Levitico 21 - Ti Baro a Naimbag a Damag Biblia

Ti Kinasanto dagiti Papadi

¹ Kinuna ni Yahweh ken ni Moises nga ibagana daytoy kadagiti papadi nga annak ni Aaron, “Saan a tulawan ti padi ti bagina babaen iti pannakipartisiparna iti seremonia ti pumpon,

² malaksid no asideg a kabagianna ti natay: ina wenno amana, anak, kabsat a lalaki

³ wenno di naasawaan a kabsatna a babai a makipagnaed iti balayna.

⁴ Saanna a tulawan ti bagina iti ipapatay ti siasinoman a kabagianna iti matrimonio.

⁵ “Maiparit a pultakan ti padi ti ulona wenno putdan ti barbasna, wenno sugaten ti bagina a mangipakita iti panagladingitna iti natay.

⁶ Masapul a nasantoan ti padi ket dina ibabain ti naganko. Agidatag kadagiti daton a mapuoran, ket masapul nga agbalin a nasantoan.

⁷ Saan a mapalubosan a mangasawa iti balangkantis a babai wenno iti saan a birhen wenno iti naisina a babai agsipud ta nasantoan ti padi.

⁸ Masapul nga ibilang dagiti tattao a nasantoan ti padi, agsipud ta agidatag kaniak kadagiti daton a mapuoran. Siak ni Yahweh. Nasantoanak, ket pasantoek dagiti tattaok.

⁹ No agbalin a balangkantis ti anak ti padi, ibabainna ti amana. Masapul a mapuoran agingga a matay.

¹⁰ “No ti Nangato a Padi a nabukbokan ti ulona iti lana ket nakonsagrar nga agaruat kadagiti sagrado a kawes dagiti papadi, saanna a baybay-an a wakray ti buokna wenno ray-aben ti pagan-anayna a mangipakita ti panagladingitna.

^11-12 Naidaton nga agserbi kaniak ket masapul a pagtalinaedenna ti bagina a nadalus ken dina tulawan ti nasagradoan a Tolda babaen iti panangpanawna ket sumrek iti balay nga ayan ti bangkay, uray no bangkay ti ama wenno inana.

¹³ Masapul a balasang a dipay natulawan ti asawaenna

¹⁴ a saan ketdi a balo wenno nakisina iti asawana wenno nagbalangkantis. Masapul a katribuanna ti asawaenna.

¹⁵ Ta no saan, maibilang a narugit dagiti annakna a rumbeng koma a nasantoan. Siak ni Yahweh a nangilasin kenkuana nga agserbi a Kangatoan a Padi.”

¹⁶ Imbilin ni Yahweh ken ni Moises

¹⁷ nga ibagana daytoy ken ni Aaron, “Saan a mabalin ti siasinoman a kaputotam nga adda depekto ti bagina a mangidatag kaniak iti daton a mapuoran. Agpaay daytoy nga alagaden iti amin a tiempo iti masakbayan.

¹⁸ Maiparit nga agidaton dagitoy a tattao nga adda depekto ti bagina: bulsek, pilay, nadadael ti forma ti bagina wenno adda kurang ti bagina;

¹⁹ paralitiko ti ima wenno sakana;

²⁰ kubbo wenno pandek; adda depekto ti matana wenno addaan iti sakit ti kudil; ken nakapon.

²¹ Awan ti kaputotan ni Aaron a padi nga adda depekto ti bagina ti mapalubosan a mangidatag kaniak iti daton a mapuoran.

²² Mabalin ti kasta a tao ti mangan iti taraon a naidaton kaniak, ti nasantoan a daton a mapuoran ken ti kasasantoan a daton,

²³ ngem gapu ta adda depekto ti bagina, saan a mapalubosan nga umasideg iti nasagradoan a kurtina wenno mapan iti altar. Saanna a tulawan dagitoy nasantoan a banag gapu ta siak ni Yahweh a mamagbalin kadagitoy a nasantoan.”

²⁴ Dagitoy ngarud ti imbaga ni Moises ken ni Aaron ken dagiti annakna ken amin nga Israelita.