Jeremias 26 - Ti Baro a Naimbag a Damag Biblia

Maidarum ni Jeremias

¹ Idi mangrugi nga agari ni Jehoyakim nga anak ni Josias idiay Juda,

² kinuna ti Apo kaniak, “Agtakderka iti paraangan ti Templo ket ipakaammom kadagiti taga-Juda a mapan agdaydayaw sadiay ti amin nga imbilinko kenka. Awan ti ilimlimedmo. Ibagam amin.

³ Nalabit a dumngegto kenka dagiti tattao ket laksidenda ti kinadakesda. No aramidenda daytoy, diakto ituloy ti panggepko a mangdadael kadakuada gapu iti kinadakesda.”

⁴ Imbaga kaniak ti Apo nga idanonko daytoy kadagiti tattao, “Siak, ni Yahweh, ti nagkuna a masapul nga agtulnogkayo kaniak babaen iti panangsurotyo iti pannursurok.

⁵ Masapul a denggenyo ti sao dagiti adipenko, dagiti profeta a masansan nga ibabaonko kadakayo. Pulos a saanyo nga impangag dagiti sinaoda.

⁶ No itultuloyyo ti agsukir, aramidekto iti daytoy a Templo ti kas iti inaramidko iti Silo. Aramatento dagiti amin a nasion a pagilunod ti nagan daytoy a siudad.”

⁷ Nangngeg dagiti papadi, dagiti profeta ken dagiti amin a tattao nga isasaok dagitoy idiay Templo.

⁸ Apaman a naisaok ti amin nga imbilin ni Yahweh nga ibagak, ginammatandak sada impukkaw, “Rumbeng a mapapatayka gapu iti daytoy!

⁹ Apay a kinunam iti nagan ti Apo nga agbalinto daytoy a Templo a kas iti Silo? Imbagam a madadaelto daytoy a siudad ket awanton ti agnaed.” Ket inaribungbongandak dagiti tattao.

¹⁰ Idi nadamag dagiti pangulo ti Juda ti napasamak, dinagdagusda ti pimmanaw iti palasio sada napan iti Templo ket nagtugaw ti tunggal maysa iti Baro a Ruangan.

¹¹ Kinuna dagiti papadi ken dagiti profeta kadagiti pangulo ken kadagiti tattao, “Rumbeng a mapapatay daytoy a tao agsipud ta nagsao iti maibusor iti siudadtayo. Mismo a dakayo ti nakangngeg iti imbagana.”

¹² Kinunak, “Imbaonnak ti Apo a mangipakaammo iti amin a nangngegyo a maibusor iti daytoy a Templo ken iti daytoy a siudad.

¹³ Masapul a baliwanyo ti panagbiagyo ken dagiti aramidyo. Tungpalenyo dagiti sao ti Apo a Diosyo tapno dinan ituloy ti panggepna a mangdadael kadakayo.

¹⁴ No siak a maysa, addaak iti pannakabalinyo! Aramidenyo kaniak ti ammoyo a nasayaat.

¹⁵ Ngem tandaananyo daytoy, dakayo ken dagiti tattao iti daytoy a siudad: no patayendak makabasolkayo iti panangpapatayyo iti tao nga awan basolna agsipud ta ti Apo ti nangibaon kaniak a mangiballaag kadakayo kadagitoy.”

¹⁶ Kinuna dagiti pangulo ken dagiti tattao kadagiti papadi ken kadagiti profeta, “Saan koma a maikeddeng a matay daytoy a tao agsipud ta nagsao kadatayo iti nagan ti Apo a Diostayo.”

¹⁷ Timmakder ti sumagmamano kadagiti panglakayen, ket kinunada kadagiti naguummong sadiay,

¹⁸ “Idi ni Hezekias ti ari ti Juda, imbaga ni profeta Mica a Morastita kadagiti amin a tattao a kinuna daytoy ti Apo a Mannakabalin-amin, ‘Kaslanto talon a maarado ti Sion; agbalinto ti Jerusalem a gabsuon a batbato, ket agbalinto a bakir ti turod ti Templo.’

¹⁹ Saan a pinatay ni Ari Hezekias ken dagiti tattaona ni Mica. Nagbuteng ni Hezekias iti Apo ket nagdawat iti paraburna. Imbabawi ngarud ti Apo ti panggepna a mangdidigra kadakuada. Ita, kayatyo kadi a yegtayo ti didigra kadagiti bagbagitayo?” (

²⁰ Adda idi sabali a lalaki a nagsao iti nagan ti Apo iti maibusor iti daytoy a siudad ken iti nasion, kas iti inaramid ni Jeremias. Isu ni Urias nga anak ni Semaias a taga-Kiriat Jearim.

²¹ Idi nangngeg ni Jehoyakim, dagiti soldadona ken dagiti ofisialesna ti sinaona, pinanggep ti ari a papapatay ni Urias. Ngem naammoan daytoy ni Urias, isut' gapuna a sibubuteng a naglibas ket napan idiay Egipto.

²² Nupay kasta, imbaon ni Ari Jehoyakim ni Elnatan nga anak ni Acbor ken ti sumagmamano a lallaki idiay Egipto tapno alaenda ni Urias.

²³ Insangpetda ni Urias ket pinapatay ni Ari Jehoyakim sana pinaipurruak ti bangkayna iti pagitaneman kadagiti nanumo a tattao.)

²⁴ Ngem gapu iti tulong ni Ahikam nga anak ni Safan, saanak a nayawat kadagiti tattao tapno patayendak.