Isaias 35 - Ti Baro a Naimbag a Damag Biblia

Ti Dalan ti Kinasanto

¹ Agragsakto ti let-ang, ket agukradto dagiti sabong iti naglangalang a daga.

² Agkantanto ti let-ang ket umkisto iti ragsakna; napintasto a kas iti Bantay Libano, nadam-egto a kas kadagiti taltalon ti Carmel ken ti Saron. Makitanto ti amin ti dayag ti Apo; makitadanto ti kinatan-ok ken pannakabalinna.

³ Papigsaenyo dagiti nabannog nga ima, patibkerenyo dagiti agkutukot a tumeng.

⁴ Ibagayo kadagiti amin a naupay: “Dikay agbutbuteng, tumuredkayo! Umaynakay ispalen ti Diosyo, ket umayna balsen dagiti kabusoryo.”

⁵ Makakitanton dagiti bulsek, ket makangngegton dagiti tuleng.

⁶ Aglagto ken agsalanto dagiti pilay, ket agkantanto dagiti umel gapu iti rag-o. Agayusto ti danum iti let-ang;

⁷ agbalinto a dan-aw ti dumardarang a kadaratan, ket agubbogto ti namaga a daga. Dagiti ruruot agbalindanto a tanubong ken runo iti lugar a taeng idi dagiti atap nga aso.

⁸ Sadiay, addanto dakkel a kalsada, maawaganto iti “Nasantoan a Dalan.” Saanto a magna sadiay dagiti managbasol; awanto ti maag a mangyaw-awan kadagiti agdaliasat sadiay.

⁹ Awanto ti agnaed a leon wenno ti narungsot nga animal nga agdaliasat sadiay. Iti dayta a dalan, magnanto dagiti sinubbot ti Apo.

¹⁰ Naragsakdanto a dumanon idiay Jerusalem; agkankanta ken agpukpukkawdanto gapu iti ragsakda. Naragsakdanto iti awan inggana, agnanayonto nga awan ti leddaang ken ladingitda.