Isaias 52 - Ti Baro a Naimbag a Damag Biblia

Wayawayaanto ti Dios ti Jerusalem

¹ Jerusalem, bumilegka ket ipakitam ti kinatan-okmo manen! Nasantoan a siudad ti Dios, yarruatmo ti nadaeg a kawesmo! Dinton sumrek kadagiti ruanganmo dagiti saan a mamati iti Dios.

² Wayawayaam ta bagim, Jerusalem. Bumangonka iti ayanmo a tapok, ket agtugawka iti tronom. Ikkatenyo dagiti kawaryo, dakay a balud nga annak ti Sion!

³ Kuna ti Apo a Dios kadagiti tattaona, “Awan kuarta a naibayad idi nailakokayo a kas tagabu. Awanto met ti maibayad iti pannakawayawayayo.

⁴ Idi napankayo nagnaed a kas ganggannaet idiay Egipto, napankayo a kas pagayatanyo. Nupay kasta, pinilitnakayo nga intalaw ti Asiria ket awan ti naibayad kadakayo.

⁵ Kasta met la ti napasamak idiay Babilonia. Naibaludkayo ngem awan ti naibayad iti pannakawayawayayo. Agpangas ken agpalangguad dagiti mangituray kadakayo, ket kanayon nga iparangarangda ti pananglaisda kaniak.

⁶ Ngem dumtengto ti tiempo a mabigbigyo a siak, ni Yahweh, ti agsasao kadakayo.”

⁷ Nagpintas ketdin nga imatangan ti naibaon a sumungsungad iti bantay! Umayna ipakaammo kadagiti kabambantayan ti naimbag a damag ti kappia! Ipakaammona ti balligi ket kunana, “Agarin ti Diosmo, Sion!”

⁸ Agpukpukkaw dagiti guardia ti siudad, sangsangkamaysada nga umkis iti ragsak! Makitada a silalatak ti panagsubli ni Yahweh iti Sion!

⁹ Agdir-ikayo gapu iti rag-o, dakayo a narpuog a disso ti Jerusalem! Ispalento ti Apo ti siudadna, ket liwliwaennanto dagiti tattaona.

¹⁰ Aramaten ti Apo ti bilegna a nasantoan; isalakanna dagiti tattaona, ket makita ti sangalubongan.

¹¹ Pumanawkayo, pumanawkayo iti Babilonia, dakay a mangaw-awit kadagiti nasagradoan nga alikamen! Diyo sagiden ti aniaman a maiparit; pasantoenyo dagiti bagbagiyo, ket panawanyo ti siudad.

¹² Ita, saan a nasken nga aggangganatkayo; saan a masapul nga aglibaskayo. Agyanto ti Apo a Diosyo iti sangoananyo, bantayannakayto iti likudanyo.

Ti Agsagsagaba nga Adipen

¹³ Kuna ni Yahweh, “Agballiginto ti adipenko iti aramidna; maitan-ok ken maidaydayawto iti kasta unay.

¹⁴ Adu a tao ti nakigtot idi makitada; limmaad ket kasla saan a tao ti langana.

¹⁵ Ngem ita, adunto a nasion ti masdaaw kenkuana, ket saanto a makasao dagiti ari gapu iti siddaawda. Makita ken maawatandanto ti pulos a dida pay naammoan.”