, nagdaydayaw iti Dios. “Pudno nga awan basol daytoy a tao!” kinunana.

⁴⁸ Nakita dagiti tattao a napan nagbuya ti napasamak ket nagawidda amin a mangdandanog iti barukongda a mangipakita iti panagladingitda.

⁴⁹ Iti adayo bassit, nakatakder dagiti amin a gagayyem ni Jesus ken dagiti babbai a simmursurot kenkuana manipud Galilea. Nakitada dagitoy a napasamak.

Ti Pannakaitanem ni Jesus

^50-52 Adda lalaki a napan ken ni Pilato tapno dawatenna ti bangkay ni Jesus. Isu ni Jose a naggapu iti ili ti Arimatea idiay Judea. Nalinteg ken natakneng a tao ni Jose ken paspasungadenna ti idadateng ti Pagarian ti Dios. Nupay maysa a kameng ti Sanhedrin, saan nga immanamong iti inkeddeng ken inaramidda.

⁵³ Kalpasan ti panangibabana iti bangkay, binungonna iti linen a lupot sana inkabil iti tanem a naikungkong iti bato ken di pay nausar.

⁵⁴ Aldaw idi a Panagsagana, ket dandani mangrugin ti Aldaw a Panaginana.

⁵⁵ Simmurot ken ni Jose dagiti babbai a kimmuykuyog ken ni Jesus manipud Galilea. Nakitada ti tanem ken ti pannakaikabil ti bangkayna.

⁵⁶ Kalpasanna, nagawidda ket insaganada dagiti bangbanglo ken sapsapo nga agpaay iti bangkay. Ket iti Aldaw a Panaginana, naginanada kas sagudayen ti Linteg.