Jeremias 10 - Ti Baro a Naimbag a Damag Biblia

Ti Pudno ken ti Saan a Pudno a Panagdaydayaw

¹ Dakayo nga Israelita, ipangagyo ti mensahe ti Apo a para kadakayo.

² Kunana: “Diyo tuladen ti aramid dagiti dadduma a nasion; diyo pagdanagan dagiti pagilasinan iti tangatang, uray no madanagan dagiti nasion.

³ Awan serserbi ti relihion dagitoy a tattao. Mapukan ti kayo iti kabakiran sa makitikitan,

⁴ ket maarkosan iti pirak ken balitok. Mapagkakamang kadagiti lansa tapno saan nga agsisina.

⁵ Saan a makasao dagiti kakastoy nga imahen. Awan dumada iti bambanti iti talon a namulaan iti sandia. Masapul a maawitda, ta dida makapagna. Diyo kabuteng ida, ta didakay an-anoen; ket awan naimbag a maitedda kadakayo.”

⁶ Apo, awan ti kas kenka; nabilegka ket naindaklan ken mannakabalin ti naganmo.

⁷ Siasino ti di agdayaw kenka, sika nga ari dagiti amin a nasion? Rumbeng a madaydayawka. Awan ti kas kenka kadagiti amin a mamasirib kadagiti nasion ken iti amin a pagarianda.

⁸ Nengneng ken maag dagiti amin a mamasirib kadakuada. Ania ti masursuroda kadagiti kayo nga imahen?

⁹ Nakalupkopan dagiti didiosenda iti pirak a naggapu idiay Tarsis ken balitok a naggapu idiay Ufas. Aramid amin ida dagiti kumikitikit ken dagiti platero. Nakawesanda iti lumabaga ken nangingina a lupot nga inaramid dagiti agab-abel.

¹⁰ Ngem sika, O Apo, ti pudno a Dios, sika ti sibibiag a Dios, ken ti agnanayon nga ari. No makapungtotka, agginggined ti daga; saan a maibturan dagiti nasion ti ungetmo. (

¹¹ Dakayo a tattao, ibagayo kadagiti didiosen a madadaeldanto ket awandanton iti uray ania a paset ti lubong. Saanda nga inaramid ti daga ken ti langit.)

Himno a Pagdaydayaw iti Dios

¹² Pinarsua ni Yahweh ti daga babaen iti pannakabalinna; babaen iti siribna, inaramidna ti lubong ken inyukradna dagiti langit.

¹³ No agbilin ni Yahweh, agdaranudor dagiti danum iti tangatang; pagulepenna manipud iti pungto ti daga. Paggilapenna ti kimat iti tudo, ket ibulosna ti angin iti pagiduldulinanna.

¹⁴ Maag ken nengneng dagiti amin a tattao; maibabain dagiti agar-aramid iti imahen ta saan a pudno ken awan biag dagiti didiosen a partuatda.

¹⁵ Awan serserbida ket rumbeng a malaisda; madadaeldanto inton ukomen ni Yahweh ida.

¹⁶ Saan a kasta ti Dios ni Jacob. Isu ti nangaramid iti amin a banag; pinilina dagiti Israelita a tattaona. Yahweh a Mannakabalin-amin ti naganna.

Ti Umay a Pannakadadael ti Juda

¹⁷ Tattao ti Jerusalem, linakubdakayon dagiti kabusor! Alaenyo dagiti sanikuayo.

¹⁸ Pagtalawennakayon ti Apo, ket ibellengnakayo iti sabali a daga—dadaelennakayo, agingga nga awan ti matda kadakayo. Daytoy ti sao ti Apo.

¹⁹ Agasug dagiti tattao ti Jerusalem. Kunada, “Nagkaro ketdin dagiti sugsugatmi! Saanda a maimbagan! Impagarupmi a maibturanmi daytoy!

²⁰ Nadadael dagiti toldami; napugsaten dagiti tali a galutda. Nagtalawen dagiti lallaki nga annakmi, awanen mangbangon manen iti toldami, awanen ti mangibitin iti kurtinada.”

²¹ Insungbatko, “Nengneng dagiti pangulotayo; saanda a paidalan iti Apo. Daytoy ti gapuna a saanda a nagballigi; ket naiwarawara dagiti tattaotayo.

²² Denggenyo! Adda damag! Adda dakkel a karibuso nga aggapu iti nasion ti amianan. Dagiti armadana paglangalangenna dagiti siudad ti Juda, pagbalinenna a taeng dagiti lobo.”

²³ O Apo, ammok nga awan ti tao a makaikeddeng iti pagtungpalanna; awan ti makaituray iti biagna.

²⁴ Isurom dagiti tattaomi, O Apo; ngem dinakam unay kadi ingetan wenno dusaen no makapungtotka, ta dayta ti kanibusananmi.

²⁵ Idissuormo ti pungtotmo kadagiti nasion a di agdaydayaw kenka, kadagiti tattao a manglaksid kenka. Pinatayda dagiti tattaom, namimpinsan a dinadaeldakami ket binaybay-anda a rebrebba ti pagilianmi.