Levitico 19 - Ti Baro a Naimbag a Damag Biblia

Dagiti Bilbilin maipapan iti Kinasanto ken Kinalinteg

¹ Binilin ni Yahweh ni Moises

² nga ibagana daytoy iti sangkagimongan ti Israel, “Agbalinkayo a nasantoan agsipud ta nasantoan ni Yahweh a Diosyo.

³ Masapul a raemen ti tunggal maysa dagiti nagannak kenkuana ket ngilinenyo ti Aldaw a Panaginana a kas imbilinko. Siak ni Yahweh a Diosyo.

⁴ “Dikay agrukbab kadagiti didiosen wenno agaramid iti imahen a pagrukbabanyo. Siak ni Yahweh a Diosyo.

⁵ “No agpartikayo iti animal nga idatonyo a pakikappia, annurotenyo dagiti alagaden nga intedko kadakayo tapno awatek ti daton.

⁶ Masapul a maibus amin a karne iti aldaw a pannakaidaton, ti animal wenno iti sumuno nga aldaw. Mapuoran ti karne a matda iti maikatlo nga aldaw

⁷ agsipud ta maibilang a narugit. No adda agsida iti karne a matda, diak awaten ti daton.

⁸ Agbasol ti siasinoman nga agsida iti kasta ta tinulawanna ti nasantoan a banag a naidaton kaniak; rumbeng a mailaksid kadagiti tattaok.

⁹ “No aganikayo, diyo anien dagiti adda iti igid ken dagiti nalabsanyo.

¹⁰ Diyo sublienen a burasen dagiti ubas a nalabsanyo wenno piduten dagiti naregregyo; ibatiyo ida nga agpaay kadagiti napanglaw ken ganggannaet. Siak ni Yahweh a Diosyo.

¹¹ “Dikay agtakaw wenno agsuitik wenno agulbod.

¹² Dikay agkari iti naganko no diyo panggep a tungpalen ti kariyo, ta maibabain ti naganko. Siak ni Yahweh a Diosyo.

¹³ “Diyo gundawayan wenno takawan ti siasinoman. Diyo ipabigat ti pannangtedyo iti tangdan ti pinagtrabahoyo.

¹⁴ Diyo ilunod ti tuleng wenno bangenan ti pagnaan ti bulsek. Agbutengkayo kaniak. Siak ni Yahweh a Diosyo.

¹⁵ “Diyo ballikugen ti linteg iti panangyetnagyo iti sentensia; dikay mangipakita iti panangidumduma iti napanglaw wenno panagtamed iti nabaknang.

¹⁶ Diyo padpadaksen ti uray siasinoman. No adda agpeggad ti biagna, agsaoka a mangisakit kenkuana. Siak ni Yahweh.

¹⁷ “Diyo ipempen ti gurayo iti siasinoman ngem makilinnawagkayo kenkuana tapno dikay agbasol gapu kenkuana.

¹⁸ Dikay agibales wenno agipempen iti gura ngem ayatenyo ti kaarrubayo a kas iti panagayatyo iti bagiyo. Siak ni Yahweh.

¹⁹ “Tungpalenyo dagiti bilinko. Diyo ipamanada ti maysa nga animal iti sabali a kita ti animal. Diyo paggiddanen nga imula ti dua a kita ti bukel iti talonyo. Dikay agaruat iti kawes a naaramid iti dua a kita.

²⁰ “No ti maysa a tagabu a babai a mabigbig nga inkabbalay ti maysa a lalaki ngem saan pay a nasubbot wenno nawayawayaan ket kinaidda ti sabali a lalaki, agpadada a madusa ngem dida mapapatay, ta tagabu ti babai.

²¹ Ngem mangidatag ti lalaki iti kalakian a karnero a daton a pagsupapak. Ipanna ti animal iti Tolda a Paguummongan

²² ket aramiden ti padi ti seremonia ti pannakadalus tapno maikkat ti basol ti lalaki ket pakawanen ti Dios.

²³ “Inton dumtengkay idiay Canaan ket agmulakay iti uray ania a kita ti kayo nga agbunga iti makan, ibilangyo a saan a nadalus ti bunga iti umuna a tallo a tawen. Diyo kanen dagiti bunga bayat iti dayta a tiempo.

²⁴ Iti maikapat a tawen, maidaton dagiti amin a bunga a mangipakita iti panagyamanyo kaniak, ni Yahweh.

²⁵ Ngem iti maikalima a tawen, mabalinyo a kanen ti bunga dagiti kayoyo tapno ad-adunto ti bungada nga agpaay kadakayo. Siak ni Yahweh a Diosyo.

²⁶ “Dikay agsida iti karne nga adda pay laeng darana. Diyo aramiden ti uray ania a kita ti panaganito.

²⁷ Diyo pukisan ti sikigan ti uloyo; diyo putdan ti barbasyo.

²⁸ Diyo markaan wenno sugaten ti bagiyo a mangipakita iti panangdung-awyo iti natay. Siak ni Yahweh.

²⁹ “Diyo ibabain dagiti annakyo a babbai iti panamagbalinyo kadakuada a balangkantis iti templo. Ngamin, daytoyto ti pakaigapuan ti panagrukbabyo kadagiti didiosen ket agsaknapto ti immoralidad iti daga.

³⁰ Ngilinenyo ti Aldaw a Panaginana ket raemenyo ti lugar a pagdaydayawan kaniak dagiti tattao. Siak ni Yahweh.

³¹ “Dikay mapan makiuman kadagiti agan-anito wenno espiritista tapno saankayo a maibilang a narugit. Siak ni Yahweh a Diosyo.

³² “Ipakitayo ti panagraemyo kadagiti lallakay ken babbaket. Respetarenyo ida ket agbutengkayo iti Dios. Siak ni Yahweh.

³³ “Diyo idadanes dagiti ganggannaet nga agnaed iti dagayo.

³⁴ Ibilangyo ida nga Israelita a kas kadakayo, ket ayatenyo ida a kas iti panagayatyo iti bagiyo. Laglagipenyo a ganggannaetkayo met idi idiay Egipto. Siak ni Yahweh a Diosyo.

³⁵ “Dikay agsaur babaen iti panangusaryo iti saan a husto a pagrukod, pagtimbang ken pagsukat.

³⁶ Aramatenyo ti husto a pagrukod, husto a pagtimbangan, ken husto a pagsukatan. Siak ni Yahweh a Diosyo a nangiruar kadakay idiay Egipto.

³⁷ Tungpalenyo dagiti amin a linteg ken bilinko. Siak ni Yahweh.”