Jeremias 34 - Ti Baro a Naimbag a Damag Biblia

Ti Mensahe a maipaay ken ni Zedekias

¹ Nagsao kaniak ti Apo idi madama ti panangraut ni Nebucadnesar nga ari ti Babilonia iti Jerusalem ken dagiti kabangibangna nga il-ili. Inkuyog ni Nebucadnesar ti armadana, kasta met dagiti armada dagiti nasion ken dagiti tattao nga iturayanna.

² Kinuna kaniak ti Apo a Dios ti Israel nga ibagak daytoy ken ni Ari Zedekias ti Juda, “Siak, ni Yahweh, yawatkonto daytoy a siudad iti ari ti Babilonia ket puorannanto.

³ Dikanto makalisi. Matiliw ken mayawatkanto kenkuana. Makitamto iti rupanrupa ket makasaomto a personal sakanto mapan idiay Babilonia.

⁴ Denggem, Ari Zedekias, ti ibaga ni Yahweh kenka. Saankanto a matay iti kampilan.

⁵ Natalnanto ti ipapataymo. Kas iti panangpuor dagiti tattao iti insenso idi itanemda dagidi ammam a nagari nga immun-una ngem sika, kastanto met ti panangpuorda iti insenso a maipaay kenka. Dung-awandakanto a kunkunada, ‘Natayen ti arimi!’ Siak, ni Yahweh, ti nagsao iti daytoy.”

⁶ Imbagak amin dagitoy ken ni Ari Zedekias idiay Jerusalem

⁷ idi rarauten ti ari ti Babilonia ti siudad. Gubgubaten pay ti armadana ti Laquis ken Azeka, dagiti kakaisuna a nabati a nasarikedkedan a siudad ti Juda.

Dagiti Tagabu nga Israelita

⁸ Adda katulagan idi nga inaramid ni Ari Zedekias kadagiti taga-Jerusalem a wayawayaanda

⁹ dagiti tagabuda. Nagnunumoan amin a tattao ken dagiti panguloda a wayawayaanda dagiti tagabuda a Hebreo, lalaki man wenno babai, tapno awan ti siasinoman nga adda tagabuna a padana nga Israelita.

¹⁰ Nagnunumoan amin dagiti tattao ken dagiti panguloda a wayawayaanda dagiti tagabuda. Pudno a winayawayaanda dagiti tagabuda,

¹¹ ngem iti saan a nabayag, nagbaliw ti panunotda. Innalada dagiti tagabuda ket pinilitda a tinagabu manen ida.

¹² Isut' gapuna a kinuna ti Apo

¹³ a Dios ti Israel nga ibagak kadagiti tattao, “Nakitulagak kadagidi kapuonanyo idi iruarko ida idiay Egipto a nakatagabuanda. Imbagak kadakuada

¹⁴ a kada pito a tawen, wayawayaanda ti siasinoman a padada a Hebreo a nagserbi kadakuada iti innem a tawen. Ngem didak impangag wenno inkaskaso dagidi kapuonanyo.

¹⁵ Iti saan pay a nabayag, nagbabawikayo ket inaramidyo ti pakaragsakak. Nagnunumoanyo amin a wayawayaan dagiti padayo a Hebreo ket nagtutulagkayo iti imatangko iti uneg ti Templo a nabangon a pagdaydayawan iti naganko.

¹⁶ Ngem nagbabawikayo manen ket imbabaindak. Dakay amin, innalayo met laeng dagiti tagabu a winayawayaanyo ket pinilityo a tinagabu manen ida.

¹⁷ Iti kasta, siak, ni Yahweh, kunak kadakayo a saandak a tinungpal. Saanyo a winayawayaan dagiti padayo a Hebreo. Ala ngarud, ikkankayo iti wayawayayo; wayawaya a matay iti gubat, angol ken bisin. Pagbutngekto amin a nasion iti lubong gapu iti aramidko kadakayo.

^18-19 Nakitulag kaniak dagiti pangulo ti Juda ken ti Jerusalem agraman dagiti ofisiales ti palasio, dagiti papadi ken dagiti amin a tattao iti daytoy a daga babaen ti pannagnada iti nagbaetan ti dua a kagudua ti toro a baka a pinagguduada. Ngem sinalungasingda ti nagtutulaganmi ket saanda a tinungpal dagiti alagadenna. Iti kasta, aramidekto kadagitoy a tattao ti kas iti inaramidda iti toro.

²⁰ Yawatkonto ida kadagiti kabusorda, kadagiti agpanggep a mangpapatay kadakuada. Kanento dagiti tumatayab ken animal dagiti bangkayda.

²¹ Yawatkonto met ni Zedekias ken dagiti ofisialesna kadagiti kabusorda nga agpanggep a mangpatay kadakuada. Yawatkonto ida iti armada ti Babilonia a nagsardengen a manggubgubat kadakayo.

²² Ibilinkonto nga agsublida iti daytoy a siudad. Rauten, parmeken ken puorandanto. Pagbalinekto a kas iti let-ang dagiti il-ili ti Juda nga awan ti agnaed. Siak, ni Yahweh, ti nagsao iti daytoy.”