Isaias 4 - Ti Baro a Naimbag a Damag Biblia

¹ Inton dumteng dayta a tiempo, pitonto a babbai ti manggammat iti maysa a lalaki ket kunada, “Mataraonan ken makawesanmi ti bagimi, ngem pangngaasim ta ibagam a sika ti asawami tapno dikam maibabain gapu iti kaawan asawami.”

Maipasdek Manen ti Jerusalem

² Dumtengen ti tiempo a padakkelen ken pasantaken ni Yahweh ti amin a mula ken kayo iti daga. Pagtangsit ken pagragsakanto dagiti natda nga Israelita dagiti maapit iti daga.

³ Maawaganto iti nasantoan dagiti amin a nabati idiay Jerusalem, dagiti pinili ti Dios a makalasat.

⁴ Usarento ni Yahweh ti pannakabalinna a mangukom ken mangdalus iti nasion ket mapakawan ti basol ti Jerusalem ken maikkat ti dara a naibuyat sadiay.

⁵ Kalpasanna, mangyegto ni Yahweh iti ulep ken asuk ken naraniag nga apuy iti ngatoen ti Bantay Sion ken dagiti amin a naurnong sadiay. Agparangto ti ulep iti aldaw ket ti asuk ken apuy iti rabii. Kumotan ken salaknibanto ti dayag ti Dios ti entero a siudad.

⁶ Agserbinto ti dayagna a linong ti siudad iti pudot ti aldaw, ket pagbalinennanto a natalged a disso, maysa a pagkamangan no agtudo ken agbagio.