Isaias 12 - Ti Baro a Naimbag a Damag Biblia

Kanta a Pagyaman

¹ Dumtengto ti aldaw nga ikanta ti tunggal tao: “Idaydayawka, O Apo; nupay nakapungtotka kaniak bimmaaw ti pungtotmo ket ita, liwliwaennak.

² Ti Dios ti mangisalakan kaniak, agtalekak kenkuana ket awan pagbutngak. Ti Apo ti mangted iti bileg ken pigsak, wen, isu ti mangisalakan kaniak.

³ Kas iti mawaw a siraragsak a mangtako iti danum, kasta met dagiti tattao ti Dios no isalakanna ida.”

⁴ Dumtengto ti aldaw nga ikanta dagiti tattao: “Agyamankayo iti Apo! Agpatulongkayo kenkuana! Ibagayo kadagiti amin a nasion ti inaramidna! Ipakaammoyo kadakuada ti kinatan-okna!

⁵ Kantaanyo ti Apo, gapu kadagiti naindaklan nga inaramidna. Iti entero a lubong, ipadamagyo ti natan-ok a gapuananna.

⁶ Agpukkaw ken agkanta koma dagiti amin nga agnaed iti Sion! Naindaklan ti Nasantoan a Dios ti Israel, ket agnaed iti sidong dagiti tattaona.”