Isaias 15 - Ti Baro a Naimbag a Damag Biblia

Dadaelen ti Dios ti Moab

¹ Daytoy ti pakdaar maipapan iti Moab. Madadael dagiti siudad ti Ar ken Kir iti las-ud ti maysa a rabii ket naulimek ti entero a daga ti Moab.

² Sumang-at dagiti tattao ti Dibon iti turod tapno mapanda agsangit iti lugar a pagdaydayawan. Dung-awan dagiti taga-Moab dagiti siudad ti Nebo ken Medeba. Kinuskosanda dagiti uloda ket inikkatda dagiti barbasda gapu iti ladingitda.

³ Kadagiti kalsada, nakaarruat dagiti tattao iti nakersang a lupot. Kadagiti plasa ken tuktok dagiti balbalay, agdudung-aw ken agsasangit dagiti tattao.

⁴ Agsasangit dagiti tattao ti Hesbon ken Eleale ket mangngeg agingga idiay Jaaz dagiti sangsangitda. Uray dagiti soldado agpigergerda ket awanen ti turedda.

⁵ Maasiaanak unay iti Moab! Nagkamang dagiti tattao idiay ili ti Zoar ken idiay Eglat Selisia. Adda dagiti agturong idiay Luhit. Agsasangitda bayat ti isasang-atda iti dalan. Adda dagiti aglibas a mapan idiay Horonaim ket agdudung-awda iti napigsa.

⁶ Nagmagan ti Waig Nimrim, nalaylay dagiti ruot iti igidna ket awanen natda a nalangto a mula.

⁷ Ballasiwen dagiti tattao ti Waig ti Karawawe. Kayatda ti aglibas agraman dagiti amin a sanikuada.

⁸ Mangngeg ti sangsangit iti amin a suli ti Moab ket dumanon kadagiti ili ti Eglaim ken Beerelim.

⁹ Iti ili ti Dibon, nalabbaga ti karayan gapu iti dara, ngem adda pay nakarkaro a didigra nga idissuor ti Dios kadagiti tattao sadiay. Wen, addanto nakaam-ames a panagpapatay a mangibus kadagiti nabati idiay Moab.