Josue 14 - Ti Baro a Naimbag a Damag Biblia

Mabingbingay ti Canaan babaen iti Binnunot

¹ Dagitoy dagiti naited kadagiti Israelita a daga ti Canaan iti laud ti Jordan. Biningbingay da Eleazar a padi, Josue nga anak ni Nun ken dagiti papangulo dagiti familia kadagiti tribu ti Israel.

² Kas imbilin ni Yahweh ken ni Moises, nabingbingay babaen iti binnunot ti daga a tagikuaen dagiti siam ket kagudua a tribu iti laud ti Jordan.

^3-4 Naituding idin ni Moises ti daga iti daya ti Jordan nga agpaay kadagiti dua ket kagudua a tribu. (Nabingay ti kaputotan ni Jose iti dua a tribu: ti Manases ken Efraim.) Awan ti inted ni Moises a daga kadagiti Levita. Nupay kasta, naikkanda kadagiti siudad a pagnaedanda, agraman kadagiti pagpastoranda kadagiti baka ken karneroda.

⁵ Nagbibingayan dagiti Israelita ti daga a kas imbilin ni Yahweh ken ni Moises.

Maited ti Hebron ken ni Caleb

⁶ Maysa nga aldaw, adda sumagmamano a tattao ti tribu ti Juda a napan ken ni Josue idiay Gilgal. Kinuna kenkuana ni Caleb nga anak ni Jefone a Kenezeo; “Ammom ti kinuna ti Apo idi idiay Kades Barnea maipapan kadata; imbagana daytoy ken ni Moises a tao ti Dios.

⁷ Uppat a pulo ti tawenko idi ibaonnak ni Moises nga adipen ti Apo manipud Kades Barnea tapno innak espiaan ti daga. Idi agsubliak kenkuana, insangpetko ti pudno a damag.

⁸ Nupay kasta, nagbuteng dagiti tattao gapu ta sabali ti imbagbaga dagiti kinaduak a simmang-at. Ngem sipupudnoak a nagtungpal iti Apo a Diosko.

⁹ Inkari kaniak ni Moises iti daydi nga aldaw, ‘Gapu ta nagtulnogka a sipupudno iti Apo a Diosko, tagikuaenyonto nga agaama ti daga a nagnaam.’”

¹⁰ “Panunotem,” intuloy ni Caleb. “Uppat a pulo ket lima a tawenen ti napalabas manipud imbaga ti Apo daytoy ken ni Moises. Imbagana daytoy idi agdaldaliasat ti Israel idiay let-ang. Wen, manipud idi, impalubos ti Apo nga agbiagak. Kitaennak! Walopulo ket lima ti tawenkon,

¹¹ ngem napigsaak pay laeng a kas idi imbaonnak ni Moises. Napigsaak pay laeng a makigubat wenno mangaramid iti aniaman.

¹² Ngarud, itedmo kaniak daytoy katurturodan a disso nga inkari ti Apo iti daydi nga aldaw. Imbagami idi kadakayo nga adda puli dagiti higante a maaw-awagan iti Anakim nga agnaed kadagiti dadakkel ken nabakudan a siudad. Nalabit nga addanto kaniak ti Apo, ket paksiatekto ida kas imbagana.”

¹³ Binendisionan ni Josue ni Caleb nga anak ni Jefone, ket intedna a kukuana ti siudad ti Hebron.

¹⁴ Agpapan ita, kukua dagiti kaputotan ni Caleb nga anak ni Jefone a Kenezeo ti Hebron agsipud ta sipupudno ni Caleb a nagtungpal iti Apo a Dios ti Israel.

¹⁵ Maaw-awagan idi ti Hebron iti Kiryat Arba. (Ni Arba idi ti kabibilgan kadagiti Anakim.) Addan kappia iti daga.