Levitico 5 - Ti Baro a Naimbag a Damag Biblia

Dadduma a Basol a Pakasapulan iti Daton

¹ Masapul a maidatag ti daton gapu kadagitoy a basbasol: No maayaban ti maysa iti pangukoman tapno saksianna ti maysa a pasamak a nakita wenno ammona ngem dina kayat ti agsao, masapul nga ikarona ti basolna.

² No adda makasagid iti aniaman a maibilang a narugit, kas iti natay nga animal, maibilang a narugit ken makabasol apaman a mabigbigna ti inaramidna.

³ No adda makasagid iti aniaman a maibilang a narugit a nagtaud iti tao, uray ania, makabasol apaman a mabigbigna ti inaramidna.

⁴ No barengbareng ti panagsapata ti maysa a tao—agaramid man iti dakes wenno naimbag—makabasol apaman a mabigbigna ti inaramidna.

⁵ No nakabasol ti maysa a tao, masapul nga ipudnona ti basolna,

⁶ ket kas multana mangidaton iti Apo iti kabaian a karnero wenno kalding. Ti padi ti mangidatag iti daton gapu iti basol dayta a tao.

⁷ No saan a kabaelan ti maysa a tao ti mangidaton iti karnero wenno kalding, mangidaton iti dua a kalapati wenno dua a sibong ti kalapati a kas multana—maysa ti daton gapu iti basol, ket ti maysa daton a mapuoran.

⁸ Idaton nga umuna ti padi ti daton gapu iti basol. Rungdoenna ti tengnged ti tumatayab ngem dina isinsina ti ulona.

⁹ Iwarisna ti dadduma a dara daytoy iti sikigan ti altar idinto nga ibuyatna ti natda iti puon ti altar. Daytoy ti daton a mangikkat iti basol.

¹⁰ Kalpasanna, idatagna ti maikadua a tumatayab a kas daton a mapuoran kas mayannurot kadagiti alagaden. Kastoy ti pannakaidatag ti daton gapu ti basol tapno mapakawan dayta a tao.

¹¹ No saan a kabaelan ti maysa a tao ti mangidaton iti dua a kalapati wenno dua a sibong ti kalapati, mangidatag iti sangakilo nga arina a kas daton gapu iti basolna. Dina ikkan iti lana ti olibo wenno insenso, agsipud ta daytoy ti daton gapu iti basol.

¹² Ipanna daytoy iti padi a mangala met iti sangarakem a mangipakita a naidatag amin iti Apo. Puoranna ti rinakemna iti altar a kas daton a mangikkat iti basol.

¹³ Kastoy ti pannakaidatag iti daton gapu iti basol tapno mapakawan dayta a tao. Kas ti daton a makan, kukua ti padi ti natda nga arina.

Dagiti Daton a Pagsupapak kadagiti Biddut

¹⁴ Inted ni Yahweh dagitoy nga alagaden ken ni Moises.

¹⁵ No adda agbasol a dina ammo gapu iti dina pannangted kadagiti pagbayad a nasagradoan iti Apo, mangidatag iti kalakian a karnero wenno kalding nga awan depektona, a datonna a pagsupapak iti Apo. Magatadan ti animal segun ti naituyang a pagtimbangan.

¹⁶ Masapul a bayadanna ti saanna a naited ket nayonanna pay iti apagkalima. Itedna iti padi a mangidatag iti animal a daton gapu iti basol tapno mapakawan dayta a tao.

¹⁷ No adda mangsalungasing iti aniaman a bilin ti Apo, uray dina ammo a kasta ti inaramidna, makabasol ket masapul nga agmulta.

¹⁸ Masapul a mangidaton iti kalakian a karnero wenno kalakian a kalding nga awan depektona. Magatadan ti animal segun ti naituyang a pagtimbangan. Ti padi ti mangidatag iti daton tapno mapakawan ti nagbasol.

¹⁹ Daytoy ti daton nga agpaay iti basol gapu ta nagbasol dayta a tao iti Apo.