Isaias 38 - Ti Baro a Naimbag a Damag Biblia

Agsakit ken Umimbag ni Ari Hezekias

¹ Iti dayta met la a tiempo, nagsakit ni Ari Hezekias ket dandani matay. Sinarungkaran ni profeta Isaias nga anak ni Amoz ket imbagana kenkuana, “Kuna ti Apo a masapul nga urnosem ti amin agsipud ta saankan nga umimbag. Agsaganaka iti ipapataymo.”

² Simmango ni Hezekias iti diding ket indawatna:

³ “O Apo, laglagipem a nagserbiak kenka a sipapasnek ken sipupudno ket inkagumaak nga aramiden ti kayatmo nga aramidek.” Ket rinugianna ti nagsangit iti nasaem.

^4-5 Binilin ni Yahweh ni Isaias nga agsubli ken ni Hezekias ket ibagana kenkuana, “Siak ni Yahweh a Dios ni David a kapuonam, nangngegko ti kararagmo ken nakitak dagiti luam. Ikkanka pay iti sangapulo ket lima a tawen a panagbiagmo.

⁶ Ispalenka ken daytoy a siudad ti Jerusalem iti pannakabalin ti ari ti Asiria ket ituloyko a salakniban ti siudad.”

²¹ Imbaga ni Isaias iti ari nga agpalebbek iti bunga ti igos sana itapal iti letteg ni Hezekias tapno umimbag.

²² Sinaludsod ni Hezekias, “Ania ti pagilasinan a mangipaneknek a makapanakto iti Templo?”

⁷ Insungbat ni Isaias, “Ikkannaka ti Apo iti pagilasinan a mangipaneknek a tungpalenna ti karina.

⁸ Iti pagorasan iti init nga inaramid ni Ari Ahaz, pagsubliento ti Apo ti anniniwan iti sangapulo a gerger.” Ket nagsubli ti anniniwan iti sangapulo a gerger iti pagorasan.

⁹ Kalpasan ti yiimbag ni Hezekias, pinutarna daytoy a kanta a pagdaydayaw:

¹⁰ Impagarupko nga iti kabambannuagak innakon iti lubong dagiti natay, ket sadiaykon aginggat' panungpalan.

¹¹ Impagarupko a ditoy lubong dagiti sibibiag saankon a makita ti Apo wenno uray maysa a sibibiag a tao.

¹² Nakeltay toy biagko ket nagpatingga, kas iti naakas a tolda. Napessat a kas iti lupot iti pagablan, ket impagarupko a ginibusanen ti Dios ti biagko.

¹³ Nagpatpatnag a nagsangitak iti ut-ot, kasla tuktukkolen ti leon dagiti tultulangko. Impagarupko a ginibusanen ti Dios ti biagko.

¹⁴ Nakapuy ken di makasngaw ti timekko, kaslaak kalapati iti panagas-asugko. Nabannog dagitoy matak a tumangtangad iti langit; O Apo, ispalennak kadagitoy amin a rigat.

¹⁵ Ngem ania ti masaok? Inaramid daytoy ti Apo. Nasakit ti nakemko ket diak makaturog. Nagsao kaniak ket inaramidna daytoy.

¹⁶ O Apo, agbiagak a maipaay kenka; wen, sika laeng ti pagpaayak. Isublim ti napukaw a pigsak tapno umatiddog pay daytoy biag.

¹⁷ Agbalinto a talna ti sakit ti nakemko. Ispalem ti biagko iti amin a peggad; pakawanem amin a basbasolko.

¹⁸ Awan ti mangidaydayaw kenka iti lubong dagiti natay; dagiti pimmusay dida makapagtalek iti kinapudnom.

¹⁹ Dagiti sibibiag ti mangidaydayaw kenka a kas iti panangidaydayawko kenka ita. Ipakaammo dagiti amma kadagiti annakda ti kinapudnom.

²⁰ Pinaimbagnak, O Apo! Agarpakamto ket ikantami ti pagdaydayaw kenka. Iti uneg ti templom, agkantakamto iti pagdaydayaw iti unos ti panagbiagmi.