San Lucas 19 - Ti Baro a Naimbag a Damag Biblia

Ni Jesus ken ni Zakeo

¹ Lumaslasat idi ni Jesus idiay Jerico.

² Adda baknang sadiay nga agnagan Zakeo. Panguloen dagiti agsingsingir iti buis.

³ Kayatna a kitaen no siasino ni Jesus, ngem gapu ta pandek ken adu ti tattao, dina makita ni Jesus.

⁴ Iti kasta, nagtaray ket inunaanna dagiti tattao sa immuli iti maysa a kayo a sikamoro tapno makitana ni Jesus a lumabas sadiay.

⁵ Timmangad ni Jesus idi mabatoganna ni Zakeo. “Zakeo,” kinunana, “darasem ti umulog, ta umayak idiay balaymo ita nga aldaw.”

⁶ Dinagdagus ni Zakeo ti immulog ket siraragsak a nangawat ken ni Jesus.

⁷ Nagtanabutob amin a nakakita iti daytoy. “Napan pinasangaili daytoy a tao iti balay ti maysa a managbasol!” kinunada.

⁸ Timmakder ni Zakeo ket kinunana iti Apo, “Denggem, Apo! Itedko kadagiti napanglaw ti kagudua ti sanikuak. No adda sinaurko, isublik kenkuana iti mamimpat a kaadu ti innalak.”

⁹ Kinuna ni Jesus kenkuana, “Ita nga aldaw, dimteng ti pannakaisalakan iti daytoy a balay, ta anak met ni Abraham daytoy a tao.

¹⁰ Immay ti Anak ti Tao a mangbirok ken mangisalakan iti napukaw.”

Ti Pangngarig maipapan kadagiti Kuarta a Balitok

¹¹ Dimngeg dagiti tattao iti imbaga ni Jesus. Gapu ta asidegen ni Jesus idiay Jerusalem, impagarupda a dandani agparangen ti Pagarian ti Dios. Isut' gapuna a sinarita ni Jesus daytoy a pangngarig:

¹² “Adda idi lalaki a nangato ti saadna a napan iti adayo a pagilian tapno makoronaan nga ari, sa met la agsubli.

¹³ Sakbay ti ipapanawna, inayabanna ti sangapulo kadagiti adipenna ket inikkanna ti tunggal maysa iti kuarta a balitok. Imbagana kadakuada, ‘Pagsapulyo daytoy bayat ti kaawanko.’

¹⁴ “Ngem gurguraen dagiti kailianna, isut' gapuna a nangibaonda kadagiti tattao a sumurot kenkuana nga agkuna, ‘Dimi kayat daytoy a tao nga agari kadakami.’

¹⁵ “Naisaad nga ari ket idi nagsubli, dagus a pinaayabanna dagiti adipen nga inikkanna iti kuarta tapno ammoenna no mano ti nasapulanda.

¹⁶ “Dimmatag ti umuna nga adipen. ‘Apo,’ kinunana, ‘nakaganansia iti sangapulo a bagi ti balitok daydi intedmo kaniak.’

¹⁷ “‘Nasayaat ti inaramidmo,’ kinuna ti ari. ‘Naimbagka nga adipen. Agsipud ta mapagtalkanka kadagiti babassit a bambanag, pagturayenkanto iti sangapulo a siudad.’

¹⁸ “Dimmatag met ti maikadua nga adipen. ‘Apo,’ kinunana, ‘nakaganansia iti lima a kuarta a balitok daydi intedmo kaniak.’

¹⁹ “Kinuna kenkuana ti ari, ‘Pagturayenkanto iti lima a siudad.’

²⁰ “Dimmatag met ti sabali pay nga adipen. ‘Apo,’ kinunana, ‘adtoy daydi kuartam. Binungonko iti panio ket indulinko.

²¹ Nagbutengak ngamin kenka, ta ammok a naungetka. Alaem ti uray saanmo a kukua, ket apitem ti uray dimo immula.’

²² “‘Dakeska nga adipen!’ kinuna ti ari. ‘Dusaenka gapu kadagiti balikasmo met laeng. Ammom la ngaruden a naungetak, ket alaek ti uray saanko a kukua ken agapitak iti diak immula.

²³ Apay ngarud a dimo indeposito iti banko ti kuartak tapno apaman a sumangpetak, isublim koma kaniak agraman interesna?’

