Jeremias 14 - Ti Baro a Naimbag a Damag Biblia

Ti Nakaro a Tikag

¹ Kinuna ti Apo kaniak maipapan iti tikag,

² “Agdungdung-aw ti Juda, agbugbugsot dagiti siudadna. Gapu iti ladingit, agid-idda dagiti tattaona iti daga, ket dumawat ti Jerusalem iti tulong.

³ Agpasakdo dagiti babaknang; mapan dagiti adipenda kadagiti bubon ngem awan masapulanda a danum, agawidda nga awan nagyan kadagiti karambada. Maupay ken mariribukda, ket ilemmengda ti rupada.

⁴ Awan ti tudo ket namaga ti daga. Agladingit dagiti mannalon, ilemmengda ti rupada.

⁵ Gapu ta awan ti ruot iti taltalon, baybay-an ti ugsa ti kayyanak nga urbonna.

⁶ Agtakder dagiti atap nga asno iti tapaw dagiti turturod, ket agal-alda a kasla atap nga aso. Kumudrep ti panagkitada, agsipud ta awanen ti arabenda.

⁷ Umasug kaniak dagiti tattaok a kunkunada, ‘Uray no agsaksi dagiti basolmi iti maibusor kadakami, tulongannakam kadi, O Apo, kas inkarim. Namin-adun a naglikudandaka; nagbasolkami kenka.

⁸ Sika laeng ti namnama ti Israel, sika ti mangisalakan kadakami iti pakarigatanmi. Apay a kaska la ganggannaet iti dagami? Mayarigka iti agbibiahe nga agdagus laeng iti maysa a rabii.

⁹ Apay a kaska la nakigtot? Kaska la soldado nga awan gawayna a mangisalakan. Awan duadua, O Apo, nga addaka kadakami, dakami dagiti tattaom; saannakami kadi a baybay-an.’”

¹⁰ Kuna ti Apo maipapan kadagitoy a tattao, “Kayatdak nga itarayan, ket saanda a magawidan dagiti bagida. Iti kasta, diak maragsakan kadakuada. Laglagipekto dagiti dakes nga aramidda, ket dusaekto ida gapu kadagiti basolda.”

¹¹ Kinuna ti Apo kaniak, “Dimo kiddawen a tulongak dagitoy a tattao.

¹² Uray no agayunarda, diakto ipangag ti dawatda. Uray no mangidatagda iti daton a mapuoran ken daton a makan, diakto awaten ida. Papatayekto ketdi ida iti gubat, bisin ken angol.”

¹³ Kalpasanna, kinunak, “O Apo Dios, ammom nga ibagbaga dagiti profeta kadagiti tattao nga awanto ti gubat wenno bisin agsipud ta inkarim. Kunada nga addanto latta talna iti dagami.”

¹⁴ Ngem insungbat ti Apo, “Agul-ulbod dagiti profeta iti naganko. Saanko nga imbaon ida. Awan ti imbilinko kadakuada ket pulos a diak kinasao ida. Saan a naggapu kaniak dagiti sirmata nga ibagbagada. Awan serserbi dagiti padto nga ibagbagada; ar-arapaapda laeng dagita.

¹⁵ Siak, ni Yahweh, ibagak kenka ti aramidekto kadagitoy a profeta a saanko nga imbaon ngem agsaoda iti naganko ket kunada nga awan ti gubat ken bisin a dumteng iti daytoy a daga. Papatayekto ida iti gubat ken bisin.

¹⁶ Kastoyto met ti pannakapapatay dagiti tattao a nangibagaanda kadagitoy. Maiwalangto dagiti bangkayda kadagiti lansangan ti Jerusalem, ket awanto ti mangitanem kadakuada. Mapasamakto amin dagitoy kadakuada, kadagiti assawada, kadagiti annakda a lallaki ken babbai. Pagbayadekto ida gapu iti kinadakesda.”

¹⁷ Imbilin ti Apo kaniak nga ibagak kadagiti tattao ti maipapan iti ladingitko ket kunak: “Aldaw ken rabii nga agarubos koma dagiti luluak, saanak koma a sumardeng nga agsangsangit agsipud ta nasaem ti sugat dagiti tattaok; wen, napalalo ti pannakadunorda.

¹⁸ No mapanak iti taltalon, makitak dagiti bangkay dagiti natay iti gubat. No mapanak kadagiti ili, makitak dagiti tattao a matmatay iti bisin. Itultuloy dagiti profeta ken papadi ti trabahoda ngem saanda nga ammo ti ar-aramidenda.”

Umasug dagiti Tattao ken ni Yahweh

¹⁹ O Apo, tinallikudam aya a namimpinsan ti Juda? Kaguram aya dagiti tattao ti Sion? Apay a dinangrannakami iti kasta unay ket saankam a maimbagan? Sapsapulenmi ti talna, ngem awan ti naimbag a mauraymi. Namnamaenmi ti maagasan, ngem panagdanag ketdi ti maipaay.

²⁰ Nagbasolkami kenka, O Apo; ipudnomi dagiti basbasolmi agraman dagiti kapuonanmi.

²¹ Laglagipem dagiti karim ket dinakam laisen dimo ibabain ti Jerusalem a yan ti nagloriaan a tronom. Tungpalem ti nakitulagam kadakami.

²² Saan a makaited iti tudo dagiti didiosen dagiti nasion; awan kadakuada ti makaited iti arbis. Mangnamnamakami kenka, O Apo a Diosmi, agsipud ta sika laeng ti makaaramid kadagitoy.