Jeremias 24 - Ti Baro a Naimbag a Damag Biblia

Dagiti Dua a Basket nga Igos

¹ Impakita kaniak ti Apo ti dua a basket nga igos a naikabil iti sango ti Templo. (Napasamak daytoy kalpasan ti panangipanaw ni Nebucadnesar nga ari ti Babilonia ken ni Jeconias nga ari ti Juda. Naipan ti ari a kas balud idiay Babilonia agraman dagiti papangulo ti Juda, dagiti kumikitikit ken mammanday. Anak ni Jehoyakim ni Jeconias.)

² Naglaon ti maysa a basket kadagiti nasayaat ken nasapa a naluom nga igos. Naglaon met ti maikadua a basket iti nalungsot ken saanen a makan nga igos.

³ Kinuna ni Yahweh kaniak, “Jeremias, ania ti makitam?” “Igos,” insungbatko. “Dagiti nasayaat nga igos, nasayaatda unay. Dagiti nalungsot, nalungsotda ket saanen a makan.”

⁴ Kinuna ngarud ti Apo kaniak,

⁵ “Siak ni Yahweh a Dios ti Israel, ibilangko dagiti nasayaat nga igos a kas kadagiti tattao a naipan idiay Babilonia ket kaasiakto ida.

⁶ Aywanan ken isublikto ida iti daytoy a daga. Saankonton a dadaelen ida ket padakkelekto ida. Imulakto ida ket saankonton ida a paruten.

⁷ Riingekto ti riknada nga agtarigagay a mangammo a siak ni Yahweh. Agbalindanto a tattaok ket siakto ti Diosda agsipud ta agsublidanto kaniak iti amin a pusoda.

⁸ “No maipapan ken ni Zedekias nga ari ti Juda, kadagiti ofisiales a kakaduana ken kadagiti taga-Jerusalem a nagbati ditoy a daga wenno kadagiti napan idiay Egipto, siak, ni Yahweh, ibilangkonto amin ida a kas kadagiti dakes nga igos a saanen a mabalin a kanen.

⁹ Didigraekto ida tapno agbuteng dagiti amin a nasion ditoy lubong. Rabrabaken, pagang-angawan ken ab-abiento ida dagiti tattao. Pagilunoddanto ti naganda iti amin a lugar a pangiwarawaraak kadakuada.

¹⁰ Mangyegakto iti gubat, bisin ken sakit kadakuada, agingga nga awan a pulos ti matda kadakuada iti daga nga intedko kadakuada ken kadagiti kapuonanda.”