Levitico 23 - Ti Baro a Naimbag a Damag Biblia

Dagiti Nasantoan a Fiesta

¹ Inted ni Yahweh ken ni Moises

² dagitoy nga alagaden maipapan kadagiti nasantoan a fiesta a panaguummong dagiti Israelita tapno agdaydayawda.

³ Innem nga aldaw nga agtrabahokayo ngem laglagipenyo nga iti maikapito ket Aldaw a Panaginana. Dikay agtrabaho iti dayta nga aldaw ngem aguummongkayo nga agdaydayaw. Kukua ti Apo ti Aldaw a Panaginana uray sadino ti pagnaedanyo.

⁴ Ipakaammoyo dagitoy sumaganad a fiesta tapno mangilinda iti naituding a tiempo.

Fiesta ti Paskua ken ti Tinapay nga Awan Lebadurana

⁵ Mangrugi a marambakan ti Fiesta ti Paskua a pammadayaw iti Apo iti ilelennek ti init iti maika-14 nga aldaw iti umuna a bulan.

⁶ Iti maika-15 nga aldaw, mangrugi met ti Fiesta ti Tinapay nga Awan Lebadurana ket pito nga aldaw a masapul a dikay mangan iti nalebaduraan a tinapay.

⁷ Iti umuna nga aldaw, masapul nga aguummongkayo nga agdaydayaw ket dikay agtrabaho.

⁸ Pito nga aldaw nga idatagyo dagiti daton a mapuoran iti Apo. Iti maikapito nga aldaw, aguummongkayo manen nga agdaydayaw ket dikay agtrabaho.

^9-10 Inton dumtengkayo iti daga nga ited ti Apo kadakayo ket agapitkayo, ipanyo ti umuna a binettek iti padi.

¹¹ Agpaay daytoy a naisangsangayan a daton iti Apo tapno maawatkayo ket idatag ti padi iti sumaruno nga aldaw kalpasan ti Aldaw a Panaginana.

¹² Iti aldaw a panangidatagyo iti daton a trigo, mangidatonkayo met iti urbon ti karnero a daton a mapuoran. Kalakian daytoy, maysa ti tawenna ken awan depektona.

¹³ Pakuyoganyo iti dua a kilo nga arina a nagamay iti lana ti olibo a daton a naayamuom iti Apo. Pakuyoganyo met iti maysa a litro nga arak.

¹⁴ Dikay mangan iti kaan-ani a trigo, naata man, iniruban wenno naaramid a tinapay no diyo pay naidaton iti Dios. Annuroten dagiti amin a kaputotanyo daytoy nga alagaden iti amin a tiempo iti masakbayan.

Ti Fiesta ti Apit

¹⁵ Palabsenyo ti pito a lawas manipud iti aldaw kalpasan ti Aldaw a Panaginana sayo idatag ti binettek a trigo a kas datonyo iti Apo.

¹⁶ Iti maika-50 nga aldaw, ti aldaw kalpasan ti maikapito nga Aldaw a Panaginana, idatagyo iti Apo ti sabali a baro a daton a makan.

¹⁷ Mangyeg ti tunggal familia iti dua a tinapay nga idatonda iti Apo a kas naisangsangayan a sagut. Maaramid ti tunggal tinapay iti dua a kilo ti arina nga adda lebadurana ket maidatag iti Apo a kas daton a nagtaud iti umuna nga apit a trigo.

¹⁸ Malaksid iti tinapay, mangidatag pay ti entero a gimong iti pito nga urbon ti karnero nga agtawen iti maysa, maysa a toro a baka ken dua a kalding nga awan ti depektona. Maidatagda a daton a mapuoran iti Apo, agraman ti daton a makan ken ti daton a mainum. Nabanglo daytoy a daton iti Apo.

¹⁹ Mangidatagkayo met iti kalakian a kalding a daton gapu iti basol ken dua a kalakian nga urbon ti karnero a maysa ti tawenna a daton a pakikappia.

²⁰ Idaton ti padi ti tinapay agraman dagiti dua a karnero a naisangsangayan a sagut iti Apo para kadagiti papadi. Nasantoan dagitoy a daton.

²¹ Iti dayta nga aldaw, dikay agtrabaho no di ket aguummongkayo nga agdaydayaw. Masapul nga annuroten a kankanayon dagiti kaputotanyo daytoy nga alagaden iti sadinoman a lugar a pagnaedanda.

