Hebreo 11 - Ti Baro a Naimbag a Damag Biblia

Ti Pammati

¹ No adda pammatitayo, ditay agduadua a pumudno dagiti namnamaentayo ket natalgedtayo nga adda dagiti bambanag a ditay makita.

² Gapu iti pammati, nagun-od dagiti tattao idi un-unana ti yaanamong ti Dios kadakuada.

³ Gapu ta adda pammatitayo, maawatantayo a naparsua ti lubong babaen iti sao ti Dios ket iti kasta, napataud dagiti makita kadagiti saan a makita.

⁴ Gapu ta adda pammati ni Abel, nangipaay iti Dios iti nasaysayaat a daton ngem ti daton ni Cain. Babaen iti pammatina, nagun-odna ti yaanamong ti Dios kas nalinteg a tao agsipud ta inawat ti Dios dagiti sagutna. Gapu iti pammati ni Abel, agsasao pay laeng uray no natayen.

⁵ Gapu ta adda pammati ni Enoc, nailisi iti ipapatay. Nayuli ketdi iti ayan ti Dios, ket awan ti nakasarak kenkuana agsipud ta innala ti Dios. Kuna ti Nasantoan a Surat a sakbay a nayuli ni Enoc, naragsakan ti Dios kenkuana gapu iti inaramidna.

⁶ Ngem no awan ti pammati, saan a mabalin a maparagsak ti Dios. Ta no umasidegka iti Dios, masapul a patiem nga adda Dios a manggunggona kadagiti agsapul kenkuana.

⁷ Gapu ta adda pammati ni Noe, impangagna ti balakad ti Dios maipapan kadagiti bambanag iti masakbayan a dina pay makita. Nagtulnog ket nangaramid iti daong a nakaisalakananda a sangafamiliaan. Gapu iti inaramidna, impakitana a dakes ti lubong ket babaen iti pammati, inawatna ti kinalinteg nga aggapu iti Dios.

⁸ Gapu ta adda pammati ni Abraham, nagtulnog idi ayaban ti Dios ket napan iti maysa a pagilian nga inkari ti Dios nga ited kenkuana. Pimmanaw iti ilina, nupay dina ammo ti papananna.

⁹ Gapu ta adda pammatina, nagnaed a kas ganggannaet iti daga nga inkari ti Dios kenkuana. Nagyan kadagiti tolda agraman da Isaac ken Jacob, isuda a nagkarian met ti Dios.

¹⁰ Ta paspasungaden idi ni Abraham ti siudad a binangon ken inaramid ti Dios—ti siudad a nabangon iti mataginayon a fondasion.

¹¹ Babaen iti pammati, naparaburan ni Sara iti gundaway nga agsikog nupay baketen agsipud ta nagtalek a tungpalen ti Dios ti inkarina.

¹² Nupay naibilang a kasla natayen ni Abraham, timmaud kenkuana ti adu a kaputotan a kas kaadu dagiti bitbituen sadi langit ken kas kaadu ti darat iti igid ti baybay.

¹³ Nagtalek amin dagitoy a tattao iti Dios agingga iti ipapatayda. Saanda a naawat dagiti inkari ti Dios, ngem nakita ken pinaspasungadanda dagitoy a kari uray no mabayag pay ti pannakatungpalda. Dida nagaripapa a mangibaga kadagiti tattao a ganggannaetda ket agdaldaliasatda ditoy daga.

¹⁴ Ta iparangarang dagiti agkuna iti kasta nga agbirbirokda iti bukodda a daga.

¹⁵ Saan a ti daga a pinanawanda ti pampanunotenda. No ti daga a pinanawanda ti pampanunotenda, adda koma gundawayda nga agsubli.

¹⁶ Ngem tartarigagayanda ti nasaysayaat a lugar, kayatna a sawen, ti nailangitan a lugar. Isut' gapuna a saan a mabainan ti Dios no awaganda a Diosda agsipud ta insaganaanna ida iti maysa a siudad.

¹⁷ Gapu ta adda pammati ni Abraham, indatonna ni Isaac nga anakna idi suoten ti Dios. Wen, ni Abraham ti nakaitedan ti kari ti Dios. Sisasagana idi a mangidaton iti kakaisuna nga anakna.

¹⁸ Daytoy ti gapuna a kinuna ti Dios kenkuana, “Tumaudto dagiti kaputotam ken ni Isaac.”

¹⁹ Binigbig ni Abraham a kabaelan ti Dios ti mangpagungar, isut' gapuna nga iti sabali a pannao, naisubli ni Isaac kenkuana manipud ken ni patay.

