Isaias 40 - Ti Baro a Naimbag a Damag Biblia

Dagiti Balikas a Mangted iti Namnama

¹ “Liwliwaenyo dagiti tattaok,” kuna ti Diostayo. “Wen, liwliwaenyo ida.

² Paregtaenyo dagiti tattao ti Jerusalem. Ibagayo kadakuada nga umdasen ti nabayag a panagsagsagabada, ket napakawanen dagiti basbasolda. Naan-anay ti panangdusak kadakuada gapu kadagiti amin a basolda.”

³ Adda timek a mangipukpukkaw: “Iti let-ang, mangisaganakay iti dalan ti Apo! Dalusanyo ti dalan iti let-ang a pagnaan ti Diostayo!

⁴ Gaburanyo dagiti amin a tanap; palanasenyo amin a bambantay. Pagbalinenyo a patad dagiti turod, palantagenyo dagiti lasonglasong a lugar.

⁵ Maiparangarangto ti dayag ti Apo, ket makitanto ti amin a tattao. Ti Apo a mismo ti nangikari iti daytoy.”

⁶ Adda timek a mangipukkaw, “Ipakaammom!” Saludsodek: “Ania ti ipakaammok?” “Ipakaammom a mayarig iti ruot ti amin a tao, agpautda a kas iti balang a sabong.

⁷ Magango ti ruot, malaylay ti sabong no dalapusen ida ti angin nga ibaon ni Yahweh. Kinapudnona, mayarig laeng ti tao iti ruot.

⁸ Wen, magango ti ruot ken malaylay ti sabong, ngem mataginayon ti sao ti Diostayo!”

⁹ Inka iti tapaw ti nangato a bantay, O Jerusalem; ipakaammom ti naimbag a damag! Pigsaam ti agpukkaw, Sion; iwaragawagmo ti naimbag a damag! Agsaoka ket saanka nga agamak. Ibagam kadagiti il-ili ti Juda nga umayen ti Diosda!

¹⁰ Umay ni Apo Dios tapno agturay iti amin a bilegna, itugotna dagiti tattao nga insalakanna.

¹¹ Aywanannanto ti arbanna a kas iti agpaspastor iti animalna. Ummongennanto dagiti urbon ti karnero ket sakruyenna ida; siaanusto a mangidalan kadagiti innada.

Awan Umasping iti Dios ti Israel

¹² Adda kadi makasukat iti linaon ti taaw kadagiti dakulapna wenno makarukod iti langit babaen iti panangdanganna? Adda aya makaikarga iti amin a daga iti maysa a tasa wenno makatimbang kadagiti bantay ken turod?

¹³ Adda kadi makaibaga iti Apo iti aramidenna? Adda kadi makaisuro wenno makabalakad kenkuana?

¹⁴ Siasino ti nakiumanan ti Dios tapno maaddaan iti lawag? Siasino ti nangisuro kenkuana iti pudno a dalan? Siasino ti nakaadalanna iti wagas ti pannakaawat?

¹⁵ Iti imatang ti Apo, awan serserbi dagiti nasion; mayarigda laeng iti sangkatedted a danum, dagiti adayo a puro nalag-anda a kas iti tapok.

¹⁶ Di umanay dagiti animal ti Libano a maidatag a kas daton iti Diostayo; nakurang a pagsungrod dagiti kayo sadiay!

¹⁷ Awan serserbi dagiti nasion iti imatangna, awan kapaypay-anda amin a sangapada.

¹⁸ Siasino ti pakaipadaan ti Dios? Mabalinmo kadi nga iladawan ti langana?

¹⁹ Saan a kas iti imahen a nakalupkopan iti balitok ken naimontar iti pirak.

²⁰ Pumili ti tao iti kayo a di bakabaken no dina kabaelan ti pirak wenno balitok. Sumapul iti kumikitikit ket paaramidna a didiosen nga adda pagsaadanna tapno di matuang.

²¹ Diyo kadi ammo? Diyo aya nadamag? Awan kadi nangibaga kadakayo idi un-unana? Diyo kadi nangngeg no kasano a nangrugi ti lubong?

²² Pinarsua ti agtugtugaw iti tronona iti ngatoen ti timbukel ti daga; kasla dudon ti kababassit dagiti tattao iti baba! Inukradna ti langit a kas iti kurtina, kas iti tolda a pagnaedan.

²³ Rippuogenna dagiti nabileg nga agtuturay, ket pagbalinenna ida nga awan serserbina.

²⁴ Mayarigda kadagiti naganus a mula nga apagtubo ken apagramut. No mangyeg ti Apo iti angin magangoda ket kasda la arutang a maitayab.

²⁵ Siasino ti pakaipadaan ti Nasantoan a Dios? Adda kadi umasping kenkuana?

²⁶ Tumangadkayo iti tangatang! Siasino ti nangparsua kadagiti bituen a makitayo? Ti mangidalan kadakuada a kasla armada, ammona no mano ti bilangda, ket awaganna ti nagan ti tunggal maysa! Dakkel unay ti bileg ken pannakabalinna, awan ti mapukaw uray maysa kadakuada!

²⁷ Apay nga agririka, Israel? Apay a kunam a di ammo ti Apo dagiti parikutmo ket saan a pasayaaten ti Dios ti kasasaadmo?

²⁸ Diyo kadi ammo? Diyo aya nadamag? Ti Apo ti agnanayon a Dios; pinarsuana ti entero a lubong. Pulos a di mabannog wenno kumapsut; awan makatukod iti pampanunotenna.

²⁹ Papigsaenna dagiti nakapuy ken nabannog.

³⁰ Uray dagiti agkabannuag kumapsutda, ket dagiti agtutubo mapaksuyanda.

³¹ Ngem dagiti agpannuray iti Apo mapabaronto ti pigsada. Agtayabdanto a kasla iti agila; saandanto a mabannog no agtarayda, saandanto a kumapsut no magnada.