Ezekiel 21 - Ti Baro a Naimbag a Damag Biblia

Ti Kampilan ni Yahweh

¹ Nagsao ti Apo kaniak.

² Kinunana, “Anak ti tao, babalawem ti Jerusalem. Agsaoka iti maibusor kadagiti lugar a pagdaydayawan dagiti tattao. Ballaagam ti daga ti Israel.

³ Ibagam kadagiti Israelita a siak, ni Yahweh, kastoy ti kunak, ‘Busorenkayo. Asutek ti kampilanko ket patayenkayo amin a padapada, dagiti nalinteg ken dagiti managdakdakes.

⁴ Aramatek ti kampilanko a pangpatay kadakayo amin manipud amianan agingga iti abagatan.

⁵ Maammoanto ti tunggal maysa a siak, ni Yahweh, inasutko ti kampilanko ket saanko nga isubli iti kalubanna.’

⁶ “Anak ti tao, agsaibbekka a kasla marunaw ta pusom gapu iti pannakapaay. Agsaibbekka iti nasaem iti lugar a pakakitaan ti amin kenka.

⁷ No saludsodenda no apay nga agsasaibbekka, ibagam kadakuada nga agsasaibbekka gapu iti mapasamak iti masakbayan. Inton dumteng, agbutengdanto iti napalalo, agleppayto dagiti imada ket agkutukotto dagiti tumengda. Dimtengen ti tiempo, wen, dimtengen!” Daytoy ti kuna ti Apo a Dios.

⁸ Kinuna ti Apo kaniak,

⁹ “Anak ti tao, agipadtoka ket ibagam a kastoy ti kunak: ‘Adda kampilan! Adda kampilan! Naasa ken napasileng;

¹⁰ napatadem tapno agpapatay, napasileng tapno aggilap a kasla kimat. Awan ti panagragsak, ta di inkankano dagiti tattaok ti tunggal ballaag ken pannakadusa.

¹¹ Maas-asa ti kampilan tapno maisagana a mausar. Napatadem ken napasilap tapno maited iti mammapatay.

¹² Anak ti tao, agpukkawka iti ladingit; nairanta daytoy a kampilan kadagiti tattaok, ken kadagiti amin a papangulo ti Israel. Mapapataydanto amin agraman dagiti tattaok. Danogem ta barukongmo gaput' ladingitmo.

¹³ Suotek dagiti tattaok ket no dida kayat ti mabagbagaan, ania ti aramidek kadakuada? Aramatek ti pang-or a pangdusak kadakuada.’

¹⁴ “Ita, anak ti tao, agipadtoka. Agtipatka, ket tumagbat ti kampilan iti mamin-adu. Daytoy ti kampilan nga agpapatay, mamutbuteng, ken mangrangrangkay.

¹⁵ Patakrotenna dagiti tattaok ket matuangda. Butbutngek ti siudadda babaen iti kampilan nga aggilap a kasla kimat ken nakasagana a pumatay.

¹⁶ Tumagbatka iti kannawan ken iti kannigid, sika a natadem a kampilan! Tumagbatka iti uray sadino a sangoem.

¹⁷ Agtipatakto met, ket agbaawton ti pungtotko. Siak, ni Yahweh, ti agsasao.”

Ti Kampilan ti Ari ti Babilonia

¹⁸ Nagsao ti Apo kaniak.

¹⁹ Kinunana, “Anak ti tao, mangikabilka iti pagilasinan iti dua a dalan a pagnaan ti ari ti Babilonia a sikakampilan. Mangrugi dagitoy dua a dalan iti maysa a pagilian. Mangikabilka iti pagilasinan iti pagsangaan ti dalan.

²⁰ Maipaturong ti maysa iti dalan a mapan idiay Rabba a siudad dagiti Ammonita. Ti maysa ipatuldona ti dalan a mapan idiay Juda, iti nasarikedkedan a siudad ti Jerusalem.

²¹ Agsardengto ti ari ti Babilonia iti abay ti pagilasinan iti pagsangaan ti dalan. Tapno maammoanna ti dalan a surotenna, agbuyonto: gunggonenna dagiti pana iti nakaikabilanda, makiuman kadagiti didiosenna, ken sukimatenna ti dalem ti animal a pinartina.

²² Iggaman ti kannawan nga imana ti pana a namarkaan iti ‘Jerusalem’. Ibaga ti pana nga ikabilna dagiti maso a pagrakrak, ipukkawna ti bilin a makigubat, ipuestona dagiti maso iti sangoanan dagiti ruangan, ipasdekna dagiti sarikedked, ken agkali kadagiti abut a paglemmengan.

²³ Saanto a patien daytoy dagiti taga-Jerusalem gapu kadagiti tulag a pinasingkedanda. Ngem ipalagip daytoy a padles kadakuada dagiti basolda ken mangiballaag kadakuada ti pannakatiliwda.

²⁴ Ngarud, siak nga Apo a Dios, daytoy ti ibagbagak. Naibutaktaken dagiti basolyo. Ammo ti amin a nadagsen dagiti basolyo. Iparangarangyo ti basolyo iti tunggal aramidyo. Naukomkayon, ket yawatkayto kadagiti kabusoryo.

²⁵ “Asideg metten ti aldawmo, sika a managdakdakes ken makarimon nga agturay iti Israel. Umayen ti maudi nga aldaw a pannakadusam.

²⁶ Siak ti Apo a Dios ti nagsao. Idissom ti koronam, ket ikkatem ta mitram. Nagbaliwen ti amin. Pagturayem dagiti nanumo, ipababam iti saad dagiti madama nga agtuturay.

²⁷ Dadaelek a mamimpinsan ti siudad! Wen, dadaelek. Ngem saanto a mapasamak daytoy agingga iti idadateng ti pinilik a mangdusa iti siudad. Isunto ti pangtedak.

Maysa a Kampilan ken dagiti Ammonita

²⁸ “Anak ti tao, agipadtoka. Ipakaammom a kastoy ti kunak nga Apo a Dios kadagiti Ammonita gapu iti pananglalaisda kadagiti Israelita. Ibagam daytoy kadakuada, ‘Adda kampilan a nakasagana nga agdadael; napasileng nga agpapatay, aggilap a kas iti kimat.

²⁹ Saan a pudno dagiti parmatayo, ket ulbod dagiti padtoyo. Nakillo ken dakeskayo a tattao. Dumtengen ti kanibusananyo, ti aldaw ti maudi a pannakadusayo. Agdisso ti kampilan kadagiti tengngedyo.

³⁰ “Isublim ti kampilanmo iti kalubanna. Ukomenkanto iti lugar a nakaparsuaam, iti daga a nakayanakam.

³¹ Mariknamto ti pungtotko no idissuorko kenka a kas gumilgil-ayab nga apuy. Yawatkanto kadagiti nadawel a tattao, dagiti eksperto nga agdadael.

³² Mapuorankanto. Maibuyatto ti daram iti mismo a pagiliam, ket awanton ti makalagip kenka.” Daytoy ti kuna ni Yahweh.