Isaias 47 - Ti Baro a Naimbag a Damag Biblia

Ti Pannakaukom ti Babilonia

¹ Kuna ni Yahweh, “Bumabaka iti tronom, Babilonia, ket agtugawka iti tapok iti daga. Mayarigka idi iti maysa a birhen, maysa a siudad a di pay naparmek. Saankan a nalibnos, nagkupasen pintasmo! Maysakan a tagabu!

² Alaem ti gilingan ket aggilingka iti arina! Ikkatem ta dalungdongmo, uksobem ta napintas a bado ket ballasiwem dagiti karayan.

³ Makitadanto ti kinalamolamom a kas babai a tagabu, maimatangandanto ti pannakaipababa ken pannakaibabainmo. Agibalesakto ket awan ti makaatipa.”

⁴ Wayawayaannatayo ti Nasantoan a Dios ti Israel— Yahweh a Mannakabalin-amin ti naganna!

⁵ Kuna ni Yahweh iti Babilonia, “Agtugawka iti naulimek ken nasipnget a lugar; didakanton awagan iti reyna dagiti pagilian!

⁶ Nakaungetak kadagiti tattaok, ket diak imbilang idan a kukuak. Inyawatko ida iti pannakabalinmo, ket saanmo a kinaasian ida, uray dagiti duduogan pinarigatmo ida.

⁷ Impagarupmo nga agnanayonto a reynaka, ket dimo impapuso dagitoy a bambanag; dimo pinanunot no anianto ti pagbanagan ti amin.

⁸ “Denggem, sika a naayat iti ragragsak, sika a mangipagarup a natalged ken awan pakaan-anoam. Kunam a naindaklanka a kas iti Dios, nga awan ti sabali a kas kenka. Impagarupmo a dika mabalo, wenno saan a matay dagiti annakmo.

⁹ Ngem iti apagkanito, iti maysa la nga aldaw, mapasamakto kenka dagitoy dua a banag. Uray aramidem amin a panagsalamangkam, matayto dagiti annakmo ket mabalokanto.

¹⁰ “Impagarupmo a natalgedka iti kinadakesmo; kinunam nga awan ti makakita kenka. Inyaw-awannaka ti sirib ken ti ammom, ket kinunam iti bagim, ‘Mannakabalinak, awan ti nalalaing ngem siak!’

¹¹ Agdissuorto kenka ti didigra; dimonto mapasardeng babaen iti panagsalamangkam. Kellaatto a dumteng kenka ti pannakadadael, pannakadadael a dimo impagarup!

¹² “Itultuloymo latta ti panagsalamangka ken panaganitom; inaramatmo dagitoy manipud kinaubingmo. Nalabit a matulongandakanto, nalabit a makigtotmo dagiti kabusormo.

¹³ Awan bilegmo uray pay bagbagaandaka. Bay-am nga umay dagiti astrologo a mangisalakan kenka— dagiti tattao a mangad-adal kadagiti bituen, dagiti mamaglalasin iti beddeng dagiti langit. Bay-am nga ibagada dagiti amin a mapasamak kenka iti tunggal bulan.

¹⁴ “Arigdanto kadagiti garami a mapuoran! Didanto pay maisalakan dagiti bagbagida, ta napudot unay ti gil-ayab, saan a kas iti apuy a paginudoan.

¹⁵ Daytoy ti pangiturongan kenka ti pammagbaga dagitoy nga astrologo a nakium-umanam bayat ti panagbiagmo. Panawandakanto ket mapandanto iti kaykayatda; awanto ti mabati a mangisalakan kenka.”