Isaias 32 - Ti Baro a Naimbag a Damag Biblia

Ti Nalinteg nga Ari

¹ Dumtengto ti aldaw nga agturayto ti maysa a natakneng nga ari. Tumaudto dagiti papangulo a nalinteg.

² Mayarigto ti tunggal maysa kadakuada iti pagkamangan no dumteng ti angin ken paglinongan no agbagio. Kasladanto karayan nga agay-ayus iti let-ang. Mayarigdanto iti anniniwan ti higante a bato iti natikag a daga.

³ Sikikita ken siaallingagdanto kadagiti pakasapulan dagiti tattao.

⁴ Naanusdanto ket ammodanto ti ar-aramidenda ken naimpapusoan ti saoda.

⁵ Awanto ti mangipagarup a mararaem ti maag wenno mangibaga a mapagtalkan ti nasabrak a tao.

⁶ Minamaag ti sao ti maag ket ti la dakes ti pampanunotenna nga aramiden. Maibusor iti Dios ti sao ken aramidna ket saanna a pakanen ti mabisin wenno painumen ti mawaw.

⁷ Dakes a tao ket dakes met dagiti aramidna. Isikatna a dadaelen dagiti napanglaw babaen kadagiti allilaw ken lapdanna ida a mangtunton iti kalinteganda.

⁸ Ngem ti natakneng, nalinteg ti aramidna ket pagtakderanna ti aniaman a nainkalintegan.

Pannakaukom ken Pannakaisubli ti Sigud a Kasasaad

⁹ Denggenyo ti ibagak, dakayo a babbai a nanam-ay ti panagbiagna ken awan ti pakadanaganna.

¹⁰ Nalabit nga awan ti pagkuranganyo ita, ngem inton kastoy a tiempo inton umay a tawen, agdanagkayto ta awanto ti ubas a burasenyo.

¹¹ Nanam-ay ti panagbibiagyo ken awan ti pakadanaganyo. Ngem ita, agtigergerkay iti buteng! Aguksobkayo ket agbidangkayo iti nakersang a lupot.

¹² Danogenyo ti barukongyo kas panangipakitayo iti ladingityo. Ngamin, nadadaelen dagiti nabunga a talon ken dagiti kaubasan.

¹³ Agtubtubon dagiti siitsiitan a mula ken kalkalunay iti daga dagiti tattaok. Sangitanyo dagiti amin a balbalay a naragsak idi dagiti agnaed, kasta met ti naarimbangaw a siudad.

¹⁴ Agpapanawto amin a tattao iti siudad. Uray ti palasio mabaybay-anto. Madadaelto dagiti balbalay ken pagwanawanan a salaknibda ket agtalinaeddanto a rebrebba iti agnanayon. Sadiayto ti ayuyang dagiti atap nga asno ken pagaraban dagiti karnero.

¹⁵ Ngem ibaonto manen ti Dios ti espirituna kadatayo. Nadam-egto manen ti natikag a daga ket nawadwadto ti maapit kadagiti taltalon.

¹⁶ Addanto kinalinteg ken hustisia iti entero a daga.

¹⁷ Gapu ta aramidento ti tunggal maysa ti rumbeng, addanto agnanayon a kappia ken talged.

¹⁸ Natalna ken natalgedto ti pagtaengan dagiti tattao ti Dios. Awanto ti pakaringgoranda. (

¹⁹ Ngem agtudonto iti yelo kadagiti kabakiran ket marakrakto ti siudad.)

²⁰ Naragsakto ti tunggal maysa gapu iti kaadu ti padanum dagiti mulada, ken gapu kadagiti natalged a pagaraban dagiti asno ken baka iti amin a disso.