Levitico 11 - Ti Baro a Naimbag a Damag Biblia

Dagiti Animal a Mabalin a Makan

¹ Inted ni Yahweh kada Moises ken Aaron dagitoy nga alagaden

² nga agpaay kadagiti Israelita. Mabalinyo a kanen ti aniaman nga animal iti rabaw ti daga

³ a nagpisi ti kukona ken agngatingat.

^4-6 Ngem maiparit a sidaenyo ti kamelio, atap a koneho wenno amo a koneho. Maibilang dagitoy nga animal a narugit; agngatingatda ngem saan a nagpisi dagiti kukoda.

⁷ Dikay agsida iti baboy. Maibilangda a narugit; nagpisi ti kukoda ngem saanda nga agngatingat.

⁸ Diyo sidaen ti karne dagitoy nga animal wenno sagiden ti bangkayda; maibilangda a narugit.

⁹ Mabalinyo a sidaen ti amin a kita ti ikan nga adda pigar ken siksikna,

¹⁰ ngem maiparit a sidaenyo ti aniaman a sibibiag nga agnaed iti danum nga awan pigar ken siksikna.

¹¹ Maibilang a narugit dagitoy ket diyo sidaen ida wenno sagiden ti bangkayda.

¹² Dikay agsida iti aniaman nga agnaed iti danum nga awan pigar ken siksikna.

^13-19 No maipapan kadagiti tumatayab, dikay agsida kadagitoy: agila, kullaaw, kali; gikgik, lumabaga a buitre, buitre, wak; abestrus, agila ti taaw, tikbaboy, kannaway, pelikano, kalamon abubilia; wenno panniki.

²⁰ Maibilang a narugit dagiti amin a nagpayak nga insekto

²¹ malaksid dagiti aglagto.

²² Mabalinyo a sidaen ti dudon, kuriat, wenno paddudon.

²³ Ngem maibilang a narugit dagiti amin a babassit nga insekto nga adda payakna ken agkarayam.

^24-28 Maibilang a narugit agingga iti sardam ti tao a mangsagid iti bangkay dagiti sumaganad nga animal: amin nga adda kukona malaksid no nagpisi dagiti kuko ken agngatingat, ken amin nga uppat ti sakana nga addaan kadagiti natirad a kuko. Siasinoman a mangawit iti bangkay ti kastoy nga animal masapul a labaanna ti pagan-anayna ngem maibilang pay laeng a narugit ti tao agingga iti sardam.

^29-30 Maibilang a narugit dagiti sangyo, marabutit, bao, alutiit.

³¹ Siasinoman a mangsagid kadakuada wenno kadagiti bangkayda maibilang a narugit agingga iti sumipnget.

³² Narugit ti aniaman a pagdissoan ti bangkayda a kas iti alikamen a kayo, pagan-anay, lalat, nakersang a lupot, uray ania ti pakaaramatanna. Masapul a maitaneb iti danum ngem maibilang a narugit latta agingga iti sumipnget.

³³ Ket no matnagda iti banga, narugit amin a nagyanna ket masapul a buongen.

³⁴ Narugit ti aniaman a taraon a matedtedan iti danum a naggapu iti banga, kasta met ti aniaman a mabalin nga inumen a naikarga.

³⁵ Maibilang a narugit ti aniaman a pagdissoan dagiti bangkay; no urno wenno dalikan ti nagdissoanda, burakenyo.

³⁶ Ngem maibilang a nadalus ti ubbog wenno pagurnongan iti danum a pakaisagidan dagiti bangkay uray no maibilang a narugit dagiti sabali a banag a pakaisagidanda.

³⁷ No bin-i a maimula ti pagdissoan ti bangkay, agtalinaed a nadalus dayta a bin-i.

³⁸ Ngem no nayuper ti bin-i ket agdisso ti bangkay iti dayta a bin-i, maibilang a narugit ti bin-i.

³⁹ No matay ti animal a mabalin a sidaen, maibilang a narugit agingga iti rabii ti siasinoman a mangsagid iti bangkayna.

⁴⁰ Ket ti siasinoman a mangan iti aniaman a paset ti animal, masapul a labaanna ti pagan-anayna ngem maibilang a narugit ti tao agingga iti sardam. Siasinoman a mangawit iti bangkay, masapul a labaanna ti pagan-anayna ngem maibilang a narugit dayta a tao agingga iti sumipnget.

⁴¹ Diyo sidaen ti aniaman kadagiti babassit nga animal nga aguyas iti daga,

⁴² dagiti agkarayam wenno magna nga addaan iti uppat wenno adu a saka.

⁴³ Diyo pagbalinen ti bagiyo a maibilang a narugit babaen iti panagsidayo iti uray ania kadagitoy.

⁴⁴ Siak ni Yahweh a Diosyo; pagtalinaedenyo dagiti bagiyo a nasantoan gapu ta nasantoanak.

⁴⁵ Siak ni Yahweh a nangiruar kadakayo idiay Egipto tapno agbalinak a Diosyo. Masapul a nasantoankayo agsipud ta nasantoanak.

⁴⁶ Dagitoy ngarud dagiti linteg nga annuroten maipapan kadagiti animal, tumatayab, ken amin nga adda iti danum, ken amin nga agkarayam iti daga.

⁴⁷ Masapul a mapaggiddiatyo ti nadalus ken ti saan a nadalus iti imatang ti linteg, dagiti animal a mabalin a sidaen ken dagiti saan a masida.