²⁰ Gapu ta adda pammati ni Isaac, imbagana kada Jacob ken Esau, “Bendisionannakayto ti Dios iti masakbayan.”

²¹ Gapu ta adda pammati ni Jacob, binendisionanna ti tunggal maysa kadagiti annak ni Jose sakbay ti ipapatayna. Nagsammaked ni Jacob iti sarukodna ket nagdaydayaw iti Dios.

²² Babaen iti pammati, sakbay ti ipapatay ni Jose, imbagana ti ipapanaw dagiti Israelita idiay Egipto. Imbilinna met ti aramidendanto iti bangkayna.

²³ Gapu iti pammati, idi nayanak ni Moises, inlemmeng dagiti dadakkelna iti tallo a bulan. Gapu ta nakitada a nalungpo ti ubing, dida nagbuteng a nangsalungasing iti bilin ti ari.

²⁴ Babaen iti pammati, idi nataenganen ni Moises, dina kinayat ti maibilang nga anak ti babai nga anak ti Faraon.

²⁵ Kinaykayatna ti makipagsagaba kadagiti tattao ti Dios ngem ti panaglak-amna iti di agpaut a ragsak nga ited ti basol.

²⁶ Imbilangna a napatpateg nga adayo ti panagsagaba a maipuon iti Cristo ngem ti amin a kinabaknang ti Egipto agsipud ta kanayon a situturong ti panagkitana iti gunggona iti masakbayan.

²⁷ Gapu ta adda pammati ni Moises, pimmanaw iti Egipto a di nagbuteng iti pungtot ti ari. Dina kinayat ti agsubli ta kasna la kitkitaen ti Dios a di makita.

²⁸ Gapu ta adda pammatina, inrugina ti pannakarambak ti Fiesta ti Ilalabas. Pinawarsianna dagiti ridaw iti dara tapno saan a gudasen ti Anghel ni Patay dagiti inauna nga annak dagiti Israelita.

²⁹ Gapu ta adda pammati dagiti Israelita, binallasiwda ti Nalabaga a Baybay. Kasda la nagna iti namaga a daga, ngem nalmes dagiti Egipcio idi pinadasda ti bumallasiw.

³⁰ Gapu iti pammati, narba dagiti bakud ti Jerico, kalpasan ti panangrikrikos dagiti Israelita iti pito nga aldaw.

³¹ Gapu iti pammati, saan a nairaman a napapatay ni Rahab a balangkantis a babai idi napapatay dagiti simmukir iti Dios, agsipud ta siaayat a nangpasangbay kadagiti espia.

³² Ituloyko pay kadi ti agsarita? Awanen ti tiempok a mangibaga iti pakasaritaan da Gideon, Barac, Samson, Jefte, David, Samuel ken dagiti profeta.

³³ Babaen iti pammati, pinarmekda dagiti pagarian. Inaramidda ti nalinteg ket inawatda ti inkari ti Dios. Inapputda ti ngiwat dagiti leon.

³⁴ Iniddepda dagiti gumilgil-ayab nga apuy. Nalisianda ti pannakapapatay iti kampilan. Nakapuyda ngem pimmigsada. Nagbalinda a maingel iti gubat ket pinarmekda ti buyot dagiti ganggannaet.

³⁵ Inawat dagiti babbai dagiti napagungar a minatayda. Saan a kinayat dagiti dadduma ti mawayawayaan. Kinaykayatda ketdi ti maparparigat agingga a natayda tapno mapagungarda iti nasaysayaat a biag.

³⁶ Nalalais ken nasapsaplit dagiti dadduma. Nakawaran ken naibaludda.

³⁷ Nauborda, naragadida a nagkadua, napapatayda iti kampilan. Nagpagnapagnada a sikakawes iti lalat ti karnero wenno kalding. Napanglawda, naidadanesda ken naparparigatda.

³⁸ Saan a maikari ti lubong kadakuada! Nagalla-allada kadagiti let-ang ken bantay. Nagigianda kadagiti abut ken rukib ti daga.

³⁹ Nagun-od amin dagitoy a tattao ti nasayaat a pakasaritaan gapu iti pammatida! Nupay kasta, dida naawat ti inkari ti Dios,

⁴⁰ ta adda nasaysayaat a plano ti Dios saan laeng a para kadakuada no di pay ket para kadatayo. Panggep ti Dios a kaduatayonto ida nga umawat iti inkarina nga awan ket ti umun-una.