Isaias 51 - Ti Baro a Naimbag a Damag Biblia

Balikas a Pangliwliwa iti Sion

¹ Kuna ti Apo, “Denggendak, dakay a mayat a maisalakan, dakayo nga umay agpatulong kaniak: Lagipenyo ti bato a nagtaudanyo, panunotenyo ti abut a nakaaonanyo.

² Lagipenyo ni Abraham a kapuonanyo ken ni Sara a nangipasngay kadakayo. Idi ayabak ni Abraham, awan putotna ngem binendisionak ket inikkak kadagiti annak; pinaaduk dagiti kaputotanna.

³ “Kaasiakto ti Sion, ken amin nga agnaed kadagiti rebrebbana. Uray no let-ang ti dagana, pagbalinekto a minuyongan, kas iti inaramidko idiay Eden. Addanto sadiay ti rag-o ken ragsak; addanto met dagiti kanta a pangidaydayaw ken pagyaman kaniak.

⁴ “Denggendak, dakay a tattaok, ipangagyo ti innak ibaga: Ipakaammok ti pannursurok kadagiti nasion; agbalinto ti hustisiak a lawag kadakuada.

⁵ Darasekto nga isalakan ida; asidegen ti panagballigik. Siakto a mismo ti mangituray kadagiti pagilian. Ur-urayen dagiti adayo a daga ti yaayko, segseggaanda ti panangisalakanko kadakuada.

⁶ Tumangadkayo iti langit, kitaenyo ti daga! Kaslanto asuk nga agpukaw ti langit; marunotto ti daga a kas iti daan a pagan-anay, ket matayto a kasla ngilaw dagiti amin a tattaona. Ngem agpautto iti agnanayon nga awan inggana ti panangisalakan a yegko; agnanayonto ti pannakabalinko a mangispal.

⁷ “Denggendak, dakay a makaammo iti nalinteg, dakay a mangipapuso iti pannursurok. Dikay agbuteng no lalaisen ken um-umsiendakayo dagiti tattao;

⁸ main-inutdanto a marunot a kas iti sinanga a lupot! Ngem agpautto iti agnanayon ti panangisalakan a yegko; agpautto iti amin a tiempo ti pannakabalinko a mangisalakan.”

⁹ Agriingka, O takiag ti Apo, ket tulongannakami! Aramatem ti bilegmo ket isalakannakami; aramatem a kas iti inaramidmo kadagiti nagkauna a tiempo, idi rinangrangkaymo ni Rahab.

¹⁰ Sika pay ti nangpamaga iti taaw, ket nangaramidka iti dalan nga aglasat iti danum tapno makaballasiw dagiti tattao nga insalakanmo.

¹¹ Siraragsakto a makadanon idiay Jerusalem dagiti inispalmo; agkakanta ken agpukpukkawdanto iti rag-o. Naragsakdanto iti agnanayon nga awan inggana. Pulos nga awanton ti ladingit ken leddaangda.

¹² Kuna ti Apo, “Siak ti mangpapigsa kadakayo. Apay a kabutengyo ti tao a kasla ruot a mabiit a matay?

¹³ Nalipatanyo kadin ti Apo? Isu ti nangparsua kadakayo, isu ti nangyukrad iti langit ken nangipasdek iti fondasion ti daga. Apay a kanayon nga agbutengkayo iti pungtot dagiti mangidadanes, ken sisasagana a mangdadael kadakayo? Didakay an-anoen ti pungtotda!

¹⁴ Mawayawayaanton dagiti balud; atiddogto ti biagda, addanto amin a taraon a masapulda.

¹⁵ “Siak ni Yahweh a Diosyo; kiburek ti baybay ket pagdaranudorek dagiti dalluyonna. Yahweh a Mannakabalin-amin ti naganko!

¹⁶ Inyukradko ti langit, ket impasdekko ti fondasion ti daga. Kunak iti Jerusalem, ‘Dakayo ti tattaok! Intedko kadakayo ti pannursurok, ket siak a mismo ti mangsalaknib kadakayo.’”

Aggibus ti Panagsagaba ti Jerusalem

¹⁷ Jerusalem, agriingka! Agmurmurayka ket bumangonka! Ininummo ti kopa ti pannakadusa nga impainum ti Apo kenka gapu iti pungtotna; inarub-obmo ket nagbasingbasingka!

¹⁸ Awan ti mangidalan kenka, awan kadagiti tattaom ti mangibin kenka.

¹⁹ Dua a didigra ti nagdissuor kenka; immay ti gubat a nangdadael iti dagam ket nagbisin dagiti tattaom. Awan ti mangngaasi kenka.

²⁰ Iti nagsulian ti tunggal kalsada, mapasag dagiti tattaom iti kapsutda; kasda la ugsa a natiliw iti silo ti mangnganup. Nariknada ti bara ti pungtot ti Dios.

²¹ Dakay nga agsagsagaba iti Jerusalem, dakayo nga agbasingbasing a kasla nabartek,

²² salaknibannakayo ti Apo a Diosyo ket kunana: “Alaek ti iggemyo a kopa nga intedko kadakayo gapu iti pungtotko. Dinton masapul nga inumenyo ti arak a mamagbasingbasing kadakayo.

²³ Itedkonto kadagiti nangparparigat kadakayo, kadagiti nangipaidda kadakayo kadagiti kalsada, ket kaskayo la rugit a binaddebaddekanda.”