Isaias 6 - Ti Baro a Naimbag a Damag Biblia

Ayaban ti Dios ni Isaias nga Agbalin a Profeta

¹ Idi tawen a pannakatay ni Ari Uzzias, nakitak ti Apo. Situtugaw iti nangato a tronona. Agsaringgayad ti gayadan ti kagayna iti entero a Templo.

² Iti likmutna, sitatakder dagiti umap-apuy a parsua. Innem ti payak ti tunggal maysa—dua ti nangabbong iti rupa, dua iti bagi, ket ti dua usarenda nga agtayab.

³ Ipukpukkawda iti tunggal maysa: “Santo, santo, santo! Nasantoan ti Apo a Mannakabalin-amin! Napno ti lubong iti dayagna.”

⁴ Gapu iti pigsa ti timekda, nadayeg ti fondasion ti Templo. Napno ti mismo a Templo iti asuk.

⁵ Kinunak, “Asiak pay! Awanen ti namnamak! Dakes amin nga agaon iti ngiwatko ket agnaedak iti sidong dagiti tattao a narugit ken dakes ti tunggal ibalikasda. Nupay kasta, nakitak kadagiti mismo a matak ti Ari, ti Apo a Mannakabalin-amin!”

⁶ Timmayab nga immay kaniak ti maysa kadagiti parsua. Siiiggem iti beggang a sinipitna iti altar.

⁷ Insagidna ti beggang kadagiti bibigko ket kinunana, “Naisagid daytoy kadagiti bibigmo ket ita, nadalusankan ket napakawanen dagiti basolmo.”

⁸ Nangngegko a kinuna ni Yahweh, “Siasino ti ibaonko? Siasino ti ibaontayo?” Insungbatko, “Adtoyak! Ibaonnak!”

⁹ Kinunana, “Inka ibaga daytoy a mensahe kadagiti tattao: ‘Uray no ipasnekyo ti dumngeg, diyo maawatan. Uray ipasnekyo ti kumita, diyo ammo ti mapaspasamak.’”

¹⁰ Ket kinunana kaniak, “Pagkunengem ti panunot dagitoy a tattao, pagtulengem ken pagbulsekem ida tapno dida makakita wenno makangngeg wenno makaawat. Ta no saanmo nga aramiden, amangan no agsublida kaniak ket maimbaganda.”

¹¹ Sinaludsodko, “Kasano ti kabayagna a kastoy, O Apo?” Insungbatna, “Agingga a madadael dagiti siudad ket awanen agnaed. Agingga nga awanen agnaed kadagiti balbalay. Agingga nga aglangalang a mamimpinsan ti daga.

¹² Pagtalawekto dagiti tattao ket aglangalang ti entero a daga.

¹³ Uray maysa iti sangapulo a tattao ti mabati iti daga, madadaelto met. Mayarigto iti napukan a lugo a ti laeng puonna ti matda.” (Ti puon ti mangipakita iti baro a pangrugian dagiti tattao ti Dios.)