²⁴ “Iti kasta, kinuna ti ari kadagiti agtatakder sadiay, ‘Alaenyo ti kuarta kenkuana ket itedyo iti addaan iti sangapulo a kuarta.’

²⁵ “Kinunada iti ari, ‘Apo, adda la ngarud sangapulo a kuartanan!’

²⁶ “‘Ibagak kadakayo,’ insungbat ti ari, ‘ti addaan, maikkanto pay iti ad-adu. Ngem iti awanan, uray ti sangkabassit nga adda kenkuana, maikkatto pay.

²⁷ No maipapan kadagiti kabusorko a di nangayat a siak ti arida, yegyo ida ditoy ket patayenyo ida iti sangoanak.’”

Ti Sibaballigi nga Iseserrek ni Jesus idiay Jerusalem

²⁸ Kalpasan ti panangisao ni Jesus iti daytoy, nagtuloy a nagturong idiay Jerusalem.

²⁹ Idi asidegen iti Betfage ken Betania, iti Bantay Olivo, pinaunana ti dua nga adalan.

³⁰ “Inkay iti masungad a barrio,” imbilinna kadakuada. “Apaman a sumrekkayo, masarakanyonto ti sigagalut nga urbon ti asno a di pay nasaksakayan. Warwaranyo ket yegyo ditoy.

³¹ No adda agsaludsod kadakayo no apay a warwaranyo ti urbon, ibagayo kenkuana a masapul ti Apo.”

³² Napanda ngarud ket nasarakanda amin kas imbaga ni Jesus kadakuada.

³³ Idi warwarwaranda ti urbon, kinuna kadakuada dagiti akinkukua, “Apay a warwaranyo?”

³⁴ “Masapul ti Apo,” insungbatda.

³⁵ Impanda ken ni Jesus ti urbon. Inap-apanda ti urbon kadagiti kagayda sada tinulongan ni Jesus a simmakay.

³⁶ Idi nakasakayen ni Jesus, inyaplag dagiti tattao dagiti kagayda iti dalan.

³⁷ Idi sumungsungad ni Jesus idiay Jerusalem, iti dalan a sumalog iti Bantay Olivo, nagdaydayaw iti Dios dagiti amin nga adalanna iti napigsa a timek gapu kadagiti naindaklan a bambanag a nakitada.

³⁸ “Bendisionan koma ti Dios ti Ari nga umay iti nagan ti Apo,” ipukpukkawda. “Kappia sadi langit ken gloria iti Dios!”

³⁹ “Maestro, bilinem dagiti adalam nga agulimekda!” kinuna ti sumagmamano a Fariseo nga adda iti ummong dagiti tattao.

⁴⁰ “Ibagak kadakayo a no agulimekda, mangrugi nga agpukkaw dagiti batbato,” insungbat ni Jesus.

Sangitan ni Jesus ti Jerusalem

⁴¹ Umas-asideg ni Jesus iti Jerusalem ket nakitana ti siudad, sinangitanna a

⁴² kunana: “No ammom la koma ita nga aldaw ti masapul tapno maaddaanka iti kappia! Ngem ita dimo makita.

⁴³ Dumtengto dagiti aldaw a bangenandaka dagiti kabusormo. Lakuben ken darupendakanto iti amin a suli.

⁴⁴ Dadaelendakanto a mamimpinsan agraman dagiti amin a tattaom iti uneg ti padermo. Awanto ti bato nga ibatida iti sigud a yanna, ta dimo binigbig ti tiempo a yaay ti Dios tapno isalakannaka!”

Mapan ni Jesus iti Templo

⁴⁵ Simrek ni Jesus iti Templo ket pinaruarna dagiti agtagtagilako.

⁴⁶ Kinunana kadakuada, “Nailanad iti Nasantoan a Surat a kuna ti Dios, ‘Managanto ti balayko iti balay a pagkararagan.’ Ngem pinagbalinyo metten a rukib dagiti mannanakaw!”

⁴⁷ Inaldaw a nangisuro ni Jesus iti Templo. Kayat a patayen dagiti panguloen a papadi, dagiti mamaestro iti Linteg, ken dagiti pangulo dagiti tattao.

⁴⁸ Ngem awan masarakanda a panggapuanda a mangibanag iti panggepda gapu ta napasnek dagiti amin a tattao a dumngeg kadagiti saona.