Levitico 18 - Ti Baro a Naimbag a Damag Biblia

Dagiti Maiparit a Seksual nga Aramid

¹ Binilin ni Yahweh ni Moises

² nga ibagana daytoy kadagiti Israelita, “Siak ni Yahweh a Diosyo.

³ Diyo tuladen ti ugali dagiti tattao idiay Egipto a nagnaedanyo idi wenno ti ugali dagiti tattao iti Canaan a pangipanak kadakayo.

⁴ Tungpalenyo dagiti paglintegak ket aramidenyo ti ibagak. Siak ni Yahweh a Diosyo.

⁵ Agbiagkayo no annurotenyo dagiti alagaden ken linteg nga itedko kadakayo. Siak ni Yahweh.”

⁶ Inted ni Yahweh dagitoy nga alagaden. Diyo kainaig ti kabagianyo.

⁷ Diyo kainaig ni inayo tapno saan a maibabain ti amayo. Diyo ibabain ti bukodyo nga ina.

⁸ Diyo ibabain ti amayo iti panagkainnaigyo iti maysa kadagiti assawana.

⁹ Diyo kainaig ti kabsatyo wenno ti kabsatyo iti ama wenno ina, dimmakkel man wenno saan iti balay a dimmakkelanyo met.

¹⁰ Diyo kainaig ti apokoyo; daytoy ti pakaibabainanyo.

¹¹ Diyo kainaig ti siuman ni amayo agsipud ta kabsatyo met.

^12-13 Diyo kainaig ti ikityo, kabsat man ti amayo wenno kabsat ti inayo.

¹⁴ Diyo kainaig ti asawa ti ulitegyo agsipud ta ikityo met.

¹⁵ Diyo kainaig ti manugangyo

¹⁶ wenno ti ipagyo.

¹⁷ Diyo kainaig ti anak wenno apoko ti babai a nalpasmo a kinaidda; mabalin a kabagianyo ida ket maibilang a kinadakes ken maisalungasing iti linteg.

¹⁸ No sibibiag pay laeng ti asawayo, diyo asawaen ti ipagyo.

¹⁹ Diyo kainaig ti babai nga agregla gapu ta narugit iti imatang ti Linteg.

²⁰ Diyo kainaig ti asawa ti sabali a tao tapno saankayo a narugit iti imatang ti linteg.

²¹ Diyo ited ti anakyo a mausar iti panagdaydayaw ken ni didiosen a Moloc ta daytoy ti pakaibabainan ti nagan ti Dios nga Apo.

²² Maiparit a kainaig ti lalaki ti padana a lalaki; kagura ti Dios dayta nga aramid.

²³ Maiparit a kainaig ti babai wenno lalaki ti maysa nga animal; maisalungasing daytoy iti nakaparsuaan ket pagbalinennakayo a narugit.

²⁴ Diyo tulawan ti bagiyo iti uray ania kadagitoy nga aramid. Daytoy ti ugali dagiti tattao a nagnaed iti daga sakbay nga immaykayo ket ita pagtalawen ida ti Apo tapno makastrekkayo.

²⁵ Gapu kadagiti aramidda, nagbalin a makarimon ti daga, isu a dusdusaen ti Apo ti daga ket ipampamuspusanna a pagtalawenna dagiti agnaed sadiay.

^26-27 Inaramidda amin dagitoy makarimon a banag a nangmulit iti daga. Ngem diyo tuladen ida. Dakayo amin, Israelita man wenno ganggannaet a makipagnaed kadakayo, masapul a tungpalenyo dagiti linteg ken bilin ti Apo

²⁸ tapno dinakay yula ti daga a kas iti napasamak kadagiti tattao nga immun-una ngem dakayo a nagnaed sadiay.

²⁹ Ammoyo a mailaksid kadagiti tattao ti Dios ti siasinoman nga agaramid kadagitoy makarimon a banag.

³⁰ Ket kinuna ni Yahweh, “Tungpalenyo dagiti bilinko ket diyo tuladen dagiti aramid dagiti tattao a nagnaed iti daga sakbay iti yaayyo. Dikay agaramid iti uray ania kadagitoy a banag tapno saankayo a matulawan. Siak ni Yahweh a Diosyo.”