Isaias 26 - Ti Baro a Naimbag a Damag Biblia

Pagballigien ti Dios dagiti Tattaona

¹ Iti dayta nga aldaw, kastoyto ti ikanta dagiti tattao ti Juda: Nalagda ti siudadmi! Ti Dios a mismo ti mangsalaknib kadagiti bakudna!

² Luktanyo dagiti ruangan, pastrekenyo ti nasion a nalinteg, ti nasion a natibker ti pammatina.

³ Sika, O Apo, ti mangted iti naan-anay a talna kadagiti natibker ti panggepna ken kadagiti agtalek kenka.

⁴ Agtalekkayo nga agnanayon iti Apo; kanayon a salaknibannatayo.

⁵ Impababana dagiti napalangguad, dinadaelna ti natalged a siudadda; rinebbana agraman dagiti bakudna.

⁶ Dagiti naidadanes payatpayatendan, ket magnadan iti rabawna.

⁷ O Apo, pasayaatem ti dalan dagiti nalinteg; nasimpa ti dalan a pagdaliasatanda.

⁸ Tungpalenmi ti pagayatam ket agtalekkami kenka; awanen sabali tartarigagayanmi no di sika.

⁹ Iti rabii, tarigagayanka iti amin a pusok; no ukomem ti daga ken dagiti tattaona, masursurodanto ti kaipapanan ti hustisia.

¹⁰ Uray naasika kadagiti managdakdakes, pulos a dida masursuro ti agaramid iti naimbag. Uray ditoy a daga nga ayan dagiti nalinteg, agaramidda latta iti dakes; dida kayat a bigbigen ti kinatan-okmo.

¹¹ Di ammo dagiti kabusormo a dusaem ida; O Apo, ibabainmo ida, ket bay-am nga agsagabada. Ipalak-ammo ti dusa nga insaganam kadakuada. Ipakitam no kasano ti panagayatmo kadagiti tattaom.

¹² O Apo, sika ti mangted iti talna kadakami; amin a magun-odmi bunga dagiti aramidmo.

¹³ O Apo a Diosmi, inturayandakami dagiti sabali a tattao, ngem siksika laeng ti bigbigenmi nga Apo.

¹⁴ Nataydan ket saandanton nga agbiag; saanton a bumangon dagiti al-aliada ta dinusa ken dinadaelmo ida. Awanen ti makalagip kadakuada.

¹⁵ O Apo, pinadakkelmo ti pagilianmi; pinalawam ti daga a masakupanna, ket daytoy ti nangted iti dayaw kenka.

¹⁶ Dinusam dagiti tattaom, O Apo, ket idi marigatanda, immasugda kenka.

¹⁷ Sika, O Apo, ti gapu ti panagasugmi; arigmi iti agpasikal nga agpukkaw gapu iti rigatna.

¹⁸ Nariknami ti ut-ot ken rigat, ngem awan met ti impasngaymi. Awan inabakmi nga itedmi iti dagami; pulos nga awan ti nagappuananmi.

¹⁹ Agbiagto manen dagiti natay kadagiti tattaomi! Agbiagto dagiti bangkayda! Agriingto dagiti matmaturog iti tanemda; bumangondanto a mangikankanta iti ragsakda! Kas iti pannakapabang-ar ti daga gapu iti linnaaw, kasta met ti panangpagungar ni Yahweh kadagiti nabayagen a natay.

Ti Pannakaukom ti Israel ken ti Pannakawayawayana

²⁰ Dakay a tattaok, sumrekkayo kadagiti balbalayyo ket serraanyo dagiti ridaw. Aglemmengkayo pay laeng agingga nga agbaaw ti pungtot ti Dios.

²¹ Manipud iti nailangitan a taengna, umay ti Apo a mangdusa kadagiti tattao ditoy daga gapu kadagiti basolda. Maibutaktakto dagiti pammapatay a naaramid iti nalimed ket dinton ilemmeng ti daga dagiti napapatay.