Jeremias 43 - Ti Baro a Naimbag a Damag Biblia

Maipan ni Jeremias idiay Egipto

¹ Kalpasan ti panangibagak kadagiti tattao ti amin a pinaibaga ti Apo a Diosda,

² nagsao da Azarias nga anak ni Hosaias, Johanan nga anak ni Karea ken amin a natangsit a lallaki. “Agul-ulbodka,” kinunada kaniak. “Saannaka nga imbaon ti Apo a Diostayo a mangibaga kadakami a dikami mapan idiay Egipto.

³ Ngem dinurogannaka ni Baruc nga anak ni Nerias tapno busorennakami ket yawatnakami kadagiti taga-Babilonia a mabalin a mangpatay wenno mangipan kadakam idiay Babilonia.”

⁴ Iti kasta, saan a tinungpal ni Johanan wenno dagiti amin a pangulo ti armada wenno dagiti tattao ti bilin ti Apo nga agbatida idiay Juda.

⁵ Innala ni Johanan ken dagiti amin nga ofisiales ti armada ti amin a natda idiay Juda, ket impanda ida idiay Egipto, agraman dagiti amin a nagsubli manipud kadagiti nadumaduma a pagilian a nakaiwarawaraanda;

⁶ dagiti lallaki, dagiti babbai, dagiti ubbing ken dagiti babbai nga annak ti ari. Innalada dagiti amin a nabati idiay Juda a pinaaywanan ni Nebuzaradan a kapitan dagiti guardia ken ni Gedalias agraman kadakami ken ni Baruc.

⁷ Sinukirda ti bilin ti Apo ket napanda idiay Egipto agingga iti siudad ti Tafnes.

⁸ Idiay Tafnes, kinuna ti Apo kaniak,

⁹ “Mangalaka iti sumagmamano a dadakkel a bato ket ikalim ida iti sango ti pagserkan ti palasio ti Faraon iti daytoy a siudad. Aramidem daytoy iti imatang ti sumagmamano a Judio.

¹⁰ Ibagam kadakuada a siak, ni Yahweh a Mannakabalin-amin a Dios ti Israel, yegko ditoy ni adipenko a Nebucadnesar nga ari ti Babilonia. Ipasdekkonto ti tronona kadagitoy a bato nga inkalik ket bangonekto ti toldana a kas ari.

¹¹ Umaynanto parmeken ti Egipto. Patayennanto iti angol dagiti nairanta a matay iti angol. Ipanawnanto a kas balud dagiti nairanta a mabalud. Patayennanto iti gubat dagiti naikeddeng a matay iti gubat.

¹² Puorannanto dagiti templo dagiti didiosen ti Egipto wenno ipanawnanto ida. Kas iti panangikkat ti agpaspastor kadagiti tuma iti arruatenna agingga nga awanen maikkatna, kastanto met ti aramiden ti ari ti Babilonia iti daga ket agawidto a sibaballigi.

¹³ Rebbaennanto dagiti nasagradoan a monumento ti Heliopolis idiay Egipto, ket puorannanto dagiti templo dagiti didiosen dagiti Egipcio.”