Isaias 62 - Ti Baro a Naimbag a Damag Biblia

¹ Agsaoak tapno pumigsa ti pakinakem ti Jerusalem; diak agulimek agingga a di maisalakan ti siudad, ket agraniag ti balligina a kas silaw iti rabii.

² Jerusalem, makitanto dagiti nasion ti panagballigim! Makitanto dagiti arida ti dayagmo. Addanto baro a naganmo, nagan nga ited a mismo ti Apo.

³ Agbalinkanto a napintas a korona iti ima ti Apo.

⁴ Saankanton a maawagan iti “Nabaybay-an,” dinto met maawagan ti dagam iti “Asawa a Napanawan.” Baro a naganmonto ti “Isu ti Ipangpangruna ti Dios.” Maawaganto ti dagam iti “Naragsak a Naasawaan,” gapu ta maragsakan ti Apo kenka, ket ibilangnanto ti dagam a kas asawa.

⁵ Kas iti lalaki nga agtutubo, a mangasawa iti ubing a balasang, Isu a nangbukel kenka alaennaka a kas asawa. Kas iti nobio a maragsakan iti ay-ayatenna, Kastanto met a maragsakan ti Dios kenka.

⁶ Kadagiti bakudmo, Jerusalem, nangikabilak kadagiti guardia; aldaw man wenno rabii, awan panagulimekda, masapul nga ipalagipda iti Apo dagiti karina tapno saanna a malipatan ida.

⁷ Masapul a dida pagtalnaen agingga a bangonenna ti Jerusalem ket pagbalinenna a siudad a daydayawen ti entero a lubong!

⁸ Insapata ti Apo a babaen iti bilegna, ibanagna nga ibanag daytoy: “Dinton kanen ti kabusoryo ti taraonyo, dinton inumen dagiti ganggannaet ti arakyo.

⁹ Ngem dakayo a nangimula ken nangapit iti trigo dakayto ti mangan iti tinapay ket idaydayawyo ti Apo! Dakayo a nangaywan ken nagburas kadagiti ubas, dakayto ti uminum iti arak iti paraangan ti Templo.”

¹⁰ Tattao ti Jerusalem, rummuarkayo iti siudad, ket agaramidkayo iti kalsada a pagnaan dagiti agsubli a kailianyo. Mangisaganakayo iti nalawa a dalan; ikkatenyo dagiti batbatona. Mangikabilkayo iti pagilasinan

¹¹ a pakaammoan dagiti nasion a kastoy ti ipakaammo ti Apo iti amin a daga: “Ibagayo kadagiti tattao ti Jerusalem nga umayen ti Apo a mangisalakan kadakayo, ket yegna dagiti tattao nga inispalna!”

¹² Maawagankayto iti “Nasantoan a Tattao ti Dios,” “Tattao nga Insalakan ti Apo!” Maawaganto ti Jerusalem iti “Siudad nga Ay-ayaten ti Dios,” “Ti Siudad a Saan a Binaybay-an ti Dios.”