Jeremias 47 - Ti Baro a Naimbag a Damag Biblia

Ti Mensahe ni Yahweh maipapan kadagiti Filisteo

¹ Sakbay ti panangraut ti Faraon iti Gaza, nagsao kaniak ti Apo maipapan kadagiti Filisteo.

² Kinunana, “Adtoy, dumakdakkel ti danum iti amianan, ket manglayus a kas iti karayan. Layusenna ti daga ken amin a linaonna, dagiti siudad ken amin nga agnaed kadakuada. Agpaarayatto dagiti tattao, nasaemto ti sangitda.

³ Mangngegdanto ti dalagudog dagiti kabalio, ti karadakad dagiti luglugan a pakigubat dagiti ranitrit dagiti pilpilid. Saanto a sublien dagiti amma dagiti annakda, gapu ta agsalupaypay dagiti imada.

⁴ Dumtengen ti pannakadadael ti Filistia; agpatinggan ti amin a tulong a mabalin nga ited ti Tiro ken Sidon. Siak, ni Yahweh, dadaelekto dagiti Filisteo, dagiti naggapu iti igid ti baybay ti Caftor.

⁵ Kasta unay ti ladingit dagiti taga-Gaza. Awanen arimekmek dagiti taga-Askelon. Kasano ti kapaut ti panagdung-aw dagiti natda a Filisteo?

⁶ Ipukkawyo, ‘Kampilan ti Apo! Kaanonto nga agsardeng ti panagranggasmo? Agsublika iti kalubanmo. Agyanka sadiay ket aginanaka!’

⁷ Ngem kasano nga aginana idinto ta inikkak iti trabahona? Binilinko a rautenna ti Askelon ken dagiti agnaed iti igid ti baybay.”