Jeremias 45 - Ti Baro a Naimbag a Damag Biblia

Ti Kari ti Dios ken ni Baruc

¹ Iti maikapat a tawen a panagari ni Jehoyakim nga anak ni Josias idiay Juda, insurat ni Baruc nga anak ni Nerias ti indiktarko kenkuana. Imbagak kenkuana

² ti kinuna ti Apo a Dios ti Israel, “Baruc,

³ kunkunam, ‘Asiak pay! Dinegdegan ni Yahweh ti rigrigatko; ninayonanna iti ladingit. Mautoyanakon nga agas-asug ket awan ti pakabang-arak.’

⁴ “Ngem siak, ni Yahweh, rebbaek ti binangonko ken parutek ti immulak. Aramidekto daytoy iti entero a daga.

⁵ Tarigagayam kadi ti pannakaisalsaluminam? Dimo tarigagayan ta didigraek ti amin a sangkataoan. Nupay kasta, ipaluboskonto nga awan ti pakaan-anoam iti sadinoman a papanam. Siak, ni Yahweh, ti nagsao iti daytoy.”