Josue 4 - Ti Baro a Naimbag a Damag Biblia

Maibangon dagiti Baton-lagip

¹ Idi nakaballasiwen dagiti amin a tattao iti Karayan Jordan, kinuna ni Yahweh ken ni Josue:

² “Mangpilika iti 12 a lallaki, maysa kada tribu,

³ ket pagpidutem ida iti saggagaysada a bato iti tengnga ti Jordan, iti mismo a nagtakderan dagiti papadi. Baklayenda dagitoy a bato ket ikabilda iti pagkampoanyo inton rabii.”

⁴ Inayaban ngarud ni Josue dagiti 12 a pinilina

⁵ ket imbagana kadakuada, “Umun-unakayo ngem ti Lakasa ti Tulag ti Apo a Diosyo. Inton dumtengkay iti tengnga ti Jordan, mangala ti tunggal maysa kadakay iti bato a baklayenna, maysa para iti tunggal tribu ti Israel.

⁶ Agpaayto dagitoy a bato a pakalaglagipan dagiti tattao iti inaramid ti Apo. Iti masakbayan, inton saludsoden dagiti annakyo ti kaipapanan dagitoy,

⁷ ibagayonto kadakuada a nagsardeng ti panagayus ti Jordan idi maiballasiw ti Lakasa ti Tulag ti Apo. Kanayonto nga ipalagip dagitoy a bato kadagiti Israelita ti napasamak ditoy.”

⁸ Kas imbilin ni Yahweh ken ni Josue, nangala dagiti lallaki iti 12 a bato iti tengnga ti Jordan, maysa iti tunggal tribu ti Israel. Imballasiwda dagitoy nga impan iti nagkampoanda ket sadiay ti nangidissoanda.

⁹ Nangikabil met ni Josue iti 12 a bato iti tengnga ti karayan, iti nagtakderan dagiti papadi a nangawit iti Lakasa ti Tulag. (Agpapan ita, adda pay laeng sadiay dagiti bato.)

¹⁰ Nagtalinaed a sitatakder dagiti papadi iti tengnga ti Jordan agingga a nalpas amin nga imbilin ni Yahweh ken ni Josue nga aramiden dagiti tattao. Daytoy ti bilin idi ni Moises. Nagdardaras a limmasat dagiti tattao.

¹¹ Idi nakaballasiwda aminen, immun-una manen ti Lakasa ti Tulag ni Yahweh ken dagiti papadi.

¹² Kas imbaga ni Moises kadakuada, immun-una ngem dagiti Israelita dagiti siiigam a lallaki iti tribu ni Ruben, iti tribu ti Gad ken ti kagudua ti tribu ti Manases.

¹³ Iti imatang ni Yahweh, agarup 40,000 a mannakigubat ti nagturong iti pagbabakalan iti tanap nga asideg iti Jerico.

¹⁴ Iti dayta nga aldaw, intan-ok ti Apo ni Josue iti imatang dagiti Israelita. Rinaraemda ni Josue iti unos ti panagbiagna a kas met iti panagraemda idi ken ni Moises.

¹⁵ Imbaga ni Yahweh ken ni Josue

¹⁶ a pasang-atenna iti Jordan dagiti papadi a mangaw-awit iti Lakasa ti Tulag.

¹⁷ Nagtungpal ni Josue.

¹⁸ Idi makatakdangen dagiti papadi, nagayus manen ti karayan ket naglippias dagiti teppangna.

¹⁹ Maika-10 nga aldaw iti umuna a bulan idi ballasiwen dagiti tattao ti Jordan. Nagkampoda idiay Gilgal iti daya ti Jerico.

²⁰ Sadiay ti nangikabilan ni Josue kadagiti 12 a bato nga innalada idiay Jordan.

²¹ Kinunana kadagiti Israelita, “Iti masakbayan, inton saludsoden dagiti annakyo ti kaipapanan dagitoy a bato,

²² ilawlawagyonto kadakuada a nagmaga ti Jordan idi bimmallasiw ti Israel.

²³ Ibagayonto a pinagmaga ti Apo a Diosyo ti karayan agingga a nakaballasiwkayo, a kas iti inaramidna iti Nalabaga a Baybay idi bumallasiwkami.

²⁴ Gapu itoy, maammoanto ti amin a tao ditoy daga no kasano ti kadakkel ti pannakabalin ti Apo ket agnanayon nga agbutengkayto iti Apo a Diosyo.”