Isaias 42 - Ti Baro a Naimbag a Damag Biblia

Ti Adipen ni Yahweh

¹ Kuna ti Apo, “Adtoy ti adipenko nga itan-okko— ti pinilik ken ti pakaay-ayoak. Intedko ti Espirituk kenkuana ket yegnanto ti hustisia kadagiti pagilian.

² Dinto agpukkaw, dinanto ipigsa ti timekna, ket dinto agbitla kadagiti kalsada.

³ Naasinto kadagiti nakapsut, ket tulongannanto dagiti awan gawayna. Yegnanto ti agnanayon a hustisia iti amin a tattao.

⁴ Dinanto pukawen ti namnama wenno ti turedna, ket ipasdeknanto ti kinalinteg iti daga. Sigagagar dagiti adayo a daga a mangur-uray iti pannursurona.”

⁵ Pinarsua ti Dios dagiti langit, inukradna ida; sinukogna ti daga ken amin a parsua iti rabawna; inikkanna iti biag ken anges dagiti agnaed iti daga. Ita, kuna ti Apo a Dios iti adipenna:

⁶ “Siak, ni Yahweh, inayabanka; inikkanka iti pannakabalin tapno kitaem a maipakat ti hustisia iti daga. Sika ti pannakabagik a makitulagto kadagiti amin a tattao; pannakabagika a mangyeg iti lawag kadagiti pagilian.

⁷ Luktamto ti panagkita dagiti bulsek, ket wayawayaamto dagiti naipisok iti nasipnget a pagbaludan.

⁸ “Siak ni Yahweh, dayta ti naganko. Awan ti didiosen a mairanud iti dayagko; diak ipalubos dagiti imahen a mairaman iti pannakaidaydayawko.

⁹ Natungpalen dagiti impadtok idi un-unana. Ita, baro a bambanag ti ibagak kadakayo sakbay a mapasamakda.”

Kanta a Pagdaydayaw

¹⁰ Kantaanyo ti Apo iti baro a kanta; dakayo iti lubong, kantaenyo ti pagdaydayaw kenkuana! Idaydayawyo, dakayo nga aglayag iti baybay; idaydayawyo, dakayo amin a parsua iti taaw! Agkantakayo, dakayo nga adayo a daga, ken amin nga agnaed sadiay!

¹¹ Idaydayaw koma ti let-ang ken dagiti ilina ti Dios; idaydayaw met koma dagiti tattao ti Kedar. Umkis koma iti rag-o dagiti agnaed iti siudad ti Sela; manipud kadagiti tapaw dagiti bambantay agikkisda koma!

¹² Dagiti agnaed iti adayo a daga idaydayaw ken itan-okda koma ni Yahweh!

¹³ Rummuar ni Yahweh a kas maingel a tao, sisasagana ken sigagagar a makiranget. Agpukkaw a mangipakdaar iti gubat; ipakitana kadagiti kabusorna ti bilegna.

Ikari ti Dios a Tulonganna dagiti Tattaona

¹⁴ Kuna ti Dios, “Nabayagen a nagulimekak; diak sinungbatan dagiti tattaok. Ngem dimtengen ti tiempo a panagtignayko; agikkisak a kas iti agpasikal.

¹⁵ Dadaelekto dagiti turod ken bantay, malaylayto dagiti ruot ken kayo. Pagbalinekto a let-ang dagiti karayan, ket pagmagaekto dagiti dan-aw.

¹⁶ “Idalankonto dagiti bulsek a tattaok kadagiti dalan a dida pay nagnaan. Pagbalinekto a lawag ti sipnget nga ayanda; pasayaatekto dagiti lasong-lasong a disso. Aramidek dagitoy nga awan duadua.

¹⁷ Maipababa ken maibabainto dagiti amin nga agtalek iti sinan-dios ken mangibilang kadagiti kinitikitan nga imahen a didiosenda.”

Saan a Makasursuro ti Israel

¹⁸ Kuna ti Apo, “Dumngegkayo, dakay a tuleng, kumitakayo a naimbag, dakay a bulsek!

¹⁹ Adda aya nabulbulsek ngem ti adipenko? Adda aya natultuleng ngem ti ibaonko?

²⁰ Israel, adun a bambanag ti nakitam ngem pulos nga awan aniamanda kenka. Addaanka iti lapayag a pagdengngegmo ngem ibagam man ti kaipapanan ti nangngegmo?”

²¹ Maysa a Dios ti Apo a sigagagar a mangisalakan, isu nga intan-okna dagiti linteg ken pannursurona, ket tinarigagayan a tungpalen ida dagiti tattaona.

²² Ngem nasamsam dagiti sanikuada, naipisokda kadagiti nasipnget a bartolina, ket naipupokda kadagiti pagbaludan. Natakaw ken naagaw dagiti sanikuada, ngem awan ti nangispal kadakuada.

²³ Adda kadi mayat a dumngeg iti daytoy? Manipud ita, ipasnekyo kadi ti dumngeg?

²⁴ Siasino ti nangyawat iti Israel kadagiti agsamsam? Ti met la Apo a nakabasolantayo! Ditay nagbiag a mayannurot iti pagayatanna wenno nagtulnog kadagiti pannursurona.

²⁵ Iti kasta, indissuorna kadatayo ti pungtotna, ket sinagabatayo ti kinadawel ti gubat. Kasla apuy ti ungetna a nanguram iti Israel ngem ditay ammo idi ti mapaspasamak; pulos a saantayo a nagnakem.