Jeremias 5 - Ti Baro a Naimbag a Damag Biblia

Ti Basol ti Jerusalem

¹ Dakayo a tattao ti Jerusalem, agtaraykayo kadagiti kalsadayo! Agsiimkayo a nalaing! Sukimatenyo dagiti plasa! Kitaenyo no adda masarakanyo a nalinteg ti aramidna ken kinapudno ti sapsapulenna. No adda, pakawanento ti Apo ti iliyo.

² Uray no ibagayo nga agdaydayawkayo iti Apo, dinto met la pudno ti saoyo.

³ Awan duadua a ti kinapudno ti birbiroken ti Apo. Sinaplitnakayo, ngem saankayo a nangrikna; rinumeknakayo, ngem diyo kayat ti paisuro. Natangken ti uloyo, ket diyo nagpanawan dagiti basolyo.

⁴ Kinunak, “Uray ta nengneng met la dagitoy a tattao; minamaag ti aramidda. Dida ammo ti pagayatan ti Apo, wenno dagiti linteg ti Diosda.

⁵ Mapanakto kadagiti agtuturay ket kasaok ida. Ammoda ti pagayatan ti Diosda; ammoda ti kayat ti Apo nga aramidenda.” Ngem linaksidda ti panangituray ti Apo; dida kayat ti agtulnog kenkuana.

⁶ Daytoy ti gapuna a patayento ida dagiti leon ti kabakiran. Rangrangkayento ida ti lobo ti let-ang, ket agdakiwasto ti leopardo kadagiti ilida. Pisangpisangennanto ti siasinoman a rummuar kadakuada. Nakaad-adu ngamin ti basolda, ket namin-adun a tinallikudanda ti Dios.

⁷ Sinaludsod ti Apo, “Apay koma a pakawanek dagiti basol dagiti tattaok? Tinallikudandak ket nagdaydayawda kadagiti didiosen. Uray no intedko amin a masapulda, nakikamalalada latta ket dagiti balangkantis ti kinadendennada.

⁸ Kasda la nabsog a toro a kabalio nga agsapsapul iti dakepenna, tarigagayan ti tunggal maysa a kaiddaen ti asawa ti kaarubana.

⁹ Apay ketdin a diak dusaen ida gapu iti aramidda? Apay ketdin a diak balsen ti kastoy a nasion?

¹⁰ Ibaonkonto dagiti kabusor a mangpatpat iti kaubasanda, ngem saan a mamimpinsan nga ikisapda. Ibagakto kadakuada nga ikkatenda dagiti sangsanga, ta saanko a kukua ida.

¹¹ Liniputandak a namimpinsan, dagiti tattao ti Israel ken ti Juda.” Daytoy ti sao ni Yahweh.

Laksiden ni Yahweh ti Israel

¹² Saan a bigbigen dagiti tattao ti Apo, ket kinunada, “Awanto ti aniaman nga aramidenna. Saantayonto a marigatan; ditayto agsagaba iti gubat wenno bisin.”

^13-14 Kinunada a mannanao laeng dagiti profeta ket awan mensaheda a naggapu iti Apo. Kinuna kaniak ti Apo a Dios a Mannakabalin-amin, “Jeremias, gapu ta kastoy ti imbaga dagitoy a tattao, pagbalinekto a kasla apuy dagiti saok iti ngiwatmo. Kaslanto kayo dagitoy a tattao ket ikisapto ida iti apuy.”

¹⁵ Tattao ti Israel, yegto ti Apo ti maysa a nasion a mangraut kadakayo. Aggapunto iti maysa a lugar, maysa a nasion a nabileg ken addan idi un-unana. Diyo ammo wenno maawatan ti pagsasaona.

¹⁶ Makapatay dagiti panada. Maingelda amin a soldado!

¹⁷ Kanendanto dagiti apit ken taraonyo. Patayendanto dagiti amin nga annakyo. Alaendanto amin nga arban ken pangenyo. Ibusendanto dagiti ubas ken igosyo. Rebbaento ti armadada dagiti siudad a nasarikedkedan a pagtaltalgedanyo.

¹⁸ Ngem kinuna ti Apo, “Uray kadagita nga aldaw, diakto gudasen a mamimpinsan dagiti tattaok.

¹⁹ No saludsodenda no apay nga aramidek amin dagitoy, kastoy ti kunam, Jeremias, ‘Gapu ta linaksidyo ti Apo, ket nagserbikayo kadagiti ganggannaet a didiosen iti dagayo. Agserbikayonto met kadagiti ganggannaet iti daga a saanyo a kukua.’”

Ballaagan ti Dios dagiti Tattaona

²⁰ Kuna ti Apo, “Ibagam kadagiti kaputotan ni Jacob, ibagam kadagiti tattao ti Juda:

²¹ Dumngegkayo, dakay a maag ken nakuneng a tattao, dakayo nga adda matana, ngem saan a makakita, dakayo nga adda lapayagna, ngem saan a makangngeg.

²² Siak ni Yahweh. Awan kadi ti panagbutengyo kaniak? Apay a dikay agkintayeg iti sangoanak? Inkabilko ti darat a beddeng ti baybay, maysa a permanente a bangen a dina maballasiw. Mabalin nga agdawel ti baybay ngem dina malabsan; mabalin nga agdaranudor dagiti dalluyon ngem dida malasat.

²³ Ngem dakayo a tattao, nasubeg ken nasukirkayo, tinallikudan ken pinanawandak.

²⁴ Pulos a diyo napanunot a dayawendak uray no inyegko ti tudo kadagiti tiempo a kasapulanna ket nagapitkayo kadagiti naituding a panawen.

²⁵ Ngem gapu iti kinadakesyo, nalapdankayo nga agsagrap kadagitoy agkakaimbag a banag.

²⁶ “Adda dagiti managdakdakes a makipagnaed kadagiti tattaok. Aglemmengda nga agur-uray, kas kadagiti lallaki nga agipakat kadagiti pagsilo kadagiti tumatayab, ngem nagipakatda kadagiti pagipalab-og kadagiti tattao.

²⁷ Kas iti mangnganup a mangpunno iti tangkal iti billit, pinunnoda dagiti balayda kadagiti sinamsamda. Daytoy ti gapuna a mannakabalin ken baknangda,

²⁸ no apay a nalulukmeg ken nabubuttiogda. Awan pagpatinggaan dagiti dakes nga aramidda. Saanda nga ikkan ti kalintegan dagiti ulila wenno salakniban dagiti maidaddadanes.

²⁹ “Ngem siak, ni Yahweh, dusaekto ida gapu kadagiti dakes nga aramidda. Balsekto daytoy a nasion!

³⁰ Adda nakabutbuteng ken nakaal-alliaw a napasamak iti daga:

³¹ Pasig nga ulbod ti sasawen dagiti profeta. Isuro dagiti papadi ti kaykayatda ket magustoan met ti kasta dagiti tattaok. Ngem anianto ti aramidenda inton agpatingga amin dagitoy?”