Levitico 6 - Ti Baro a Naimbag a Damag Biblia

¹ Inted ni Yahweh dagiti sumaganad nga alagaden ken ni Moises.

² Agbasol iti Apo ti siasinoman a di mangisubli iti naipadulin kenkuana wenno mangsaur iti padana a tao wenno agtakaw,

³ wenno mangyulbod a dina ammo ti maipapan iti aniaman a napukaw, ket isapatana a dina nasarakan.

^4-5 No makabasol ti maysa a tao iti uray ania kadagitoy, masapul a bayadanna ti aniaman nga innalana iti sinasaur. Iti aldaw a naduktalan a nakabasol, masapul a bayadanna iti akinkukua ti gatad ti sinaurna. Manayonan pay iti apagkalima ti presio ti innalana.

⁶ Ipanna iti padi ti kalakian a karnero wenno kalding nga awan depektona a kas datonna iti Apo a pagsupapak iti basolna. Magatadan ti datonna segun ti naituyang a pagtimbangan.

⁷ Idatag ti padi ti daton ket mapakawan dayta a tao iti aniaman a nagbasolanna.

Dagiti Daton a Mapuoran

⁸ Binilin ni Yahweh ni Moises

⁹ nga itedna ken ni Aaron ken kadagiti annakna dagiti alagaden kadagiti daton a mapuoran. Masapul a maikabil ti daton a mapuoran iti rabaw ti altar ket bay-an nga agpatpatnag sadiay nga adda sumsumged nga apuy.

¹⁰ Agaruat ti padi iti linen a kagay ken linen a sapin ket ikkatenna dagiti nalanit a dapu a nabati iti altar sana ikabil iti sikigan ti altar.

¹¹ Sukatanna ti pagan-anayna sana ipan dagiti dapu iti lugar a maibilang a nadalus iti ruar ti kampo.

¹² Masapul a sisesegged a kanayon ti apuy iti altar, ket di baybay-an a maiddep. Binigat a sungrodan ti padi, urnosenna dagiti daton iti rabawna, ket puoranna ti taba ti daton a pakikappia.

¹³ Masapul a sisesegged a kanayon ti apuy iti altar, ket di baybay-an a maiddep.

Dagiti Daton a Makan

¹⁴ Dagitoy ti alagaden kadagiti daton a makan. Maysa kadagiti padi nga annak ni Aaron ti mangidatag iti Apo iti daton a makan iti sangoanan ti altar.

¹⁵ Mangrakem iti arina ken ikkanna iti lana ken insenso sana puoran iti altar a mangipakita a naidatag amin iti Apo. Nabanglo ken makaay-ayo daytoy a daton iti Apo.

^16-17 Kanen ti padi ti amin a natda. Maaramid a tinapay nga awan lebadurana ket makan iti nasantoan a lugar, iti paraangan ti Tolda ti Dios. Inted ti Apo daytoy kadakuada, kas bingayda kadagiti daton a makan. Sagrado unay daytoy a daton a kas iti daton gapu iti basol ken kadagiti daton a pagsupapak iti biddut.

¹⁸ Mabalin ti siasinoman kadagiti lallaki a kaputotan ni Aaron ti mangan iti daytoy a daton kas agnanayon a pannakabingayda iti makan a naidaton iti Apo. Madangran ti siasinoman a mangsagid iti daytoy a daton, ta adda bileg ti kinasagradona.

¹⁹ Inted ni Yahweh ken ni Moises dagiti sumaganad nga alagaden

²⁰ iti pannakaorden ti padi a nagtaud iti kaputotan ni Aaron. Iti aldaw a pannakaordenna, mangidatag iti sangakilo nga arina a kas datonna iti Apo. (Kastoy met ti kaadu ti daton a makan a maidatag iti inaldaw.) Kagudua ti idatagna iti bigat ket kagudua met iti rabii.

²¹ Masapul a magamay iti lana ket maluto iti pariok, santo mapispisi ket maidatag a daton a makan kas nabanglo a daton iti Apo.

²² Iti amin a tiempo iti masakbayan, masapul nga idatag daytoy a daton ti tunggal kaputotan ni Aaron nga agserbi a kas Kangatoan a Padi. Masapul a mapuoran a mamimpinsan a kas daton iti Apo.

²³ Saan a mabalin a kanen ti makan nga idaton ti padi; mapuoran amin.

Dagiti Daton gapu iti Basol

²⁴ Imbilin ni Yahweh ken ni Moises

²⁵ nga itedna ken ni Aaron ken kadagiti annakna dagiti sumaganad nga alagaden iti panagidatag kadagiti daton gapu iti basol. Masapul a maparti ti animal a maidaton gapu iti basol iti akin-amianan a paset ti altar, iti pagpartian kadagiti daton a mapuoran. Nasantoan unay daytoy a daton.

²⁶ Iti nasantoan a lugar, iti paraangan ti Tolda ti Dios ti panganan ti padi iti karne ti animal nga indatonna.

²⁷ Adda pannakabalin ti kinasanto ti karne ti animal ket madangran ti aniaman a maisagid wenno siasinoman a mangsagid. No adda lupot a maparsiakan iti dara ti animal, masapul a malabaan iti sagrado a lugar.

²⁸ Masapul a mabuong met ti banga a pakalutoan ti karne. No bronse a banga ti pakalutoanna, masapul a marasrasan ken mabuggoan iti danum.

²⁹ Mabalin ti siasinoman a lalaki iti familia dagiti papadi a mangan iti daytoy a daton; sagrado unay daytoy a daton.

³⁰ Ngem no adda dara a maipan iti Tolda ti Dios tapno mausar iti seremonia ti pannakaikkat ti basol, saan a mabalin a sidaen ti animal; masapul a mapuoran.