Josue 23 - Ti Baro a Naimbag a Damag Biblia

Agsao ni Josue kadagiti Tattao

¹ Adun a tawen ti napalabas manipud impaay ni Yahweh ti kappia iti Israel. Saanen a riniribuk dagiti kabusor iti aglikmutda. Lakay unayen ni Josue.

² Inayabanna dagiti amin nga Israelita, dagiti panglakayen, pangulo, ukom ken ofisiales dagiti tattao, ket kinunana, “Lakayak unayen.

³ Nakitayon ti amin nga inaramid ti Apo a Diostayo kadagitoy a pagilian gapu kadakayo. Ti Apo a Diosyo ti nakigubgubat iti agpaay kadakayo.

⁴ Intudingko a tagikuaen dagiti tribuyo ti daga dagiti tattao a pinarmekko ken amin a nabati pay a nasion manipud iti Jordan agingga iti Taaw Mediterranean.

⁵ Pagsanudento ida ti Apo a Diosyo, ket mapaksiatdanto bayat ti idadarupyo. Kukuayonto ti dagada, kas inkari kadakayo ti Apo a Diosyo.

⁶ Ngarud, ikagumaanyo a tungpalen ti amin a nailanad iti Linteg ni Moises. Diyo salungasingen ti uray maysa a pasetna.

⁷ Dikay makilangen kadagiti nabati a tattao iti dennayo wenno baliksen ti nagan dagiti diosda wenno pagsapata ti naganda wenno agserbi kadakuada wenno agdaydayaw kadakuada.

⁸ Agtalinaedkayo ketdi a napudno iti Apo a kas iti inar-aramidyo agpapan ita.

⁹ Iti imatangyo, pinaksiat ti Apo ti dadakkel ken nabibileg a pagilian, ket awan pay ti makabael a mangparmek kadakayo.

¹⁰ Mabalin a pagtarayen ti uray maysa kadakayo ti sangaribu a tattao, gapu ta ti Apo a Diosyo ti makirupak iti biangyo a kas inkarina.

¹¹ Isut' gapuna nga ikagumaanyo nga ayaten ti Apo a Diosyo.

¹² No sumiasikayo, ket tumiponkayo kadagiti tattao nga adda pay la a nabati iti sidongyo, ken makiasawakayo kadakuada,

¹³ namnamaenyo a dinton paksiaten ti Apo a Diosyo dagitoy a pagilian. Napeggaddanto a kas iti silo wenno palab-og a pakatinnaganyo, ken saplit kadagiti bukotyo wenno siit kadagiti matayo agingga a mapukawkay iti daytoy nasayaat a daga nga inted kadakayo ti Apo a Diosyo.

¹⁴ “Ita, dandaniakon sumina iti daytoy a biag. Ammoyo iti amin a puso ken kararuayo nga inted ti Apo a Diosyo ti amin nga agkakaimbag a banag nga inkarina. Naaramid amin; awan ti saan a natungpal.

^15-16 Wen, tinungpal ti Apo a Diosyo ti amin a naimbag a banag a kinunana nga aramidenna. Ngem no salungasingenyo ti tulag ti Apo a Diosyo nga imbilinna a tungpalenyo, no agserbi ken agdaydayawkayo kadagiti didiosen, dusaennakayto gapu iti pungtotna ket iti saan a mabayag, awanton ti matda kadakay iti daytoy nasayaat a daga nga intedna kadakayo.”