²² Inton aganikayo, diyo gapasen dagiti adda iti igid dagiti talonyo wenno anien dagiti dawa a nalabsanyo; ibatiyo nga agpaay kadagiti napanglaw ken ganggannaet. Ti Apo ti Diosyo.

Ti Fiesta ti Baro a Tawen

^23-24 Iti umuna nga aldaw iti maikapito a bulan, ngilinenyo ti naisangsangayan nga aldaw a panaginana ket aguummongkayo nga agdaydayaw inton aguni dagiti trumpeta.

²⁵ Dikay agtrabaho iti uray ania ket mangidatagkayo iti daton a mapuoran iti Apo.

Ti Aldaw a Pannakapakawan ti Basol

^26-27 Iti maika-10 nga aldaw iti maikapito a bulan, maaramid ti tinawen a seremonia a mangikkat kadagiti basol dagiti tattao. Iti dayta nga aldaw, dikay mangan iti uray ania; aguummongkayo nga agdaydayaw ket mangidatagkayo iti daton a mapuoran iti Apo.

²⁸ Dikay agtrabaho gapu ta dayta nga aldaw ti panangaramid iti seremonia a panangikkat iti basol.

²⁹ Saan a maibilang a kas maysa kadagiti tattao ti Dios ti mangan iti aniaman iti dayta nga aldaw.

³⁰ Ket no adda agtrabaho iti dayta nga aldaw, ti Apo a mismo ti mangpatay kenkuana.

³¹ Agpaay daytoy nga alagaden kadagiti amin a kaputotanyo uray sadino ti pagnaedanda.

³² Manipud iti ilelennek ti init iti maikasiam nga aldaw iti bulan agingga iti ilelennek iti maika-10 nga aldaw, ngilinenyo daytoy a naisangsangayan nga aldaw ti panaginana ket dikay mangan iti uray ania.

Ti Fiesta dagiti Abong-abong

^33-34 Mangrugi ti Fiesta dagiti Abong-abong iti maika-15 nga aldaw iti maikapito a bulan. Agpaut daytoy iti pito nga aldaw.

³⁵ Iti umuna nga aldaw, aguummongkayo nga agdaydayaw ket dikay agtrabaho iti uray ania.

³⁶ Iti las-ud ti pito nga aldaw, inaldaw a mangidatagkayo iti daton a mapuoran. Iti maikawalo nga aldaw, aguummongkayo manen nga agdaydayaw ket mangidatagkay iti daton a mapuoran. Aldaw daytoy ti panagdaydayaw ket dikay agtrabaho iti uray ania. (

³⁷ Dagitoy dagiti fiesta nga intuding ti Apo a panaguummongyo. Kadagita nga aldaw, agidatagkayo kadagiti daton a makan, daton a mapuoran, daton a trigo, daton nga arak ken sakrifisio kas naituding iti inaldaw.

³⁸ Ngilinenyo dagitoy a fiesta a mainayon iti gagangay nga aldaw a Panaginana. Mainayon met dagitoy a daton kadagiti sigud nga isagsagutyo, dagiti datonyo a pagtungpal iti kari, ken dagiti daton nga agtaud iti nakemyo nga ited iti Apo.)

³⁹ Inton nalpasen ti panagapityo, pito nga aldaw a rambakanyo daytoy a fiesta a mangrugi iti maika-15 nga aldaw iti maikapito a bulan. Naisangsangayan nga aldaw a panaginana ti umuna ken maikawalo nga aldaw.

⁴⁰ Iti dayta nga aldaw, mangalakayo kadagiti kasayaatan a bunga dagiti kayo, kadagiti sanga ti palma ken narukbos a kayo ket rambakanyo ti fiesta a pammadayaw iti Apo a Diosyo.

⁴¹ Pito nga aldaw nga agrambakkayo. Masapul a kankanayon nga annuroten dagiti kaputotanyo daytoy nga alagaden.

⁴² Pitonto nga aldaw nga agnaed dagiti Israelita kadagiti abong-abong

⁴³ tapno maammoan dagiti kaputotanyo a nagnaed dagiti Israelita kadagiti nanumo nga abong-abong idi inruar ida ti Apo idiay Egipto. Isu ti Apo a Diosyo.

⁴⁴ Kastoy ti pannangted ni Moises kadagiti Israelita kadagiti alagaden iti pannakangilin dagiti fiesta a pammadayaw ken ni Yahweh.