Genesis 22 - Ti Baro a Naimbag a Damag Biblia

Bilinen ti Dios ni Abraham nga Idatonna ni Isaac

¹ Iti saan a nabayag, sinuot ti Dios ni Abraham. Kinunana, “Abraham.” “Adtoyak, Apo,” insungbat ni Abraham.

² Kinuna ti Dios, “Alaem ni Isaac a kakaisuna ken dungdungoem nga anak, ket inka idiay Moria. Iti bantay nga ipakitakto kenka, idatagmonto kaniak ni Isaac a kas daton a mapuoran.”

³ Kabigatanna, nasapa nga insagana ni Abraham ti asnona. Nangbalsig iti kayo a pagpuorna iti daton. Kalpasanna, innalana ni Isaac ken ti dua nga adipenna ket napanda iti disso nga imbaga ti Dios.

⁴ Iti maikatlo nga aldaw, nakita ni Abraham iti adayo ti nasao a disso.

⁵ Kinunana kadagiti adipenna, “Agbatikayo ditoy agraman dagiti asno. Inkam agdaydayaw ken ni Isaac sadiay. Agsublikaminto met laeng.”

⁶ Impabaklay ni Abraham ken ni Isaac ti kayo a pangpuor iti daton. Innalana ti imuko ken dagiti beggang a pagaron. Idi magmagnada,

⁷ kinuna ni Isaac, “Tatang.” “Apay, anakko?” insungbat ni Abraham. Sinaludsod ni Isaac, “Makitak nga adda dagiti beggang ken kayo, ngem ayanna ti maidaton nga urbon a karnero?”

⁸ “Mangtedto ti Dios, anakko,” insungbat ni Abraham. Nagtuloy a nagna dagiti agama.

⁹ Idi dumtengda iti disso nga imbaga ti Dios kenkuana, nangbangon ni Abraham iti maysa nga altar. Inurnosna dagiti kayo iti rabaw ti altar. Rineppetna ni Isaac nga anakna sana imparabaw kadagiti kayo.

¹⁰ Innala ni Abraham ti imuko tapno patayenna ti ubing,

¹¹ ngem nagpukkaw ti anghel ni Yahweh manipud langit, “Abraham! Abraham!” “Adtoyak, Apo,” insungbat ni Abraham.

¹² “Dimo sagiden wenno ranggasan ti ubing,” kinuna ti anghel. “Makitakon nga agbutengka iti Dios, ta dika nagkedked a mangted kenkuana iti kakaisuna nga anakmo.”

¹³ Inwaras ni Abraham ti panagkitana. Adda nakitana a kalakian a karnero a naisalat ti sarana iti bassit a narukbos a kayo. Napanna innala ti karnero ket daytoy ti pinuoranna a kas daton a sukat ti anakna.

¹⁴ Pinanaganan ni Abraham dayta a disso iti “Ti Apo ti Mangted.” Agpapan ita, kunkuna pay laeng dagiti tattao, “Iti bantay ti Apo, adda maited.”

¹⁵ Manipud langit, nagsao manen ti anghel ni Yahweh. Kinunana,

¹⁶ “Siak, ni Yahweh, ti agsasao. Yantangay ta dika nagkedked a mangted kaniak iti kakaisuna nga anakmo, isapatak iti naganko a bendisionankanto iti nawadwad.

¹⁷ Paaduekto dagiti kaputotam a kas iti kaadu dagiti bituen iti tangatang wenno dagiti darat iti igid ti baybay. Parmekento dagiti kaputotam dagiti kabusorda.

¹⁸ Dawatento kaniak dagiti amin a nasion iti lubong a bendisionak ida a kas iti panangbendisionko kadagiti kaputotam. Aramidekto daytoy gapu ta tinungpalmo ti bilinko.”

¹⁹ Nagsubli ni Abraham iti ayan dagiti adipenna. Nagkukuyogda a nagawid idiay Beerseba, a nangipasdekan ni Abraham iti pagnaedanna.

Dagiti Kaputotan ni Nahor

²⁰ Iti saan a nabayag, nadamag ni Abraham a naaddaan ni Milca nga asawa ni Nahor a kabsatna kadagiti annak a lallaki.

²¹ Dagitoy dagiti lallaki nga annakna: Ni Uz ti inauna, sa ni Buz a kabsatna, ni Kemuel nga ama ni Aram,

²² da Kesed, Hazo, Pildas, Jidlaf ken Betuel.

²³ (Ni Betuel ti ama ni Rebecca.) Dagitoy walo ti annak da Milca ken Nahor a kabsat ni Abraham.

²⁴ Ni Reuma a kamalala ni Nahor inyanakna da Teba, Gaham, Taaz ken Maaca.