Jeremias 16 - Ti Baro a Naimbag a Damag Biblia

Ti Bilin ni Yahweh ken ni Jeremias

¹ Kinuna manen ti Apo kaniak,

² “Saanka a mangas-asawa wenno agputot ditoy a lugar.

³ Ibagak kenka ti mapasamakto kadagiti ubbing a mayanak ditoy ken kadagiti nagannak kadakuada.

⁴ Mataydanto kadagiti nakabutbuteng a sakit, ket awanto ti mangdung-aw wenno mangitanem kadakuada. Maiwalangto dagiti bangkayda a kasla nabunton a rugit iti daga. Mataydanto iti paggugubatan, wenno iti bisin ket kanento dagiti tumatayab ken atap nga animal dagiti bangkayda.

⁵ “Saanka a sumrek iti balay nga adda minatayna. Dimo dung-awan ti siasinoman ta diakon paraburan dagiti tattaok iti talna, ayat ken asik kadakuada.

⁶ Matayto dagiti nabaknang ken dagiti napanglaw iti daytoy a daga, ngem awanto ti mangitanem wenno mangdung-aw kadakuada. Awanto ti mangsugat iti bagina wenno mangpukis iti buokna a mangipakita iti ladingitna.

⁷ Awanto ti makipangan wenno makiinum iti siasinoman tapno liwliwaenna inton matay ti ipatpategna. Awanto ti mangngaasi iti siasinoman, uray pay iti nagpasina iti ama wenno inana.

⁸ “Dika sumrek iti balay a yan dagiti agrarambak. Dika makipangan wenno makiinum kadakuada.

⁹ Siak ni Yahweh a Mannakabalin-amin a Dios ti Israel. Denggem ti ibagak: Pasardengekto ti amin nga ariwawa ti ragragsak ditoy, ket saanton a mangngeg dagiti naragsak a parambak ti kasar. Masaksianto dagiti tattao nga adda ditoy ti pannakapasamak dagitoy.

¹⁰ “Inton ibagam kadakuada dagitoy, saludsodendanto kenka no apay a dusaek ida iti napalalo, no ania ti nakabasolanda ken no ania ti basolda kaniak a Diosda.

¹¹ Ibagamto kadakuada a kastoy ti kunak, ‘Linaksiddak dagiti kapuonanyo ket nagserbi ken nagdaydayawda kadagiti sabali a dios. Saanda a tinungpal dagiti pannursurok.

¹² Ngem dakdakes pay ti inaramidyo ngem dagidi kapuonanyo. Nasukir ken dakeskay amin ket saankay a nagtulnog kaniak.

¹³ Iti kasta, ipurruakkayto iti ruar daytoy a daga, iti daga a diyo pay naammoan ken di met naammoan dagidi kapuonanyo. Sadiay, aldaw-rabii nga agserbikayto kadagiti sabali a dios ket saankayto a kaasian.’”

Agsubli dagiti Napagtalaw

¹⁴ Kuna ti Apo, “Umayen ti tiempo nga awanton ti agsapata iti naganko a sibibiag a Dios a nangiruar kadagiti Israelita manipud idiay Egipto.

¹⁵ Agsapatadanto ketdi kaniak a kas sibibiag a Dios a nangiruar kadagiti Israelita iti daga ti amianan ken iti amin a pagilian a nangiwarawaraak kadakuada. Isublikto ida iti dagada, iti daga nga intedko kadagidi kapuonanda. Siak, ni Yahweh, ti nagsao.”

Ti Umay a Pannusa

¹⁶ Kuna ti Apo, “Mangibaonakto iti adu a mangngalap a mangtiliw kadagitoy a tattao. Kalpasanna, mangibaonakto iti adu a mangnganup a mangsapul kadakuada kadagiti bambantay, turturod ken rukrukib.

¹⁷ Makitak amin nga aramidda. Awan ti mailemmeng kaniak. Saan a nailinged kaniak ti basolda.

¹⁸ Maminduanto ti kadagsen ti dusada gapu kadagiti basol ken kinadakesda, gapu ta tinulawanda ti dagak kadagiti imahen nga awanan biag a kas kadagiti bangkay ket pinunnoda kadagiti saan a pudno a dios.”

Kararag ni Jeremias iti Panagtalekna ken ni Yahweh

¹⁹ O Apo, sika ti mangsalaknib kaniak ken mangted iti pigsak. Tulongannak iti tiempo ti rigat. Umayto kenka dagiti nasion nga aggapu iti amin a paset ti daga ket kunada, “Pasig a sinan-dios ti adda kadagidi kapuonanmi. Awan ti adda kadakuada no di laeng dagiti awan serserbina nga imahen.

²⁰ Makaaramid kadi ti tao iti diosna? Saan! Saan a pudno a dios ti aramidenda.”

²¹ “Ngarud,” kuna ti Apo, “iparangarangkonto kadakuada ti pannakabalin ken bilegko ket maammoandanto a siak ni Yahweh.”